ឧកញ៉ា ប៉ែន នួន ត្រូវបានបញ្ជួបដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ.ឆបោក នឹងរំលោភលើទំនុកចិត្ត
លោក ម៉ែន វណ្ណៈ អនុប្រធាន និងជាចៅក្រមស៊ើបសួរសាលាដំបូងខេត្តកំពត កាលពីថ្ងៃទី១៤ ខែមករា ឆ្នាំ២០២២ បានសម្រេចចេញដីកាឃុំខ្លួនឧកញ៉ា ប៉ែន នួន ដាក់ពន្ធនាគារបណ្ដោះអាសន្ន ក្រោមការចោទប្រកាន់ពីបទ.ឆបោក នឹងរំលោ.ភលើទំនុកចិត្ត ដែលប្រព្រឹត្តិនៅភូមិព្រៃពាយ និងភូមិដុំផ្ដៅ ក្នុងឃុំត្រពាំងភ្លាំង ស្រុកឈូក ខេត្តកំពត កាលពីអំឡុងខែមិថុនា ខែកក្កដា ខែកញ្ញា ឆ្នាំ២០២១ រហូតមកដល់បច្ចុប្បន្ន តាមមាត្រា៣៧៧ មាត្រា៣៧ ៨ មាត្រា៣៩១ និងមាត្រា ៣៩២ នៃក្រមព្រហ្មទណ្ឌ ។
សូមបញ្ជាក់ថា ឧកញ៉ា ប៉ែន នួន អតីតអគ្គនាយកក្រុមហ៊ុន «ស៊ីខេអេ ចំរើនកសិឧស្សាហកម្មអភិវឌ្ឍន៍ (កម្ពុជា) អ៊ឹមផតអិចផត» ដែលជាក្រុមហ៊ុនធ្វើការទៅលើវិស័យសាងសង់ ត្រូវបានសមត្ថកិច្ចកងរាជអាវុធហត្ថមូលដ្ឋានខេត្តកំពត ចាប់ខ្លួនកាលពីល្ងាចថ្ងៃទី១១ ខែមករា ឆ្នាំ២០២២ ពាក់ព័ន្ធបទល្មើសឆបោ.កមានស្ថានទម្ងន់ទោស និងរំលោ.ភលើទំនុកចិត្ត ។
កាលពីអំឡុងខែកក្កដា ឆ្នាំ២០២០ កន្លងទៅ ឧកញ៉ា ប៉ែន នួន ក៏ធ្លាប់ត្រូវបានជាប់ពន្ធនាគារនៅរាជធានីភ្នំពេញម្ដងរួចមកហើយ ហើយត្រូវបានតុលាការប្រកាសសាលក្រមផ្តន្ទាទោសផងដែរ ពាក់ព័ន្ធទៅនឹងបទល្មើសឆបោ.កទៅលើអាជីវករអស់ទឹកប្រាក់រាប់ម៉ឺនដុល្លារអាមេរិក ក្រោមរូបភាពលើកគម្រោងសាងសង់ផ្លូវជាតិលេខ៥ តែជាគម្រោងនោះគឺខ្យល់ ៕