នាយកប្រតិបត្តិ Pfizer៖ វ៉ាក់សាំងប្រឆាំងនឹងវីរុសបំប្លែងថ្មី “អូមីក្រុង” អាចនឹងរួចរាល់ក្នុងរយៈពេលតិចជាង ១០០ថ្ងៃទៀត
វ៉ាស៊ីនតោន៖ ប្រធានក្រុមហ៊ុនឱសថយក្សអាមេរិក ហ្វាយហ្សឺ (Pfizer) និយាយថា ក្រុមហ៊ុនខ្លួនអាចនឹងមានវ៉ាក់សាំងថ្មីសម្រាប់ប្រឆាំងនឹងវីរុសបំប្លែងថ្មី អូមីក្រុង ក្នុងរយៈពេលតិចជាង ១០០ថ្ងៃទៀត។
នាយកប្រតិបត្តិរបស់ក្រុមហ៊ុន ហ្វាយហ្សឺ លោក អាល់ប៊ឺត ប៊ូឡា បានធ្វើការកត់សម្គាល់បែបនេះ នៅក្នុងបទសម្ភាសន៍មួយជាមួយបណ្តាញទូរទស្សន៍អាមេរិកនៅក្នុងថ្ងៃចន្ទដើមសប្តាហ៍នេះ (ម៉ោងក្នុងតំបន់)។ លោក ប៊ូឡា បន្តថា ប្រសិនបើវ៉ាក់សាំងបង្ការជំងឺកូវីដ១៩បច្ចុប្បន្នការពារតិចជាងនោះ ក្រុមហ៊ុន ហ្វាយហ្សឺ ត្រូវការបង្កើតវ៉ាក់សាំងថ្មីមួយទៀត។ លោក ប៊ូឡា បានប្រាប់ទូរទស្សន៍ CNBC ថា ក្រុមហ៊ុនរបស់លោក កាលពីថ្ងៃសុក្រសប្តាហ៍កន្លងទៅ បានចាប់ផ្តើមសាកល្បងវ៉ាក់សាំងបច្ចុប្បន្នប្រឆាំងនឹងវីរុសបំប្លែងថ្មី អូមីក្រុង ដែលគេរាយការណ៍ដំបូងនៅអាហ្វ្រិកខាងត្បូង និងបង្កការព្រួយបារម្ភអំពីរលកជាសកលនៃជំងឺកូវីដ១៩។ លោក ប៊ូឡា បាននិយាយដូច្នេះថា ខ្ញុំមិនគិតថា លទ្ធផលនឹងបង្ហាញថា វ៉ាក់សាំងនឹងមិនអាចការពារបាននោះទេ… ប៉ុន្តែការធ្វើតេស្តអាចបង្ហាញថា វ៉ាក់សាំងដែលមានស្រាប់អាចការពារតិចជាងមុន ដែលមានន័យថា យើងត្រូវបង្កើតវ៉ាក់សាំងថ្មី។
នាយកប្រតិបត្តិរបស់ក្រុមហ៊ុន ហ្វាយហ្សឺ រូបនេះបន្ថែមថា រូបលោកក៏មាន “ទំនុកចិត្តខ្ពស់”ផងដែរ ដែលថា ថ្នាំលេបប្រឆាំងនឹងមេរោគដែលទើបនឹងបញ្ចេញរបស់ ហ្វាយហ្សឺ នឹងត្រូវបានប្រើដើម្បីព្យាបាលករណីឆ្លងថ្មីៗ ដែលបង្កឡើងពីវីរុសបំប្លែងថ្មី ក្នុងនោះរួមមានទាំងវីរុស អូមីក្រុង ផងដែរ៕ ប្រភព៖ NHK និង Bangkok Post