កូនស្រីច្បងរបស់លោក កឹម សុខា ឆ្លើយតបទៅមេឧទ្ទាមក្រៅច្បាប់ និងបក្ខពួក
ភ្នំពេញៈ កូនស្រីច្បងរបស់លោក កឹម សុខា គឺកញ្ញា កឹម មនោវិទ្យា បានបង្ហោះសារនៅលើបណ្តាញសង្គមធ្វីតធ័រ (Twitter) ឆ្លើយតបទៅមេឧទ្ទាមក្រៅច្បាប់រត់ចោលស្រុក ទណ្ឌិត សម រង្ស៊ី និងបក្ខពួកថា ឪពុករបស់នាងមានសិទ្ធិបញ្ចេញមតិ ហៅដៃគូបោកប្រាស់ឱ្យបញ្ឈប់កេងចំណេញ និងបោកប្រាស់សាធារណជន។
កញ្ញា កឹម មនោវិទ្យា បានសរសេរនៅលើបណ្តាញសង្គមធ្វីតធ័រនៅថ្ងៃទី៣០ ខែវិច្ឆិកា ឆ្នាំ២០២១នេះ ជាភាសាអង់គ្លេសថា “My father #KemSokha is entitled to his opinion to call his deceitful partner to stop exploiting him & deceiving the public. The partnership was effectively over when his partner called on the party/people in #Cambodia to abandon him when he’s imprisoned & led a deceitful campaign”។ មានន័យ“ឪពុកខ្ញុំ កឹម សុខា មានសិទ្ធិបញ្ចេញមតិហៅដៃគូបោកប្រាស់ឱ្យបញ្ឈប់កេងចំណេញ និងបោកប្រាស់សាធារណជន។ ភាពជាដៃគូត្រូវបានបញ្ចប់ ដោយប្រសិទ្ធភាព នៅពេលដែលដៃគូរបស់គាត់បានអំពាវនាវឱ្យគណបក្ស/ប្រជាពលរដ្ឋនៅប្រទេសកម្ពុជា បោះបង់ចោលគាត់ នៅពេលដែលគាត់ត្រូវបានជាប់ពន្ធនាគារ និងដឹកនាំយុទ្ធនាពោរពេញដោយបោកប្រាស់»។
ចំណែកលោក មុត ចន្ថា មនុស្សជំនិតលោកកឹម សុខា បានសរសេរនៅលើហ្វេសប៊ុកកាលពីថ្ងៃទី២៩ ខែវិច្ឆិកាថា ស្របពេល ជាមួយគ្នាលោក សម រង្ស៊ី បង្ហាញពីការភ័យខ្លាចខ្លាំង បន្ទាប់ពីលោក កឹម សុខា បានប្រកាសឱ្យឈប់យកឈ្មោះ និងរូបថតគាត់ទៅប្រើប្រាស់ ដើម្បីមហិច្ឆតានយោបាយរបស់គាត់ និងក្រុមគាត់ ព្រោះអស់មានអ្វីត្រូវយកទៅកុហកអ្នកគាំទ្រទៀត។ ភ័យរហូតដោះលែងឱ្យឆ្កែកាច រួមទាំងអតីតតំណាងរាស្ត្រម្នាក់ដែលធ្លាប់លួចឆី និងយកប្រពន្ធមិត្តភក្តិ បកខាំលោក កឹម សុខា វិញ។
អ្វីដែលគួរឱ្យអស់សំណើចបំផុតនោះ គ្រាន់តែលោក កឹម សុខា ប្រកាសមិនឱ្យលោក សម រង្ស៊ី យកឈ្មោះនិងរូបថតគាត់ទៅភ្ជាប់ជាមួយសកម្មភាពខ្លួន លោក សម រង្ស៊ី ខំស្រែកស្លន់ស្លោយកលេសថា លោក កឹម សុខា កំពុងស្ថិតក្រោមសម្ពាធ និងជាចំណាប់ខ្មាំង។
ចំណែកលោក ម៉ៅ មុនីវណ្ណ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ បានសរសេរលើហ្វេសប៊ុកដែរថា គ្រាន់តែលោក កឹម សុខា ប្រកាសមិនឱ្យសម រង្សី យកឈ្មោះ និងរូបថតគាត់ទៅភ្ជាប់ជាមួយសកម្មភាពខ្លួន ហេតុអីភ័យម្លេះ ឱ្យឆ្កែខ្លួនបកខាំលោក កឹម សុខា វិញ។ ខ្លាចជីវិតនយោបាយខ្លួនចប់ ឬមួយខ្លាចដើរបោកលុយគេលែងបាន។ លោក កឹម សុខា មិនមែនជាអ្នកបំបែកឯណា គឺសម រង្ស៊ី និងបរិវាទៅបង្កើតចលនា និងវិលទៅបក្សភ្លើងទៀនវិញ នោះហើយជាអ្នកបំបែកអ្នកប្រជាធិបតេយ្យ។
សូមជម្រាបថា កាលពីនៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ លោក កឹម សុខា បានបង្ហាញនូវសំណេរដ៏គួរឱ្យភ្ញាក់ផ្អើលជាលើកដំបូងទាក់ទងនឹងសម្ព័ន្ធភាពជាមួយសម រង្ស៊ី។ លើបណ្ដាញសង្គមហ្វេសប៊ុកលោក កឹម សុខា បានសរសេរថា “ខ្ញុំសង្កេតឃើញថា រហូតមកដល់ពេលនេះ លោក សម រង្ស៊ី និងសហការីនៅតែបន្តយកឈ្មោះ និងរូបថតខ្ញុំទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញត ឬ គាំទ្រពីខ្ញុំ។ លើសពីនេះទៅទៀត ជាក់ស្តែង លោក សម រង្ស៊ី និងសហការីបានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយផ្សេងៗ និងមុខតំណែងខ្លួនឯង ជាពិសេសថ្មីៗនេះគឺការត្រលប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន។ ទង្វើរបស់ពួកគេសបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាព ទាំងអស់នេះ មិនមានការគាំទ្រ ឬជាជំហររបស់ខ្ញុំឡើយ”។
លោក កឹម សុខា បានបន្តថា “អាស្រ័យហេតុនេះ ខ្ញុំសូមអំពាវនាវឱ្យលោក សម រង្ស៊ី និងក្រុមខាងលើ ឈប់បំពានមកលើរូបខ្ញុំដោយការយកឈ្មោះ និងរូបថតខ្ញុំ ទៅប្រើប្រាសភ្ជាប់ជាមួយសកម្មភាពមហិច្ឆិតានយោបាយរបស់ខ្លួន ដែលធ្វើឱ្យសាធារណមតិជាតិ និងអន្តរជាតិមានការភ័ន្តច្រឡំ។ ខ្ញុំសូមបញ្ជាក់ផងដែរថា ខ្ញុំមិនពាក់ព័ន្ធ និងមិនទទួលខុសត្រូវចំពោះសកម្មភាពរបស់លោក សម រង្ស៊ី និងក្រុមនោះឡើយ”៕
ដោយៈពលជ័យ