អ្នកនាំពាក្យស្ថានទូតអាមេរិកបញ្ជាក់ថា ស្ដង់ដារសញ្ញាបត្ររបស់សាលាអាម៉េរិកមិនមានការបែងចែកស្ដង់ដារកម្រិតអ្វីទេ!
ភ្នំពេញ៖ អ្នកនាំពាក្យស្ថានទូតអាម៉េរិកប្រចាំកម្ពុជាលោក Chad Roedemeierបានបញ្ជាក់ថា បញ្ហាសញ្ញាបត្រលោក ហ៊ុន ម៉ាណែត ត្រូវបានសាលាទាហានអាមេរិក West Pointបកស្រាយរួចហើយកាលពី ឆ្នាំ២០១៩ ដែលមានន័យថាស្ដង់ដារសញ្ញាបត្ររបស់សាលាអាមេរិកមិនមានការបែងចែកស្ដង់ដារកម្រិត២ឬសញ្ញាបត្រយោគយល់អ្វីទេ។នេះបើតាមការឆ្លើយតបនឹងសារអេឡិចត្រូនិកអ៊ីម៉ែលរបស់បណ្តាញសារព័ត៌មាននៅព្រឹកថ្ងៃទី៦ខែមករាឆ្នាំ២០២២។
ប្រភពដដែលបានសរសេរថា លោក Chad Roedemeier បានបញ្ជាក់ថា ស្ថានទូតមិនអាចឆ្លើយតបរឿងសញ្ញាបត្រជំនួសសាលារបស់អាមេរិកនោះទេ តែលោកថា ករណីសញ្ញាបត្ររបស់លោក ហ៊ុន ម៉ាណែត ត្រូវបានសាលា West Point បកស្រាយរួចហើយកាលពីខែតុលា ឆ្នាំ២០១៩ ដែលពេលនោះប្រធានផ្នែកកិច្ចការសាធារណៈ និងទំនាក់ទំនងនៅសាលាបណ្ឌិត្យសភាយោធាអាមេរិក West Point លោក Christopher Ophardt បានបញ្ជាក់កាលពីខែតុលា ឆ្នាំ២០១៩ថា ការអនុញ្ញាតដល់សិស្សអន្តរជាតិបានមកសិក្សានៅសាលាបណ្ឌិតសភាអាមេរិក West Point គឺជាគំនិតផ្ដួចផ្ដើមរបស់ក្រសួងការបរទេសនិងក្រសួងការពារជាតិអាមេរិក។របៀបនៃជ្រើសរើសការសិក្សា និងបណ្ដុះបណ្ដាលយោធាគឺដូចគ្នាទៅនឹងសិស្សជនជាតិអាមេរិកដូចគ្នា។ គ្មានការបែងចែកសិស្សកម្រិត២ ឬសិស្សទទួលបានការយោគយល់នោះទេ។
គួររំលឹកថា កាលពីព្រឹកថ្ងៃទី៥ ខែមករាម្សិលមិញ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានស្នើដល់ឯកអគ្គរដ្ឋទូតអាម៉េរិកប្រចាំកម្ពុជាលោក ផាទ្រិក មូរផៃ(Patrick Murphy) ឱ្យជួយបកស្រាយករណីដែលមានការលើកឡើងថាសញ្ញាបត្រដែលនិស្សិតកម្ពុជាទទួលបានពីអាម៉េរិកគឺជាសញ្ញាបត្រកម្រិត២ ឬជាសញ្ញាបត្រយោគយល់។
ការស្នើនេះបន្ទាប់ពីការវាយប្រហារលើសញ្ញាបត្រដែលកូនប្រុសរបស់សម្ដេចតេជោ គឺលោក ហ៊ុន ម៉ាណែត ។ទណ្ឌិត សម រង្ស៊ី លើកឡើងមកវាយប្រហារជានិច្ចជាកាល។ពិសេសកាលពីពេលថ្មីៗនេះបន្ទាប់ពីលោក ហ៊ុន ម៉ាណែត ត្រូវបានប្រកាសជាបេក្ខភាព នាយករដ្ឋមន្ត្រី នៅអនាគតនៃគណបក្សប្រជាជនកម្ពុជា។
គួរបញ្ជាក់ថា កាលពីថ្ងៃទី២៥ ខែធ្នូឆ្នាំ២០២១ កន្លងទៅទណ្ឌិត សម រង្ស៊ី បានផ្ដល់បទសម្ភាសន៍ជាមួយសារព័ត៌មានបរទេសដែលផ្សាយជាភាសាខ្មែរដោយបានលើកឡើងថាសញ្ញាបត្រដែលលោក ហ៊ុន ម៉ាណែត ទទួលបានទាំងពីសាលាបណ្ឌិតយោធា West Point និងសាកលវិទ្យាល័យញូវយ៉ករបស់សហរដ្ឋអាមេរិក និងសញ្ញាបត្រពីសាកលវិទ្យាល័យប្រ៊ីសស្ដូលនៅចក្រភពអង់គ្លេសគឺជាសញ្ញបត្រប្រភេទ២ ឬសញ្ញាបត្រយោគយល់។
បន្ទាប់មកដើម្បីការពារលើសញ្ញាបត្រនេះ លោក ហ៊ុន ម៉ាណែត បានប្រកាសហៅទណ្ឌិត សម រង្ស៊ី ភ្នាល់គ្នាដាក់«ជីវិតនយោបាយ» ប្រសិនជា សម រង្ស៊ី អាចរកភស្ភុតាងបញ្ជាក់ថាលោកទទួលបានសញ្ញាបត្រប្រភេទ២ ឬសញ្ញាបត្រយោគយល់ដូចដែល សម រង្ស៊ី អះអាងមែន។ ទោះជាយ៉ាងណាក្រោយរង់ចាំពីការភ្នាល់ពីរថ្ងៃដោយគ្មានការឆ្លើយតប លោក ហ៊ុន ម៉ាណែត បានដាក់បន្ថែមមួយទៀតដោយស្នើឱ្យទណ្ឌិត សម រង្ស៊ី ឈប់ធ្វើនយោបាយទៅព្រោះលោក សម រង្ស៊ី គ្មានភាពក្លាហានជាពលរដ្ឋគំរូឡើយ៕ដោយៈពលជ័យ
