លោក កឹម សុខា ៖ ស្រណោះអ្វីដែលបានរៀនសូត្រពីសម្តេចក្រុមព្រះនូវចំណុចល្អ ឧត្តមគតិជាតិ និងការផ្សះផ្សាជាតិ
ភ្នំពេញ ៖ លោក កឹម សុខា និងសហការីបានអញ្ជើញគោរពវិញ្ញាណក្ខន្ធព្រះសពសម្ដេចក្រុមព្រះ នរោត្តម រណឫទ្ធិ ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានគណបក្សហ្វ៊ុនស៊ិនប៉ិច និងជាអតីតនាយករដ្ឋមន្ត្រីទី១ និងជាអតីតប្រធានរដ្ឋសភានៃព្រះរាជាណាចក្រកម្ពុជា នៅកន្លែងតម្កល់ព្រះសព ស្ថិតនៅដំណាក់ព្រះអង្គវិថីសម្តេចប៉ាន់ សង្កាត់បឹងរាំងខណ្ឌដូនពេញ រាជធានីភ្នំពេញ នៅរសៀលថ្ងៃទី០៧ ខែធ្នូ ឆ្នាំ២០២១នេះ។
លោក កឹម សុខា មានប្រសាសន៍ប្រាប់ AMS បន្ទាប់ពីគោរពវិញ្ញាណក្ខន្ធព្រះសពសម្តេចក្រុមព្រះថា ៖ លោកមានការសោកស្តាយចំពោះការយាងសោយទិវង្គតរបស់សម្តេចក្រុមព្រះ នរោត្តម រណឫទ្ធិ និងមានការស្រណោះចំពោះអ្វីដែលលោកបានរៀនសូត្រពីសម្តេចក្រុមព្រះ។
លោក កឹម សុខា បានមានប្រសាសន៍យ៉ាងដូច្នេះថា៖ “ខ្ញុំធ្លាប់ជាសហការីសម្តេចក្រុមព្រះ នរោត្តម រណឫទ្ធិ។ ខ្ញុំមានការស្រណោះអ្វីដែលខ្ញុំបានរៀនសូត្រពីសម្តេចក្រុមព្រះនូវចំណុចល្អ ឧត្តមគតិជាតិ និងការផ្សះផ្សាជាតិ”។
សម្តេចក្រុមព្រះ នរោត្តម រណឫទ្ធិ ទ្រង់សោយព្រះទិវង្គតនៅប្រទេសបារាំងនាថ្ងៃអាទិត្យ ទី២៨ ខែវិច្ឆិកា ឆ្នាំ២០២១ ក្នុងព្រះជន្មាយុ៧៧ ព្រះវស្សា ដោយព្រះរោគាពាធ។ សម្តេចក្រុមព្រះ នរោត្តម រណឫទ្ធិ ទ្រង់ប្រសូតនៅថ្ងៃទី០២ ខែមករា ឆ្នាំ១៩៤៤ នៅក្រុងភ្នំពេញ។ ទ្រង់ជាបុត្រាច្បងរបស់ព្រះបាទ នរោត្តម សីហនុ និងអ្នកម្នាង ផាត់ កាញ៉ុល។
សម្តេចក្រុមព្រះ នរោត្តម រណប្ញទ្ធិ ព្រះអង្គមានព្រះរាជសុខភាពទ្រុឌទ្រោមបន្ទាប់ពីជួបគ្រោះថ្នាក់ចរាចរណ៍កាលពីប៉ុន្មានឆ្នាំមុននេះនៅផ្លូវជាតិលេខ៤ ភ្នំពេញ-ព្រះសីហនុ ខណៈដែលក្នុងឧបទ្ទវហេតុនេះ អ្នកម្នាងរបស់ព្រះអង្គ គឺអ្នកម្នាង អ៊ុក ផល្លា ទទួលមរណភាព៕
ដោយៈពលជ័យ