លោក មុត ចន្ថា៖ សម រង្ស៊ី ពូកែខាងដើរប្រជុំប្រមូលស្រោមសំបុត្រ និងបង្កើតព្រឹត្តិកាណ៍និងកម្មវិធីប្រមូលលុយ
ភ្នំពេញ ៖ លោក មុត ចន្ថា នៅថ្ងៃនេះបានសរសេរថា សម រង្ស៊ី មិនបានធ្វើការទូតច្រើនដូចគាត់បានអួតទេ ប៉ុន្តែគាត់ពូកែខ្លាំងខាងដើរប្រជុំប្រមូលស្រោមសំបុត្រ និងបង្កើតព្រឹត្តិកាណ៍និងកម្មវិធីប្រមូលលុយ ដូចជា ផែនការមាតុភូមិនិវត្តន៍ លើកទី១ ៩វិច្ឆិកា២០១៩ = ៣០ម៉ឺនដុល្លារអាមេរិក, មាតុភូមិនិវត្តន៍ លើទី២ ០៤ឧសភា ២០២១ = ជាង២០ម៉ឺនដុល្លារ, លក់ប័ណ្ណនាឡិកាដៃម៉ាកកាស្យូ ជាង២៥ម៉ឺនដុល្លារ, បង្កើតចលនាសង្គ្រោះជាតិប្រមូលបានរាប់សែនដុល្លារ និងសន្និសីទពិភពនៃអ្នកគាំទ្រសង្គ្រោះជាតិប្រមូលបានលុយរាប់សិបម៉ឺនដុល្លារ។ល។ នេះបើយោងតាមបណ្ដាញសង្គមហ្វេសប៊ុករបស់លោកនៅថ្ងៃទី៧ ខែធ្នូ ឆ្នាំ២០២១នេះ។
មនុស្សជំនិតលោក កឹម សុខា រូបនេះបានបន្តថា សម រង្ស៊ី ទៅអាមេរិកបានជួបយ៉ាងច្រើនត្រឹមតែតំណាងរាស្ត្រពីររូប ប៉ុណ្ណោះ គឺលោក Alan LOWENTHAL និងលោក Steve CHABOT។ ក្រៅពីនោះដើរជួបអ្នកគាំទ្រ ដើម្បីប្រមូលស្រោមសំបុត្រ។ មានគេយល់ច្រឡំថា សមាជិកសភាតំណាងឱ្យរដ្ឋាភិបាលអាមេរិក ប៉ុន្តែតាមពិតមិនមែនដូច្នេះទេ។
លោក មុត ចន្ថា បន្តទៀតថា ចំណែកមន្ត្រីរបស់សហភាពអឺរ៉ុប និងរដ្ឋាភិបាលអឺរ៉ុប ក៏មិនឱ្យលោក សម រង្ស៊ី ជួបដូចគ្នា ដោយសារអំពើខុសច្បាប់ជាច្រើនរបស់គាត់ ដូចជា ប្រកាសប្រើប្រាស់កម្លាំង និងហិង្សា ដើម្បីផ្តួលរំលំរដ្ឋាភិបាល ជាដើម។ សូម្បីតែមន្ត្រីរដ្ឋាភិបាលបារាំង និងប្រទេសបារាំងដែលលោក សម រង្ស៊ី កំពុងរស់នៅជាអចិន្ត្រៃយ៍ក៏មិនអនុញ្ញាតឱ្យគាត់ជួបដែរ។ លោក ហុង លីម (Hong Lim) អតីតតំណាងរាស្ត្រអូស្ត្រាលីដើមកំណើតខ្មែរ បានថ្លែងប្រាប់វិទ្យុបរទេសមួយ កាលពីពេលថ្មីៗនេះថា «លោក សម រង្ស៊ី មិនបានធ្វើអ្វីជួយសោះនៅប្រទេសបារាំង»៕
ដោយៈពលជ័យ