មេទ័ពជើងទឹកអាល្លឺម៉ង់លាលែងពីដំណែង ក្រោយធ្វើអត្ថាធិប្បាយពីឧបទ្វីបគ្រីមៀដែលបង្កឱ្យមានជម្លោះការទូត
មេទ័ពជើងទឹករបស់អាល្លឺម៉ង់លាលែងពីតំណែង ក្រោយការអត្ថាធិប្បាយចម្រូងចម្រាសដែលលោកលើកឡើងអំពីរុស្ស៊ី និងតំបន់ឧបទ្វីបគ្រីមៀ ដែលបង្កឱ្យមានជម្លោះការទូតជាមួយរដ្ឋាភិបាលទីក្រុងកៀវ ខណៈដែលការភ័យខ្លាចពីការឈ្លានពានរបស់រុស្ស៊ីជិតអ៊ុយក្រែនកើនឡើង។
តាមរយៈសេចក្តីថ្លែងការណ៍មួយចេញផ្សាយកាលពីថ្ងៃសៅរ៍ លោកអនុឧត្តមនាវីឯក Kay-Achim Schönbach លើកឡើងថា លោកបានស្នើសុំឱ្យរដ្ឋមន្ត្រីការពារជាតិ ដកតួនាទីរបស់លោកជាអធិការនៃកងទ័ពជើងទឹកអាល្លឺម៉ង់ ជាធរមានភ្លាមៗ។លោកបន្ថែមថា រដ្ឋមន្ត្រីការពារជាតិអ្នកស្រី Christine Lambrecht បានទទួលយកការលាលែងពីតំណែងរបស់លោកហើយ។
លោក Schönbach និយាយថា៖ «សុន្ទរកថាដែលមិនបានពិចារណា ដែលខ្ញុំធ្វើឡើងនៅក្នុងប្រទេសឥណ្ឌាអំពីសន្តិសុខ និងគោលនយោបាយយោធា គឺជាបន្ទុកកាន់តែខ្លាំងឡើងលើការិយាល័យរបស់ខ្ញុំ។ ដើម្បីបញ្ចៀសការខូចខាតបន្ថែមទៀតដល់កងទ័ពជើងទឹកអាល្លឺម៉ង់ Bundeswehr និងសាធារណរដ្ឋសហព័ន្ធអាល្លឺម៉ង់ ខ្ញុំចាត់ទុកថាជំហាននេះជាមេរៀន»។
លោក Schönbach និយាយកាលពីសប្តាហ៍មុនក្នុងពេលដែលលោកធ្វើទស្សនៈកិច្ចនៅប្រទេសឥណ្ឌាថា លោក Vladimir Putin គួរតែទទួលបាន «ការគោរពដែលលោកប្រហែលជាសាកសមនឹងទទួលបាន» ហើយអះអាងថា តំបន់គ្រីមៀនឹងមិនត្រលប់ទៅអ៊ុយក្រែនវិញទេ។ ការអត្ថាធិប្បាយបែបនេះធ្វើឡើង ស្របពេលដែលរុស្ស៊ីប្រមូលទ័ពជាង ១០៦ ០០០ នាក់នៅតាមព្រំដែនភាគខាងលិចជាប់អ៊ុយក្រែន។
បន្ទាប់ពីការអត្ថាធិប្បាយ ក្រសួងការបរទេសអ៊ុយក្រែនកោះហៅឯកអគ្គរដ្ឋទូតអាល្លឺម៉ង់ប្រចាំទីក្រុងកៀវ ដើម្បីប្រឆាំងនឹងការលើកឡើងរបស់លោក Schönbach ដែលថាអ៊ុយក្រែននឹងមិនអាចគ្រប់គ្រងតំបន់គ្រីមៀឡើងវិញ និងបំពេញតាមលក្ខណៈវិនិច្ឆ័យសម្រាប់សមាជិកភាពអង្គការណាតូបានឡើយ។
រដ្ឋាភិបាលអាល្លឺម៉ង់ដកខ្លួនចេញពីការលើកឡើងរបស់លោក Schönbach ប៉ុន្តែរដ្ឋមន្ត្រីការបរទេសអ៊ុយក្រែន លោក Dmytro Kuleba និយាយថា វាគឺជាផ្នែកមួយនៃគំរូនៃអាកប្បកិរិយាដែលមិនមានប្រយោជន៍របស់មន្ត្រីអាល្លឺម៉ង់។
ប្រភព៖ FT
