លោក កឹម សុខា៖សម រង្ស៊ី និងកឹម សុខា មិនមែនជាមនុស្សតែមួយទេ
ភ្នំពេញ:លោក កឹម សុខា បានប្រកាសជាផ្លូវការថា សម រង្ស៊ី និងកឹម សុខា មិនមែនជាមនុស្សតែមួយទេ ព្រោះសកម្មភាពរបស់ សម រង្ស៊ី និងបក្ខពួក ពុំមានការអនុញ្ញាត ឬគាំទ្រពីរូបលោក (កឹម សុខា)។ ជាក់ស្តែង លោក សម រង្ស៊ី និងសហការី បានដើរចេញពីគោលការណ៍ និងស្មារតីដើមនៃការរួបរួម។
លោក កឹម សុខា បានសរសេរលើហ្វេសប៊ុកផ្លូវការរបស់ខ្លួននៅថ្ងៃទី២៨ ខែវិច្ឆិកានេះថា លោកសង្កេតឃើញថា រហូតមកដល់ពេលនេះ លោក សម រង្ស៊ី និងសហការីនៅតែបន្តយកឈ្មោះ និងរូបថតលោកទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញាត ឬគាំទ្រពីលោក។ លើសពីនេះទៅទៀត ជាក់ស្តែង លោក សម រង្ស៊ី និងសហការីបានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយផ្សេងៗ និងមុខតំណែងខ្លួនឯង ជាពិសេសថ្មីៗនេះ គឺការត្រលប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន។
លោក កឹម សុខា បានបញ្ជាក់ថា “ទង្វើរបស់ពួកគេសរបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះ មិនមានការគាំទ្រ ឬជាជំហររបស់ខ្ញុំឡើយ។ អាស្រ័យហេតុនេះ ខ្ញុំសូមអំពាវនាវឱ្យលោក សម រង្ស៊ី និងក្រុមខាងលើ ឈប់បំពានមកលើរូបខ្ញុំដោយការយកឈ្មោះ និងរូបថតខ្ញុំ ទៅប្រើប្រាសភ្ជាប់ជាមួយសកម្មភាពមហិច្ឆិតានយោបាយរបស់ខ្លួន ដែលធ្វើឱ្យសាធារណៈមតិជាតិ និងអន្តរជាតិមានការភ័ន្តច្រឡំ។ ខ្ញុំសូមបញ្ជាក់ផងដែរថា ខ្ញុំមិនពាក់ព័ន្ធ និងមិនទទួលខុសត្រូវចំពោះសកម្មភាពរបស់លោក សម រង្ស៊ី និងក្រុមនោះឡើយ”៕
ដោយ:ពលជ័យ