ក្រសួងធនធានទឹក បន្តបង្ហាញលទ្ធផល នៃការត្រួតពិនិត្យបង្គោលនិងការបោះបង្គោលនៅក្នុងដែនព្រៃលិចទឹកនៃតំបន់ទន្លេសាបជុំវិញខេត្តទាំង៦

នៅថ្ងៃទី២៤ ខែធ្នូ ឆ្នាំ២០២១ ក្រសួងធនធានទឹក និងឧតុនិយម បានបន្តបង្ហាញលទ្ធផលនៃការងារចុះត្រួតពិនិត្យបង្គោល ការលើកបង្គោល និងការដាំបង្គោលឡើងវិញនៅតំបន់បឹងទន្លេសាបជុំខេត្តទាំង៦ ក្រោមការដឹកនាំ និងបញ្ជាផ្ទាល់ពីលោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម។

យោងតាមរបាយការណ៍របស់ក្រសួងធនធានទឹក ដែលបណ្តាញព័ត៌មាន Fresh News ទទួលបាននៅថ្ងៃនេះ បានបង្ហាញថា ក្រុមការងារអាជ្ញាធរទន្លេសាប និងមន្ទីរធនធានទឹក និងឧតុនិយមនៅខេត្តទាំង៦ ជុំវិញបឹងទន្លេសាប សហការណ៍ជាមួយអាជ្ញាធរមូលដ្ឋាន សម្រេចបានការបោះបង្គោលព្រំតំបន់៣ និងលើកប៉ាណូ គិតមកដល់ថ្ងៃទី២៣ ខែធ្នូ ឆ្នាំ២០២១ រួមមាន៖

*ទី១៖ បានចុះពិនិត្យទីតាំងបង្គោលបានចំនួន៦៧៤ លើ៨០២បង្គោល (យោងអនុក្រឹត្យលេខ១៩៧) ស្មើនឹង៨៤%
*ទី២៖ ក្រុមការងារបានលាបថ្នាំ លើក្បាលបង្គោល លើកតម្រង់បង្គោល និងដាំបង្គោលថ្មី បានចំនួន៣៧៣ ស្មើនឹង ៤៦,៥%នៃបង្គោលសរុប
*ទី៣៖ ចំនួនបង្គោលបានចុះពិនិត្យដល់ទីតាំង ដែលបានបាត់ និងលិចក្នុងទឹកមាន ៣០១បង្គោល ស្មើនឹង ៣៧,៥% នៃបង្គោលសរុប។ បង្គោលទាំងនេះ កំពុងដាំជាបណ្តើរៗ ឯបង្គោលមួយចំនួនទៀតនឹងបន្តដាំនៅពេលទឹកស្រក
*ទី៤៖ រីឯបង្គោល កំពុងបន្តចុះពិនិត្យមាន១២៨បង្គោល ស្មើនឹង១៦,០% នៃបង្គោលសរុប
*ទី៥៖ ការងារលើប៉ាណូ សម្រេចបាន ចំនួន២៨កន្លែង លើផែនការ៥២កន្លែង។

សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីថ្មីៗនេះ បានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើការទប់ស្កាត់ និងបង្រ្កាបជាបន្ទាន់ចំពោះ ការលួចកាប់ព្រៃលិចទឹក និងវាទទីយកដីនៅតាមបឹងទន្លេសាប ជាពិសេសនៅខេត្តកំពង់ឆ្នាំងតែម្តង។ សម្តេចតេជោនាយករដ្ឋមន្រ្តី ក៏បានបញ្ជាទៅឧបនាយករដ្ឋមន្ត្រី ជា សុផារ៉ា ឱ្យដឹកនាំកិច្ចប្រជុំក្រសួងស្ថាប័នពាក់ព័ន្ធនេះ ដើម្បីបែងចែកភារកិច្ច ក្នុងការចុះពិនិត្យ បង្ក្រាប និងរឹបអូសដីដែលបានកាប់ទន្ទាននោះមកវិញ។

ក្រោយមានបទបញ្ជារបស់សម្តេចតេជោ ហ៊ុន សែន, លោកឧបនាយករដ្ឋមន្រ្តី ជា សុផារ៉ា បានដឹកនាំក្រុមការងារជំនាញ និងអាជ្ញាធរថ្នាក់ក្រោមជាតិនៃខេត្តជុំវិញបឹងទន្លេចុះពិនិត្យភ្លាមៗ ពីស្ថានភាពដែនដីព្រៃលិចទឹក ដែលរងការកាប់ទន្ទ្រានពីសំណាក់ប្រជាពលរដ្ឋ និងក្រុមឈ្មួញមួយចំនួន រហូតទទួលបានលទ្ធផល ដោយអ្នកដែលបានកាន់កាប់ខុសច្បាប់ទាំងនោះ បានប្រគល់ដីជូនរដ្ឋវិញជាបន្តបន្ទាប់ផងដែរ។

ទន្ទឹមគ្នានេះ លោកឧបនាយករដ្ឋមន្រ្តី ជា សុផារ៉ា ក៏បានចេញសេចក្តីសម្រេចបែងចែកភារកិច្ចជូនក្រសួងស្ថានប័ន និងអាជ្ញាធរជុំវិញបឹងទន្លេសាប ដើម្បីធ្វើការទប់ស្កាត់ និងបង្ក្រាបការកាប់ទន្ទ្រានដីព្រៃលិចផងដែរ។ នៅក្នុងសេចក្តីសម្រេចនោះ លោកឧបនាយករដ្ឋមន្រ្តី ក៏បានប្រគល់ភារកិច្ចជូនក្រសួងធនធានទឹក និងឧតុនិយម ទទួលដាំបង្គោលព្រំដែនព្រៃលិចទឹកដែលខ្វះ និងដែលបានដួលរំលំ និងដាក់ពាក្យសុំចុះបញ្ជីដីរដ្ឋ នូវដីព្រៃលិចតំបន់ទន្លេសាប។

ក្រោយទទួលភារកិច្ចនេះ លោក លឹម គានហោ រដ្ឋមន្រ្តីក្រសួងធនធានទឹក និងជាប្រធានអាជ្ញាធរទន្លេសាប បានចាត់ចែងក្រុមការងារភ្លាមៗតាមមុខព្រួញចុះអនុវត្តការងារនេះរហូតទទួលបានលទ្ធផលល្អប្រសើរ ដោយបានចុះពិនិត្យបង្គោល និងបានដាំឡើងវិញជាច្រើនដើមផងដែរ៕

ads banner