សម្តេចក្រឡាហោម ស ខេង អនុញ្ញាតឲ្យលោក ឃឹម ឡាគី បង្កើតគណបក្សអនាគតជាតិ
ភ្នំពេញៈសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឲ្យលោក ឃឹម ឡាគី អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ បង្កើតគណបក្សអនាគតជាតិជាផ្លូវការហើយ នៅថ្ងៃទី២៤ ខែ វិច្ឆិកា ឆ្នាំ២០២១ នេះ។ការអនុញ្ញាតឲ្យបង្កើតគណបក្សអនាគតជាតិ បានធ្វើឡើងបន្ទាប់ពីលោកឃឹម ឡាគី បានដាក់ពាក្យ សុំបង្កើតគណបក្សទៅសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២៥ ខែតុលា ឆ្នាំ២០២១។
សម្តេចក្រឡាហោម ស ខេង បានធ្វើលិខិតចុះថ្ងៃទី២៤ ខែវិច្ឆិកា ឆ្នាំ២០២១ ជម្រាបទៅលោកឃឹម ឡាគី ថា ផ្អែកតាម បញ្ញត្តិមាត្រា៩ នៃច្បាប់ស្តីពីគណបក្សនយោបាយ ក្រសួងមហាផ្ទៃសម្រេចអនុញ្ញាតឱ្យបង្កើត “គណបក្សអនាគតជាតិ” សរសេរជាអក្សរកាត់ គ.អ.ជ. និងមានអាសយដ្ឋាននៃទីស្នាក់ការកណ្តាលស្ថិត នៅភូមិព្រែករុន ឃុំព្រែកគយ ស្រុកស្អាង ខេត្តកណ្តាល។ ដូច្នេះ ដើម្បីទទួលបានសុពលភាព និងអាចធ្វើសកម្មភាពបានដោយស្របច្បាប់ក្នុងឋានៈជានីតិបុគ្គល នៅក្នុងរយៈពេល១៨០ (មួយរយប៉ែតសិប) ថ្ងៃ បន្ទាប់ពីបានបង្កើតរួចហើយ គណបក្សអនាគតជាតិ ត្រូវរៀបចំបែបបទ និងបំពេញលក្ខខណ្ឌស្នើសុំចុះបញ្ជីនៅក្រសួងមហាផ្ទៃ ស្របតាមបញ្ញត្តិមាត្រា៩ មាត្រា១៨ថ្មី មាត្រា១៩ថ្មី និងមាត្រា២០ នៃច្បាប់ស្តីពីគណបក្សនយោបាយ។
គួរបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី១៤ ខែសីហា ឆ្នាំ២០២១ បានយល់តាមសំណើរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការផ្តល់សិទ្ធិនយោបាយឡើងវិញដល់មន្ត្រីជាន់ខ្ពស់អតីតគណបក្សសង្គ្រោះជាតិ ចំនួនពីររូប គឺលោកឃឹម ឡាគី និងលោកម៉ៅ សុផល។
គិតត្រឹមថ្ងៃទី២៤ ខែវិច្ឆិកា ឆ្នាំ២០២១ នេះ មានមន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួន២៦រូបហើយដែល ទទួលបាននីតិសម្បទាឡើងវិញ។ក្នុងចំណោមជាង២០រូបនោះ មានក្រុមនិយម កឹម សុខា និងក្រុមនិយម សមរង្ស៊ី។
ដោយក្នុងចំណោមអ្នកទទួលបានសិទ្ធិធ្វើនយោបាយឡើងវិញនេះគឺមានមួយចំនួនបានបង្កើតគណបក្សនយោបាយដោយខ្លួនឯងនិងខ្លះបានចូលរួមធ្វើនយោបាយជាមួយគណបក្សដែលបង្កើតថ្មីដោយពួកគេមិនរង់ចាំខ្មោចអតីតគណបក្សសង្គ្រោះជាតិ រស់ឡើងវិញនោះទេ។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ដែលបានបង្កើតគណបក្សថ្មីមានដូចជាៈ លោក រៀល ខេមរិន្ទ្រ អតីតតំណាងរាស្ត្រ ទទួលបាននីតិសម្បទាឡើងវិញ កាលពីថ្ងៃទី១៨ ខែមីនា ឆ្នាំ២០១៩ បង្កើតគណបក្សខ្មែរអភិរក្ស។ លោក ជីវ កត្តា អតីតតំណាងរាស្ត្រ ទទួលបាននីតិសម្បទាឡើងវិញកាលពីថ្ងៃទី១៩ ខែមីនា ឆ្នាំ២០១៩បង្កើតគណបក្ស ខ្មែរស្រលាញ់ជាតិ។ លោក អ៊ូ ច័ន្ទរ័ត្ន អតីតតំណាងរាស្ត្រ ទទួលបាននីតិសម្បទាឡើងវិញកាលពីថ្ងៃទី១៩ ខែមីនា ឆ្នាំ២០១៩ បង្កើតគណបក្សកែទម្រង់កម្ពុជា។ លោកថាច់ សេដ្ឋា ទទួលបាននីតិសម្បទាឡើងវិញនៅថ្ងៃទី១២ ខែមេសា ឆ្នាំ២០២១ ប្រភពអះអាងថា បង្កើតគណបក្សបេះដូងជាតិ ជាមួយលោកសៀម ភ្លុក តែបន្ទាប់ពីបែកការណ៍រឿងមេទ្ទាម សម រង្ស៊ី , អេង ឆៃអ៊ាង ឲ្យបង្កើតគណបក្សនេះ លោកថាច់ សេដ្ឋា ក៏បានរត់ទៅចូលជាមួយគណបក្សភ្លើងទៀន។ លោកយ៉ែម បុញ្ញឫទ្ធិ ទទួលបាននីតិសម្បទាឡើងវិញនៅថ្ងៃទី១៧ ខែមេសា ឆ្នាំ២០២១ បង្កើតគណបក្សកម្ពុជានិយម។ លោកឃឹម ឡាគី ទទួលបាននីតិសម្បទាឡើងវិញ កាលពីថ្ងៃទី១៤ ខែសីហា ឆ្នាំ២០២១ បង្កើតគណបក្សអនាគតជាតិ៕ ដោយៈ ពលជ័យ