កីឡាអូឡាំពិករដូវរងាក្រុងប៉េកាំង បង្កបញ្ហាប្រឈមចំពោះគោលនយោបាយសូន្យកូវីដរបស់ចិន
ខណៈដែលនៅត្រឹមតែពីរសប្ដាហ៍ទៀតប៉ុណ្ណោះមុនពេលព្រឹត្តិការណ៍កីឡាអូឡាំពិករដូវរងាទីក្រុងប៉េកាំងចាប់ផ្ដើម អាជ្ញាធរចិនបានចេញការព្រមានមួយដែលបង្កើតឡើងដើម្បីរក្សាការប្រកាន់ខ្ជាប់យ៉ាងតឹងរ៉ឹងរបស់ប្រទេស ចំពោះគោលនយោបាយសូន្យកូវីដរបស់ខ្លួន។
ការិយាល័យចរាចរណ៍និយាយថា ប្រជាពលរដ្ឋគួរតែជៀសវាងការទាក់ទងជាមួយយានជំនិះដែលដឹកជញ្ជូនមន្ត្រី និងអ្នកចូលរួមក្នុងការប្រកួតកីឡា ក្នុងអ្វីដែលគេហៅថា «ពពុះ» ដែលរចនាឡើងដើម្បីជៀសវាងការឆ្លងរាលដាលដល់ប្រទេសដទៃទៀត។ ក្នុងករណីមានគ្រោះថ្នាក់ គេគួររង់ចាំមន្ត្រីជំនាញមកដល់ ជាជាងអន្តរាគមន៍ជួយ។
សេចក្តីប្រកាសគឺជាវិធានការមួយក្នុងចំណោមវិធានការជាច្រើនដែលត្រូវអនុវត្ត ដើម្បីជៀសវាងការផ្ទុះឡើងនៃវីរុសឆ្លងក្នុងអំឡុងពេលការប្រកួតកីឡាអូឡាំពិកប្រព្រឹត្តិទៅ។ ព្រឹត្តិការណ៍នេះត្រូវបានគេសន្មត់ថាជាសមិទ្ធិផលដ៏អស្ចារ្យមួយសម្រាប់ប្រទេសចិន ប៉ុន្តែក៏កំពុងក្លាយជាការសាកល្បងនៃការព្យាយាមប្រយុទ្ធប្រឆាំងនឹងកូវីដផងដែរ។
ចិនគឺជាប្រទេសចុងក្រោយរបស់ពិភពលោក ដែលនៅតែប្តេជ្ញាចិត្តចំពោះគោលនយោបាយសូន្យកូវីដ ប៉ុន្តែយុទ្ធសាស្រ្តនេះគឺស្ថិតនៅក្រោមភាពតានតឹងបន្ទាប់ពីអាជ្ញាធរបិទខ្ទប់ប្រជាជនរាប់លាននាក់ចំពេលមានការផ្ទុះឡើងវិញក្នុងស្រុក។
ចំនួនអ្នកឆ្លងកូវីដ-១៩នៅចិនមានចំនួនតិចបើធៀបនឹងប្រទេសដទៃទៀត ប៉ុន្តែករណីថ្មីកើនឡើងក្នុងរយៈពេលមួយខែកន្លងមកនេះ ដែលឈានដល់កម្រិតខ្ពស់បំផុតនៅថ្ងៃទី ២៧ ខែធ្នូ នៅពេលដែលអាជ្ញាធរចិនរាយការណ៍ថាមានអ្នកឆ្លងថ្មីចំនួន ៣៦១ នាក់ ដែលជាចំនួនច្រើនបំផុតក្នុងរយៈពេល ២៤ ម៉ោងចាប់តាំងពីដើមឆ្នាំ ២០២០។ ប៉ុន្តែករណីថ្មីក៏ធ្លាប់ចុះមកត្រឹម ៥៦ ករណីកាលពីថ្ងៃសៅរ៍សប្ដាហ៍មុនដែរ។
យ៉ាងណាមិញ ក្រុមមន្ត្រីនៅតែប្រកាន់ខ្ជាប់នូវការប្តេជ្ញាចិត្តរបស់ខ្លួនក្នុងការលុបបំបាត់វីរុស ដែលថាជាយន្តការការពារការឆ្លងរាលដាលដ៏រហ័សនៃវ៉ារ្យ៉ង់អូមីក្រុង។
គណៈកម្មាធិការរៀបចំក្រុងប៉េកាំងបានដាក់ពិធីសារដ៏តឹងរ៉ឹងសម្រាប់អ្នកចូលរួម ជាងការប្រកួតកីឡារដូវក្តៅនៅទីក្រុងតូក្យូកាលពីឆ្នាំមុនទៅទៀត។ អត្តពលិក មន្ត្រីកីឡា និងប្រព័ន្ធផ្សព្វផ្សាយត្រូវបានលើកទឹកចិត្តឱ្យចាក់វ៉ាក់សាំងឱ្យបានពេញលេញមុនពេលមកដល់ ឬប្រឈមនឹងការធ្វើចត្តាឡីស័ករយៈពេល ២១ ថ្ងៃ។ ទិន្នន័យសុខភាពរបស់អ្នកចូលរួមទាំងអស់ នឹងត្រូវបានតាមដាន ហើយពួកគេនឹងត្រូវឆ្លងកាត់ការធ្វើតេស្ត PCR យ៉ាងហោចណាស់ម្តងក្នុងមួយថ្ងៃ។
ទស្សនីយភាពកីឡានឹងប្រព្រឹត្តទៅក្នុងប្រព័ន្ធគ្រប់គ្រងជារង្វង់ (closed loop) ដែលនឹងបំបែកអ្នកដែលធ្វើដំណើរពីបរទេស និងបុគ្គលិកក្នុងស្រុក ដោយមានអ្នកចូលរួមនៅក្រៅប្រទេសតម្រូវឱ្យចេញដំណើរតាមយន្តហោះជួលដែលអនុម័តជាមុនដោយគណៈកម្មាធិការទីក្រុងប៉េកាំងឆ្នាំ ២០២២។ អ្នកទស្សនាកីឡាក៏នឹងត្រូវបានកំណត់ចំពោះក្រុមដែលអ្នករៀបចំអញ្ជើញ។
គណៈកម្មាធិការអូឡាំពិកអន្តរជាតិ (IOC) និងទីក្រុងប៉េកាំងនិយាយកាលពីថ្ងៃពុធសប្ដាហ៍មុនថា ទិន្នន័យបឋមពីប្រព័ន្ធគ្រប់គ្រងដែលបើកក្នុងខែនេះ បង្ហាញថាត្រឹមតែ ១,៥៣ ភាគរយនៃអ្នកចូលរួមដែលបានមកដល់ក្នុងរយៈពេលពីរសប្តាហ៍គិតត្រឹមថ្ងៃ ១៩ ខែមករា បានធ្វើតេស្តវិជ្ជមាននៃកូវីដ-១៩ ប៉ុន្តែអត្រានៃការឆ្លងមានត្រឹម ០,០២ ភាគរយប៉ុណ្ណេះ។
ក្រុងប៉េកាំងនឹងស្វាគមន៍មនុស្សប្រមាណ ១១, ០០០ នាក់មកពីជុំវិញពិភពលោកក្នុងព្រឹត្តិការណ៍កីឡាដែលនឹងចាប់ផ្ដើមពីថ្ងៃទី ០៤ ខែកុម្ភៈ ដល់ថ្ងៃទី ២០ ខែកុម្ភៈ ដោយមានអត្តពលិកប្រហែល ៣ ០០០ នាក់ចូលរួម។ ប៉ុន្តែការរឹតត្បិត និងការព្រួយបារម្ភអំពីការចម្លងជំងឺកូវីដ-១៩ បង្ខំប្រព័ន្ធផ្សព្វផ្សាយនានាឲ្យចាត់វិធានការពិសេស។
យោងតាមការចុះផ្សាយរបស់កាសែត Financial Times ទូរទស្សន៍អាមេរិក NBC ដែលចំណាយប្រាក់ច្រើនជាង ១ ប៊ីលានដុល្លាររាល់ការប្រកួតកីឡាអូឡាំពិក និយាយថា នឹងគ្មានអ្នកនិយាយទូរទស្សន៍របស់ខ្លួនធ្វើដំណើរទៅកាន់ការប្រកួតដោយផ្ទាល់នោះទេ ប៉ុន្តែនឹងធ្វើអត្ថាធិប្បាយពីការិយាល័យកណ្តាលរបស់ក្រុមហ៊ុន។ បណ្តាញផ្សាយព័ត៌មានកីឡា ESPN ក៏មិនបានបញ្ជូនអ្នកយកព័ត៌មានណាមួយចូលរួមដែរ។
លោក Molly Solomon ប្រធាន និងជាផលិតករប្រតិបត្តិខាងអូឡាំពិករបស់ទូរទស្សន៍ NBC និយាយថា៖ «យើងធ្លាប់និយាយថាការប្រកួតកីឡាអូឡាំពិកក្រុងតូក្យូនឹងក្លាយជាព្រឹត្តិការណ៍ លំបាកបំផុតមួយនៃជីវិតរបស់យើង។ ប៉ុន្តែទីក្រុងប៉េកាំងមានលក្ខណៈយ៉ាប់ជាងហ្នឹងទៀតក្នុងរឿងនេះ»។
យ៉ាងណាមិញ លោក Mark Adams អ្នកនាំពាក្យរបស់ IOC និយាយថា៖ «នេះគឺជាពេលវេលាដ៏វិសេសវិសាល ហើយ[ការណ៍]ទាំងនេះនឹងក្លាយជាកីឡាអូឡាំពិករដូវរងាដ៏អស្ចារ្យ»។
កាលពីដើមខែនេះ វ៉ារ្យ៉ង់អូមីក្រុងត្រូវបានរកឃើញនៅក្នុងសហគមន៍ក្នុងក្រុងប៉េកាំង ដែលជំរុញឱ្យអាជ្ញាធរបិទអគារការិយាល័យ និងបរិវេណលំនៅដ្ឋានមួយយ៉ាងឆាប់រហ័ស។ វ៉ារ្យ៉ង់ដែលតាជាច្រើនករណី ក៏ត្រូវបានរាយការណ៍ផងដែរ។
ប៉ុន្តែលោក Huang Chun មន្ត្រីនៃគណៈកម្មាធិការរៀបចំទីក្រុងប៉េកាំងនិយាយនៅក្នុងសន្និសីទសារព័ត៌មានកាលពីសប្តាហ៍មុនថា៖ «ស្ថានភាពទាំងមូលនៅតែស្ថិតក្រោមការគ្រប់គ្រង»។ លោកបន្ថែមថា មិនមានគម្រោងបិទទីក្រុង ឬផ្លាស់ប្តូរច្បាប់ទប់ស្កាត់កូវីដសម្រាប់កីឡាអូឡាំពិករដូវរងានោះទេ។
មន្ត្រីរដ្ឋាភិបាលចិនក្នុងតំបន់ម្នាក់ និយាយថា៖ «យើងមានការភ័យខ្លាចចំពោះព្រឹត្តិការណ៍នេះ។ យើងត្រូវបង្កើតព្រឹត្តិការណ៍ដោយរលូន ដោយមិនមានការផ្ទុះឡើងនៃជំងឺ។ នោះគឺជាបញ្ហាប្រឈមធំ»។
ប្រភព៖ CNN
