វៀតណាមផ្ទះបណ្តែតទឹកថាចង់ទៅស្រុក តែរដ្ឋាភិបាលវៀតណាមមិនឱ្យចូល
បញ្ហាជនអន្តោប្រវេសន៍ខុសច្បាប់វៀតណាម ដែលរស់នៅតាមដងទន្លេសាប និងទន្លេបាសាក់ដែលត្រូវបានអាជ្ញាធររាជធានីតម្រូវឱ្យឡើងគោក និងត្រូវបានក្រុមនិគមវៀតណាមជាច្រើនគ្រួសារក៏មានបំណងវិលទៅប្រទេសកំណើតរបស់ខ្លួនវិញ ដោយខ្លះបានចុះទៅតាមទន្លេមេគង្គក្រោម ទៅដល់ច្រកក្អមសំណរ និងច្រកកោះរកា ។ ទោះបីជាបែបណា ត្រូវបានកម្លាំងព្រំដែនវៀតណាមមិនអនុញ្ញាតឱ្យចូលទៅក្នុងប្រទេសវៀតណាមនោះទេ ។ ដោយសារតែការរស់នៅបែបទៅមុខមិនរួច ថយក្រោយមិនរួចបានធ្វើឱ្យជនអន្តោប្រវេសន៍ខុសច្បាប់វៀតណាមចំនួន៥៤គ្រួសារ ដែលមានសមាជិកជិត៣០០នាក់ ដែលកំពុងសុំជ្រកកោន ស្នាក់នៅបណ្ដោះអាសន្ននៅស្រុកលើកដែក ក្នុងទន្លេមេគង្គក្រោមបានស្នើទទូចឱ្យជួយពួកគេបានទៅរស់នៅប្រទេសរបស់ខ្លួនវិញ ។
នៅថ្ងៃទី២២ ខែធ្នូ ឆ្នាំ២០២១ ឯកឧត្តមគង់ សោភ័ណ្ឌ អភិបាលខេត្ត អមដោយក្រុមមន្ត្រីនានាបានសួរសុខទុក្ខ និងចង់ដឹងពីការរស់នៅ និងការលំបាកទាំងឡាយរបស់ពួកគាត់ ហើយក៏បានសួរពីបំណងដែលចង់រស់នៅកម្ពុជា ឬចង់ទៅនៅវៀតណាមវិញ ? ជាចម្លើយស្របគ្នារបស់ជនជាតិវៀតណាមទាំងអស់ គឺពួកគាត់ប្រាថ្នាចង់ទៅរស់នៅស្រុកកំណើតនាប្រទេសវៀតណាមវិញ ប៉ុន្តែ ពួកគាត់មិនអាចទៅរួច និងត្រូវបានរារាំងដោយភាគីព្រំដែនវៀតណាម ទើបពួកគាត់ទាល់ច្រកក៏សុំស្នាក់នៅ លើផ្ទះបណ្ដែតទឹកបណ្ដោះអាសន្ននៅឃុំក្អមសំណរ ស្រុកលើកដែក ខេត្តកណ្ដាល ។ នាឱកាសនោះឯកឧត្តម គង់ សោភ័ណ្ឌ បានផ្ដាំផ្ញើដល់ជនជាតិវៀតណាមទាំងអស់ ត្រូវថែទាំសុខភាពឱ្យបានល្អ រស់នៅប្រកបដោយអនាម័យ អនុវត្តន៍តាមវិធានការ «៣កុំ និង៣ការពារ» ដើម្បីការពារខ្លួននិងគ្រួសារពីជំងឺកូវីដ-១៩ ព្រមទាំងបានផ្ដល់អំណោយមួយចំនួនដល់ជនជាតិវៀតណាមផង
ដែរ ។
ក្រោយពិនិត្យស្ថានភាពជនជាតិវៀតណាមរួចមក ឯកឧត្តមអភិបាលខេត្ត បានដឹកនាំក្រុមមន្ត្រីបន្តសួរសុខទុក្ខ កងកម្លាំងកំពុងប្រចាំការនៅតាមបន្ទាត់ព្រំដែនកម្ពុជា-វៀតណាម នៅប៉ុស្តិ៍នគបាលការពារព្រំដែនបាក់ណាម និងច្រកទ្វារព្រំដែន ព្រែកជ្រៃ-ព្រែកទន្លា ស្ថិតនៅភូមិខ្នាតាំងយូរ ឃុំព្រែកជ្រៃ ស្រុកកោះធំផងដែរ ។ ក្រុមផ្ទះបែត្រីជនជាតិវៀតណាម ដែលបានបណ្តែតខ្លួនតាមដងទន្លេមេគង្គក្រោម ចេញពីរាជធានីភ្នំពេញ មកជាប់គាំងនៅក្បែរច្រកទ្វារព្រំដែនអន្តរជាតិក្អមសំណរ នៃស្រុកលើកដែក ខេត្តកណ្តាល និងច្រកទ្វារព្រំដែនអន្តរជាតិកោះរកា នៃស្រុកពាមជរ ខេត្តព្រៃវែង នាពេលកន្លងមកដល់ពេលបច្ចុប្បន្ននេះ គឺកំពុងស្ថិតនៅទីតាំងដដែល មិនបានបំលាស់ទីទៅណាទៀតនោះទេ ហើយចំនួនផ្ទះបណ្តែតទឹកនេះក៏នៅរក្សាដដែលផងដែរ ប៉ុន្តែចំនួនមនុស្សមានការប្រែប្រួលខ្លាំង គឺបាត់មនុស្សអស់ច្រើន ។
ប្រភពព័ត៌មានដដែលនេះ បានឱ្យដឹងទៀតថា កាលពីពេលដែលចុះមកដល់ក្បែរព្រំដែនដំបូង ផ្ទះបែត្រីទាំងអស់មាន ចំនួន១១៦បែ គឺខាងក្អមសំណរ៨០បែ និងកោះរកា៣៦បែ និងមានមនុស្សសរុបប្រមាណជាង១០០០នាក់ ដោយគោលបំណង គឺចង់ឆ្លងព្រំដែនចូលទៅប្រទេសវៀតណាម ដែលជាស្រុកកំណើតរបស់ខ្លួន ។ ប៉ុន្តែភាគីខាងវៀតណាមបានបិទព្រំដែន មិនព្រមទទួលយកប្រជាជនខ្លួនឱ្យចូលប្រទេសវិញ ដោយឈរលើហេតុផល វិបត្តិកូវីដនោះ ទើបធ្វើឱ្យមនុស្សទាំងអស់នៅលើផ្ទះបែត្រី ត្រូវជាប់គាំងនៅមួយកន្លែង ។
ទោះជាបែបនេះក្តី ជនជាតិវៀតណាមទាំងនោះនៅតែចិញ្ចឹមចិត្ត ចង់ឆ្លងព្រំដែនចូលទៅប្រទេសរបស់ខ្លួនវិញឱ្យទាល់តែបាន ទើបពួកគេបានបន្តរស់នៅលើផ្ទះបណ្តែតទឹក នៅក្បែរច្រកទ្វារព្រំដែនទាំង២ អស់រយៈពេលជាច្រើនខែ ចាប់ពីខែមិថុនា ឆ្នាំ២០២១មក ប៉ុន្តែបំណងមួយនេះនៅតែមិនបានសម្រេចធ្វើឱ្យពួកគេជួបប្រទះនៅបញ្ហាដាច់ស្បៀង ទើបបង្ខំចិត្តឱ្យពួកគេត្រូវជិះទូកតូចៗវិលត្រឡប់ទៅកាន់ទីកន្លែងចាស់វិញ គឺមកពីកន្លែងណាត្រឡប់ទៅកន្លែងនោះវិញ ដើម្បីប្រកបរបរចិញ្ចឹមជីវិត និងផ្ញើថវិកាក៏ដូចជាស្បៀងអាហារ មកឱ្យអ្នកដែលនៅដេកចាំលើផ្ទះបណ្តែតទឹកនៅក្បែព្រំដែននេះ ។ ប្រភពព័ត៌មានពីអាជ្ញាធរមូលដ្ឋាននៃស្រុកទាំងពីរ បានឱ្យដឹងថា បច្ចុប្បន្ននេះ មនុស្សនៅលើផ្ទះបែត្រីទាំងនោះ គឺមានប្រមាណតែជាង១០០នាក់ប៉ុណ្ណោះ គឺពួកគេនៅដេកចាំបែត្រី ។
ក្នុងដំណើរទស្សនកិច្ចរបស់ឯកឧត្តម ង្វៀន សួនហ្វុ៊ក ប្រធានរដ្ឋវៀតណាម កាលពីពេលថ្មីៗនេះ ក្នុងសេចក្តីថ្លែងការណ៍រួមកម្ពុជា-វៀតណាម នៅចំណុចទី១០ បានសរសេរថា ឯកឧត្តម ង្វៀន សួនហ្វុ៊ក បានសម្តែងនូវអំណរគុណចំពោះព្រះរាជាណាចក្រកម្ពុជា សម្រាប់ការបន្តឧបត្ថម្ភគាំទ្រ និងការអនុវត្តដោយគ្មានការរើសអើងចំពោះប្រជាជនដើមកំណើតវៀតណាម រស់នៅប្រទេសកម្ពុជានាពេលកន្លងមក ។ ដោយឡែកចំពោះបញ្ហាខាងលើនេះមិនមានការសម្រេចចិត្តបែបណាឡើយ ។ មន្ត្រីនៃអាជ្ញាធររាជធានីភ្នំពេញបាននិយាយថា មិនមែនជាការបណ្តេញជនជាតិវៀតណាមដោយសារតែមានការរើសអើងនោះទេ តែជាការតម្រូវឱ្យពួកគេឡើងគោក និងមិនអនុញ្ញាតឱ្យរស់នៅបែបអនាធិបតេយ្យតាមដងទន្លេតទៅទៀតទេ ព្រោះវាបានប៉ះពាល់បរិស្ថានធ្ងន់ធ្ងរណាស់ ហើយការតម្រូវឱ្យឡើងគោកនេះ ខាងខេត្តកំពង់ឆ្នាំងក៏បានអនុវត្តមុនរាជធានីភ្នំពេញ ទៅទៀត ហើយអាជ្ញាធរខាងស្រុកល្វាឯម ក៏បានតម្រូវឱ្យនិគមន៍ជនវៀតណាមឡើងគោកដែរ ។
តែដោយសារពួកគេមិនមានលទ្ធភាពក៏យកឱកាសនៃការចាកចេញក៏បានព្យាយាមបណ្តែតផ្ទះបែត្រីរបស់ខ្លួនឆ្ពោះទៅកាន់ច្រកព្រំដែន ។ អ្វីដែលស្មុគស្មាញនាពេលនេះគឺ ជនជាតិវៀតណាមទាំងនោះត្រូវបានទាហានព្រំដែនវៀតណាមមិនអនុញ្ញាតឱ្យចូលទៅកាន់ប្រទេសខ្លួនវិញនោះទេ ពោលគឺអាជ្ញាធរវៀតណាមនៅតែមិនឱ្យជនជាតិខ្លួនឯងចូលទៅរស់នៅឡើយ ៕