អតីតនាយករដ្ឋមន្ត្រីម៉ាឡេស៊ីត្រូវបានបញ្ជូនទៅកាន់មន្ទីរពេទ្យជាលើកទី២នៅខែនេះ
លោក មហាធៀរ មហាម៉ាត់ អតីតនាយករដ្ឋមន្ត្រីម៉ាឡេស៊ីត្រូវបានបញ្ជូនទៅកាន់មន្ទីរពេទ្យម្ដងទៀតហើយកាលពីសប្ដាហ៍មុន។ នេះជាលើកទី២ ហើយនៅក្នុងខែមករានេះដែលអតីតបុរសខ្លាំងម៉ាឡេស៊ីមានបញ្ហាសុខភាពដូច្នេះ។
អតីតនាយករដ្ឋមន្ត្រីម៉ាឡេស៊ីរូបនេះទទួលបានការព្យាបាល និងថែទាំពីសំណាក់វិទ្យាស្ថានជាតិព្យាបាលជំងឺបេះដូងនាឯទីក្រុងកូឡាឡាំពួរ។
អ្នកនយោបាយចាស់វស្សារូបនេះមានបញ្ហាបេះដូងយូរឆ្នាំហើយ ដោយលោកក៏ធ្លាប់ទទួលបានការវះកាត់ទៀតផង។
បើយោងតាមកូនស្រីរបស់លោកគឺ អ្នកស្រី ម៉ារីណា មហាធៀរ (Marina Mahathir) បុរសវ័យ ៩៦ឆ្នាំរូបនេះមានស្ថានភាពប្រក្រតីមកវិញហើយ ក្រោយទទួលបានការព្យាបាលពីមន្ទីរពេទ្យ។
សារព័ត៌មានក្នុងស្រុកបានចុះផ្សាយថា លោក អ៊ីស្មាអែល សាប្រ៊ី ដែលជានាយករដ្ឋមន្ត្រីម៉ាឡេស៊ីកំពុងតែកាន់តំណែងបានទៅសួរសុខទុក្ខលោក មហាធៀរ ផ្ទាល់ទៅដល់មន្ទីរពេទ្យ៕
ប្រភព៖ Aljazeera