មនុស្សជំនិតលោកកឹម សុខា ៖ ហេតុអ្វីផ្តល់តម្លៃឱ្យទីស្នាក់ការជាងគណបក្ស?
ភ្នំពេញៈហេតុអ្វីផ្តល់តម្លៃឱ្យទីស្នាក់ការជាងគណបក្ស?។ នេះជាចំណងជើងអត្ថបទរបស់លោក មុត ចន្ថា ដែលត្រូវបានគេ ស្គាល់ថា ជាមនុស្សជំនិតរបស់លោកកឹម សុខានិងមន្ត្រីជាន់ខ្ពស់មួយរូបធ្លាប់ប្រឡូកជោកជាំក្នុងអតីតគណបក្សសង្គ្រោះជាតិ។ លោកបានសរសេរនៅលើហ្វេសប៊ុករបស់លោកកាលពីថ្ងៃទី២៣ខែវិច្ឆិកាឆ្នាំ២០២១ដោយរៀបរាប់នូវចំណុចនីមួយៗទាក់ទងនឹងមេឧទ្ទាមក្រៅច្បាប់។នេះគ្រាន់តែជាផ្នែកខ្លះនៃសំណេររបស់លោក។
លោកបានសរសេរថា យើងគួរសិក្សាអំពីមូលហេតុដែលលោក សម រង្ស៉ី និងមនុស្សជំនិតរបស់គាត់ដូចជាលោក អេង ឆៃអ៊ាង ដែលកំពុងផ្តល់សារសំខាន់ និងតម្លៃលើស្នាក់ការគណបក្សជាង “គណបក្ស” និង “ប្រធានគណបក្ស”។ លោករំលឹក
ថា គេនៅចាំបានយ៉ាងច្បាស់ថា រយៈពេលត្រឹមតែមួយថ្ងៃក្រោយលោក កឹម សុខា ប្រធានគណបក្សសង្គ្រោះជាតិត្រូវបាន ចាប់ខ្លួន, លោក សម រង្ស៉ី បានប្រកាសឱ្យថ្នាក់ដឹកនាំគ្រប់លំដាប់ ជាពិសេសមន្ត្រីជាប់ឆ្នោត រួមទាំងតំណាងរាស្ត្រសមាជិក ក្រុមប្រឹក្សាឃុំ-សង្កាត់ទើបជាប់ថ្មីទាំង ៥.០០៧ អាសនៈ ក្រុមប្រឹក្សាក្រុង-ស្រុក-ខណ្ឌ និងរាជធានី-ខេត្តឱ្យចាកចេញពី ប្រទេស។ ទង្វើនេះបានបង្ហាញសក្ខីកម្មយ៉ាងច្បាស់ថា លោក សម រង្ស៉ី មិនបានផ្តល់សារសំខាន់និងតម្លៃដល់លោក កឹម សុខា ក្នុងនាមជាប្រធានគណបក្ស និងគ្មានចេតនាជំរុញឱ្យមានការតស៊ូដោយអហិង្សាអ្វីទាំងអស់នៅក្នុងប្រទេស សំដៅទាមទារឱ្យមានការដោះលែងឡើយ។ លោក សម រង្ស៉ី និងអ្នកគាំទ្ររបស់គាត់មានបំណងបញ្ចប់ជីវិតរបស់លោក កឹម សុខា ពីគណបក្សសង្គ្រោះជាតិ និងពីឆាកនយោបាយឱ្យដេកក្នុងពន្ធនាគារ ជារៀងរហូត។
លោក ចន្ថា បន្តទៀតថា នៅមុនការរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ឆ្នាំ២០១៧ លោក សម រង្ស៉ី នៅតែប្រកាសឱ្យថ្នាក់ដឹកនាំបក្ស និងមន្ត្រីជាប់ឆ្នោតទាំងអស់រត់ចេញក្រៅប្រទេសនៅក្រោមលេសបញ្ចៀសនូវការគំរាម កំហែង និងការទិញទឹកចិត្តឱ្យចុះចូលជាមួយគណបក្សកាន់អំណាច។ សំខាន់ជាងនេះទៀត លោក សម រង្ស៉ីបានបញ្ជា មកក្រុមមេធាវីគណបក្សមិនឱ្យចូលខ្លួនទៅតតាំងក្តីក្នុងពេលសវនការរបស់តុលាការកំពូលដោយបើកឱកាសឱ្យក្រុមមេធាវីដើមបណ្តឹងដែលស្នើសុំរំលាយគណបក្សសង្គ្រោះជាតិ លើកហេតុផលគ្រប់យ៉ាងនិងភស្តុតាង ដើម្បីដាក់បន្ទុកដោយសេរី ក្នុងការទាមទាររំលាយគណបក្ស។ រីឯតុលាការកំពូលក៏បានសម្រេចសេចក្តីដោយងាយស្រួល ខណៈដែលចុងចោទ ឬក្រុមមេធាវីការពារក្តីឱ្យចុងចោទពុំមានវត្តមានតតាំងក្នុងសវនការ។ ទង្វើនេះបានបង្ហាញនិងបញ្ជាក់យ៉ាងច្បាស់ថាលោក សម រង្ស៉ី មានចេតនាចង់ឱ្យតុលាការរំលាយគណបក្ស នៅក្រោមទ្រឹស្តី «នំអញមិនបានស៊ី អញជាន់ចោល!»។
គួរកត់សម្គាល់ថា លោក សម រង្ស៉ីបានលាលែងពីមុខតំណែងជាប្រធានគណបក្សសង្គ្រោះជាតិនិងពីសមាជិកភាពទាំងអស់ ក្នុងគណបក្ស នៅខែកុម្ភៈ ឆ្នាំ២០១៧ និងស្របពេលជាគ្នានេះដែរគាត់ក៏ត្រូវបានកាត់ទោសឱ្យជាប់ពន្ធនាគារដែលគាត់ ដឹងច្បាស់ជាមុនថាមិនអាចវិលត្រឡប់មកដឹកនាំគណបក្សសង្គ្រោះជាតិវិញបានទេ ហើយគាត់ក៏មិនចង់ឱ្យលោក កឹម សុខា បន្តដឹកនាំគណបក្សសង្គ្រោះជាតិ ដោយគ្មានវត្តមានរបស់គាត់ដែរ ព្រោះគាត់ និងមនុស្សជំនិតព្រួយបារម្ភចំពោះលោក កឹម សុខាលេបយកគណបក្សនេះទាំងស្រុង។ដូច្នេះគាត់មានចេតនាបើកដៃរុញឱ្យតុលាការកំពូលរំលាយគណបក្សដោយស្រួល ដោយគ្មានការតតាំងលើសមរភូមិច្បាប់និងតុលាការ។
លោក ចន្ថា បន្តថាសហគមន៍អន្តរជាតិបានចោទសួរអំពីមូលហេតុដែលគណបក្សមិនព្រមចាត់តាំងក្រុមមេធាវីទៅការពារ នៅក្នុងសវនការ ប៉ុន្តែចម្លើយពីលោក សម រង្ស៉ី និង អេង ឆៃអ៊ាងគឺ«មិនចង់ផ្តល់ភាពស្របច្បាប់ដល់ការរំលាយរបស់ តុលាការកំពូលហើយថាប្រសិនជាចាត់ក្រុមមេធាវីទៅការពារក៏គង់តែត្រូវគេរំលាយដដែល»។ចម្លើយនេះត្រូវបានចំអកឱ្យថា គណបក្សគ្មានយុទ្ធសាស្ត្រច្បាប់។
នៅមុនការរំលាយគណបក្សសង្គ្រោះជាតិនេះដែរ លោក សម រង្ស៉ីបានប្រកាសឌឺដងពីក្រៅប្រទេសដាក់ប្រមុខរាជរដ្ឋា ភិបាលគឺសម្តេចហ៊ុនសែនថាមិនហ៊ានរំលាយគណបក្សសង្គ្រោះជាតិនោះទេព្រោះសហគមន៍អន្តរជាតិមិនអនុញ្ញាតឱ្យធ្វើបែបនេះជាដាច់ខាត។ លោក សម រង្ស៉ី ក៏បាននិយាយផ្គើនម្តងហើយម្តងទៀតថា «សម្តេច ហ៊ុន សែន មិនហ៊ានរំលាយ ហើយប្រសិនជាក្លាហានរំលាយសាកមើលទៅដឹងហើយ!»។ ចំណុចនេះបញ្ជាក់យ៉ាងច្បាស់ថា លោក សម រង្ស៉ី មានបំណងបង្កកំហឹង ដើម្បីដាក់សម្ពាធជំរុញឱ្យរំលាយគណបក្សសង្គ្រោះជាតិឱ្យខាងតែបាន៕ ដោយៈ ពលជ័យ