អ្នកភូមិលើខ្នងភ្នំគូលែនរកឃ្មុំព្រៃធម្មជាតិជួយបង្កើនជីវភាពគ្រួសារ
ខេត្តសៀមរាប៖នៅពេលដល់រដូវរងាចាប់ពីដើមខែធ្នូ រហូតដល់រដូវប្រាំងខែឧសភាស្ទើររៀងរាល់ព្រឹកលោក ហុង ពឿន និងប្រជាពលរដ្ឋចំនួនទៀត នៅភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប ក្នុងភូមិសាស្ត្រឧទ្យានជាតិព្រះជ័យវរ្ម័ននរោត្តម «ភ្នំគូលែន» បានប្រកបរបរដើររកឃ្មុំព្រៃធម្មជាតិលក់ ជួយបង្កើនជីវភាពគ្រួសារក្រៅពីការងារកសិកម្ម។
ជារៀងរាល់ព្រឹក លោក ហុង ពឿន តែងបានរៀបចំបង្វិចជាអង្ករ ម្ហូបអាហារ ឬឆ្នាំងចាន និងមិនដូច្នេះជាបាយកញ្ចប់ម្នាក់មួយស្បោងចងភ្ជាប់នឹងម៉ូតូ ជាមួយនឹងសម្ភារៈមួយចំនួនទៀត ទៅយកឃ្មុំដែលនៅទីឆ្ងាយពីភូមិលើខ្នងភ្នំ។ ឃ្មុំដែលអ្នកភូមិខ្នងភ្នំគូលែនតែងប្រាថ្នាចង់បាននោះគឺឃ្មុំចង្អេរពីព្រោះថាវាផ្តល់ទឹកច្រើនក្នុងមួយសំបុកចាប់ពី៤-១០លីត្រ ហើយទឹកឃ្មុំ១លីតអាចលក់បានក្នុងតម្លៃ ៨០០០០រៀល។
ការរកឃ្មុំតាមបែបធម្មជាតិនេះគឺត្រូវពឹងលើព្រេងសំណាង ដែលអ្នកស្រុកគិតតាមជំនឿរបស់ពួកគាត់។ ពេលខ្លះអ្នកភូមិអាចរកឃ្មុំបានត្រឡប់មកផ្ទះវិញ ជួនកាលក៏ត្រឡប់មកផ្ទះវិញដោយដៃទទេក៏មានដែរ។ នេះជាមុខរបរតពីដូនតាមករបស់អ្នកភូមិ បើទោះបីតូចតាច រកបានតាមរដូវ តែមុខរបរនេះពឹងលើធម្មជាតិ មិនចំណាយដើមទុន ហើយបានជួយបង្កើនដល់ជីវភាពមួយកម្រិតដែរ។
នៅពេលដល់រដូវធ្លាក់ខ្យល់រងារចាប់ពីខែវិច្ឆិកា ឬខែធ្នូ ជារៀងរាល់ឆ្នាំ លោក ហុង ពឿន បានចាប់ផ្តើមដើររកសំបុកឃ្មុំតាមព្រៃជាបណ្តើរៗ និងកំណត់ទុកកន្លែងនោះ រង់ចាំសំបុកឃ្មុំមានអាយុគ្រប់ល្មម អាចកាច់ក្បាលទឹកបាន លោក ហុង ពឿន ឡើងយកភ្លាមតែម្តង។
លោក ហុង ពឿន សព្វថ្ងៃមានអាយុ ៣៧ ឆ្នាំ ហើយបានចេះរកឃ្មុំនៅតាមព្រៃនេះតាំងតែពីវ័យក្មេង។ ការរកឃ្មុំធម្មជាតិនេះពិតជាមិនងាយស្រួលទេគឺសត្វឃ្មុំភាគច្រើនវាតែងនៅលើដើមឈើខ្ពស់ៗ ឬពេលខ្លះក្នុងល្អាងភ្នំ។ បើនៅតាមដើមឈើវិញឃ្មុំច្រើនធ្វើសំបុកនៅតាមដើមឈើធំៗ ដែលមានកម្ពស់ចាប់ពី១៥-៤០ម៉ែត្រ ដែលចាំបាច់ត្រូវដាក់បង្អោង ឬដាក់ខ្សែប្រតោងឡើង។ លោក ហុង ពឿន បានបញ្ជាក់ថាធ្លាប់ធ្លាក់ពីលើដើមឈើរងរបួស ចំនួន៤ទៅ៥ដងរួចមកហើយ។
លោក ឈឿម តាំង មេឃុំខ្នងភ្នំ បានឱ្យដឹងថាអាជ្ញាធរបានលើកទឹកចិត្តដល់ការប្រមូលផលទឹកឃ្មុំប្រកបដោយនិរន្តរភាពដោយចៀសវាងការបរិភោគកូនឃ្មុំ និងមិនត្រូវសម្លាប់សត្វឃ្មុំដោយប្រើភ្លើងឬថ្នាំសម្លាប់សត្វល្អិតទៅប្រើប្រាស់ ដែលអាចឈានទៅបាត់បង់ពូជឃ្មុំព្រៃនៅថ្ងៃខាងមុខ។
មេឃុំរូបនេះបានបញ្ជាក់បន្ថែមថាប្រជាសហគមន៍បច្ចុប្បន្នបានឈប់កាប់ព្រៃ បរបាញ់សត្វដូចមុនទៀតហើយ។ អ្នកភូមិបានយល់ដឹងនិងនាំគ្នាចូលរួមថែរក្សាការពារបរិស្ថាន និងចេះធ្វើអនាម័យក្នុងសហគមន៍ ដើម្បីការរស់នៅប្រកបដោយចីរភាព និងទាក់ទាញភ្ញៀវទេសចរថែមទៀតផង។
សូមរំលឹកថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា បានគាំទ្រសហគមន៍តំបន់ការពារធម្មជាតិចំនួនពីរគឺសហគមន៍ព្រៃធំពពេល និងសហគមន៍ព្រៃធំអន្លង់ធំនៅឧទ្យានជាតិ ព្រះជ័យវរ្ម័ន-នរោត្តម«ភ្នំគូលែន» លើផ្នែកទេសចរណ៍ធម្មជាតិ ក្នុងនោះមានការងារបដិសណ្ឋារកិច្ច ការនាំភ្ញៀវ និងការការពារនិងអភិរក្សធនធានធម្មជាតិជាដើម។ លើសពីនេះគម្រោងក៏ជួយឲ្យមានកំណើនជីវភាពប្រជាសហគមន៍តាមរយ:បង្កើនការចិញ្វឹមសត្វជ្រូកកណ្តុរ ការចិញ្ចឹម មាន់និងឃ្មុំព្រៃផងដែរ៕
ដោយ៖ម៉ាដេប៉ូ