សិង្ហបុរី ម៉ាឡេស៊ីសន្យាបន្តបើកព្រំដែនទៀត ទោះបីពិភពលោកកំពុងបារម្ភពីវ៉ារ្យង់អូមីក្រុងក៏ដោយ
សិង្ហបុរីនៅតែមានបំណងក្នុងការបន្តពង្រីកច្រកធ្វើដំណើរវ៉ាក់សាំង (VTL) ជាមួយម៉ាឡេស៊ីបន្ថែមទៀត ទោះបីជាអង្គការសុខភាពពិភពលោក (WHO) កំពុងតែបង្ហាញពីក្ដីបារម្ភចំពោះវីរុសកូវីដ-១៩ វ៉ារ្យង់អូមីក្រុង។ នេះបើតាមការលើកឡើងរបស់លោក លី សៀនឡុង នាយករដ្ឋមន្ត្រីសិង្ហបុរី។
លោក លី បានថ្លែងក្នុងឱកាសនៃដំណើរទស្សនកិច្ចរបស់លោក អ៊ីស្មែល សាប្រ៊ី នាយករដ្ឋមន្ត្រីម៉ាឡេស៊ីមកកាន់ប្រទេសសិង្ហបុរី។ នាយករដ្ឋមន្ត្រីទាំប្រទេសទាំងពីរបានធ្វើការសម្ពោធច្រក VTL តាមផ្លូវគោក ដោយពលរដ្ឋនៃប្រទេសទាំងពីរអាចចេញ-ចូលទៅរកគ្នាបានដោយមិនឆ្លងកាត់ការធ្វើចត្តាឡីស័ក។ យ៉ាងណាមិញ ក្នុងជំហានដំបូងអ្នកដំណើរត្រូវមានអវិជ្ជមានជំងឺកូវីដ-១៩ ២ថ្ងៃមុនចេញដំណើរ ហើយត្រូវតែធ្វើដំណើរតាមឡានក្រុង ដែលចាត់ចែងដោយប្រទេសទាំងពីរ។
«ប្រាកដណាស់ រឿងទាំងនេះអាចធ្វើឡើងបានដោយសារតែស្ថានភាពកូវីដ-១៩អំណោយផល តែយើងនៅតាមដានប្រកបដោយក្ដីព្រួយបារម្ភអំពីការវិវត្តនានារបស់វ៉ារ្យង់អូមីក្រុង»។ នេះជាការលើកឡើងរបស់លោក លី។
លោកបានបន្ថែមថា៖ «ទោះបីជាវ៉ារ្យង់អូមីក្រុងបង្អាក់ផែនការរបស់យើង គោលដៅរបស់យើងនៅតែដដែលគឺ យើងត្រូវតែបើកព្រំដែនរវាងម៉ាឡេស៊ី និងសិង្ហបុរីបន្ថែមទៀត»។
ជាមួយគ្នានេះដែរ នាយករដ្ឋមន្ត្រីនៃប្រទេសទាំងពីរបានពិភាក្សាក្នុងការបង្កើនការធ្វើដំណើរតាមជើងហោះហើរឱ្យបានកាន់តែច្រើន និងទូលាយថែមទៀត ជាមួយគ្នានេះដែរ ក្រៅពីបើកព្រំដែនតាមផ្លូវឡានក្រុង ភាគីទាំងពីរក៏សិក្សាអំពីវិធានការនានាក្នុងការបើកឱ្យឆ្លងកាត់ដោយយានយន្តឯកជន ហើយឆ្លងតាមរថភ្លើង ក៏ដូចជាសាឡាងផងដែរ៕
ប្រភព៖ CNA