ប្រជាពលរដ្ឋរស់នៅតាមដងស្ទឹងសែន បង្កើនជីវភាពគ្រួសារជាមួយមុខរបរផលិតត្រីឆ្អើរ
ខេត្តកំពង់ធំ៖នៅរដូវធ្លាក់ខ្យល់ ទឹកស្រក ត្រីចាប់ផ្តើមសម្បូរ ប្រជាពលរដ្ឋនៅសហគមន៍ទួលនាងសាវផ្លូវលួង ស្ថិតនៅក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ លើដងស្ទឹងសែនបាន នាំគ្នាទៅរកត្រីតាមរយៈឧបរណ៍ប្រពៃណី ដូចជាដាក់មង បង់សំណាញ់ ជាដើម ដើម្បីផលិតជាត្រីឆ្អើរ។ មុខរបរនេះ បានបន្តតាំងតែដូនតាមក ហើយបានបង្កើនជីវភាពប្រជាជននៅក្នុងតំបន់មកដល់ពេលបច្ចុប្បន្ន។
ប្រជាពលរដ្ឋនៅក្នុងឃុំផាត់សណ្តាយនេះ ប្រកបការងារចំបងគឺកសិកម្ម និងនេសាទសម្រាប់ចិញ្ចឹមជីវភាពនិងលក់ទៅទីផ្សារ។ ដោយឡែកមុខរបរធ្វើត្រីឆ្អើរ ជាលក្ខណៈគ្រួសារ បានចូលរួមចំណូលបន្ថែមទៀតតាមលទ្ធភាពគ្រួសារនីមួយៗ។
សមាជិកគ្រួសារសហគមន៍ទួលនាងសាវផ្លូវលួង រស់នៅដាច់ៗគ្នាតាមដងស្ទឹងសែនជាប់បឹងទន្លេសាប ។ ក្នុងរដូវនេះ ពួកគាត់ភាគច្រើនកំពុងមមាញឹកក្នុងការដាក់មងយកត្រី អ្នកខ្លះកំពុងធ្វើត្រី ខ្លះដោតត្រីចូលចង្កាក់ និងខ្លះទៀតកំពុងឆ្អើរត្រី។
អ្នកស្រី ផឹម ផល សមជិកមួយរូបនៃសហគមន៍ទួលនាងសាវផ្លូវលួង បានបញ្ជាក់ថា ត្រីដែលយកមកធ្វើត្រីឆ្អើរនេះមានប្រភេទ ត្រីរៀល ត្រីកែស ត្រីចង្វារ ត្រីក្លាំងហាយ ត្រីកញ្ចុះ ត្រីត្រឱន ត្រីកន្ទុយក្រហម និងត្រីលិញជាដើម។ គ្រួសារអ្នកស្រី បានទៅរាយមងចាប់បានតាមដងស្ទឹងសែន និងមានមួយចំនួនទៀត បានទិញពីអ្នកភូមិ ដើម្បីផលិតជាត្រីឆ្អើរសម្រាប់លក់ចេញទៅកាន់ទីផ្សារនានា។
ស្ត្រីដែលប្រកបរបរធ្វើត្រីឆ្អើរលក់មិនតិចជាង២០ឆ្នាំមកហើយរូបនេះបានដឹងថាបច្ចុប្បន្ននេះ ត្រីឆ្អើរដែលអ្នកស្រីធ្វើបានក្នុង១ថ្ងៃៗចាប់ពី២០គីឡូក្រាមទៅជាង១០០គីឡូក្រាម គឺទៅតាមថ្ងៃណាដែលមានត្រីតិចឬច្រើន។ ក្រៅពីធ្វើត្រីឆ្អើរគាត់ក៏ធ្វើប្រហុក ផ្អក និងត្រីងៀតសម្រាប់ទុកលក់ផងដែរ។សម្រាប់ត្រីឆ្អើរជាត្រីចង្វារមូល អាចលក់បានមួយចង្កាក់ ១៥០០រៀលនិងបើត្រីធំៗជាងនេះ លក់មួយចង្កាក់ចាប់ពី២០០០-៥០០០រៀល។
អ្នកស្រី ផឹម ផល បានបញ្ជាក់បន្ថែមថា គាត់មានកូន៦នាក់ សុទ្ធតែប្រកបរបរនេសាទ។សម្រាប់មុខរបរធ្វើត្រីឆ្អើរលក់ អាចជួយទ្រទ្រង់ជីវភាពគ្រួសារបានល្អប្រសើរ ហើយបានបញ្ជូនកូនគាត់ទៅរៀនបានខ្ពស់ និងចែកផ្ទះសម្បែងជូនកូនៗថែមទៀត។
ដោយឡែក លោក ម៉ុក ឃឿន អនុប្រធានសហគមន៍ទួលនាងសាវផ្លូវលួង បានឱ្យដឹងថាបច្ចុប្បន្នប្រជាពលរដ្ឋនៅសហគមន៍នេះមានចំនួន២៧៧គ្រួសារ និងមានប្រជាពលរដ្ឋប្រមាណ៨០ភាគរយហើយប្រកបរបរនេសាទ។ប្រជាពលរដ្ឋដែលអាស្រ័យផលទៅលើនេសាទនេះភាគច្រើនប្រកបរបរធ្វើត្រីឆ្អើរ ផ្អក ប្រហុកលក់សម្រាប់ចិញ្ចឹមជីវិត។
លោកបានឱ្យដឹងបន្ថែមថា ដើម្បីអភិរក្សត្រីឱ្យគង់វង្សនោះសហគមន៍បានធ្វើការបែងចែកតំបន់ឱ្យពលរដ្ឋរកត្រីដែលតំបន់ខ្លះសហគមន៍កំណត់មិនឱ្យរកតែម្តង ដើម្បីរក្សាពូជត្រី តំបន់ខ្លះអាចរកបានតាមរដូវ និងតំបន់ខ្លះទៀតពលរដ្ឋអាចរកបានប្រចាំថ្ងៃសម្រាប់ចិញ្ចឹមជីវិត។ការបែងចែកនេះសំដៅធ្វើយ៉ាងណាឱ្យរក្សាពូជត្រីឱ្យបានគង់វង្ស។ក្រៅពីនេះចំពោះការនេសាទខុសច្បាប់ក៏ត្រូវបានលប់បំបាត់ដែរ។
ពាក់ព័ន្ធក្នុងរឿងនេះ លោក ហេង មនោ មេឃុំផាត់សណ្តាយ ស្រុកកំពង់ស្វាយ ខេត្តកំពង់ធំបានឱ្យដឹងថា ការធ្វើត្រីឆ្អើររបស់ប្រជាពលរដ្ឋធ្វើឡើងតាមរដូវកាល ហើយសម្បូរតែខែ១១ដល់ខែ២ប៉ុណ្ណោះ។ ដល់រដូវប្រាំងពុំអាចរកត្រីបានទៀតទេ។ ពួកគាត់បានប្រមូលផលពីការនេសាទហើយយកត្រីទាំងនោះ មកឆ្អើរទុកលក់និងបរិភោគខ្លួនឯង ព្រោះការធ្វើបែបនេះអាចរក្សាទុកបានយូរ។
លោកប្រធានក្រុមប្រឹក្សាឃុំរូបនេះ បានលើកឡើងឱ្យដឹងបន្ថែមថា បច្ចុប្បន្នពលរដ្ឋបានយល់ដឹងច្រើនក្នុងការចូលរួមថែរក្សាធនធានធម្មជាតិ ដូចជាពួកគាត់បានចូលរួមអភិរក្សត្រី ចេះស្រឡាញ់បរិស្ថាន និងសម្អាតអនាម័យតាមដងស្ទឹងធ្វើឱ្យអាចទាក់ទាញភ្ញៀវទេសចរចូលកមកម្សាន្តតំបន់នេះបន្តបន្ទាប់។
គួរបញ្ជាក់ថាវិធីធ្វើត្រីឆ្អើរគឺគេត្រូវយកត្រីស្រស់ដែលនេសាទបាននោះមកកាត់ក្បាល ឬមិនកាត់ក៏បានទៅតាមប្រភេទត្រី ហើយត្រូវវះពោះយកខ្លាញ់ត្រីចេញ រួចហើយយកទៅលាងសម្អាតទឹកចេញទើប គេចាប់ផ្ដើមយកត្រីទាំងនោះទៅដោតជាមួយឬស្សីធ្វើជាចង្កាក់ងាយស្រួលក្នុងការឆ្អើរ។ ចំពោះការឆ្អើរទៀតសោត គេដុតភ្លើងពីក្រោមតិចៗ រហូតដល់ត្រីក្រៀមល្អសព្វកន្លែងទើបគេប្រមូលវាទុក។
សម្រាប់ត្រីឆ្អើរគេអាចធ្វើម្ហូបបានច្រើនមុខដូចជា បុកទឹកគ្រឿងត្រីឆ្អើរ, បុកត្រីឆ្អើរអំពិលទុំ, ញាំត្រីឆ្អើរ, ប្រហើរត្រីឆ្អើរនិងអាចចម្អិនជាសំឡម្ជូរត្រីឆ្អើរជាដើម៕ដោយ៖ម៉ាដេប៉ូ
