ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១ រយៈ ពេល ៥០ថ្ងៃ ត្រូវបានបិទបញ្ចប់ហើយនៅថ្ងៃទី៣០ ខែវិច្ឆិកា ឆ្នាំ២០២១ នេះ ដោយបានប្រព្រឹត្តទៅដោយរលូនមិនមានបញ្ហាអ្វីកើតឡើងនោះទេ។ ក្នុងរយៈពេល ៥០ថ្ងៃ គឺមានប្រជាពលរដ្ឋជាង ៤៤ម៉ឺននាក់ បានទៅចុះឈ្មោះបោះឆ្នោតថ្មី និងលុបឈ្មោះចេញពីបញ្ជីមានចំនួនជាង ២២ម៉ឺននាក់។

អ្នកនាំពាក្យគណៈកម្មាធិការជាតិរៀបចំការបោះឆ្នោតឯកឧត្តម សោម សូរីដា បានថ្លែងនៅយប់ថ្ងៃទី៣០ ខែវិច្ឆិកានេះថា រយៈពេល ៥០ថ្ងៃ នៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២១ គឺមានប្រជាពលរដ្ឋដែលបានចុះឈ្មោះថ្មីមានចំនួន ៤៤៩.៦៩០នាក់ , ប្រជាពលរដ្ឋដែលបានលុបឈ្មោះចេញពីបញ្ជីបោះឆ្នោតមានចំនួន ២២២.៤៣៥នាក់ , អ្នកដែលបានកែតម្រូវឈ្មោះ និងទិន្នន័យក្នុងបញ្ជីបោះឆ្នោតសរុបមានចំនួន ១៨៧.៣២៣នាក់ , ប្រជាពលរដ្ឋដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ១៤៧.៩០៦នាក់។ដោយ-រ៉ាវុធ