អ៊ុយក្រែនទទួលបានការដឹកជញ្ជូនសព្វាវុធជាលើកទីពីរពីអាមេរិក
អ៊ុយក្រែនបានទទួលការដឹកជញ្ជូនសព្វាវុធជាលើកទីពីរពីសហរដ្ឋអាមេរិកចំពេលភាពតានតឹងកំពុងកើនឡើងជាមួយប្រទេសរុស្សី។
កាលពីថ្ងៃអាទិត្យនេះ រដ្ឋមន្ត្រីក្រសួងការពារជាតិអ៊ុយក្រែនលោកអូលេកស៊ី រេសនីកូវបានបង្ហោះសារលើបណ្ដាញសង្គម Twitter ថា៖ «បក្សីទីពីរចុះចតនៅក្រុងកៀវ! អាវុធជាង ៨០ តោនដើម្បីពង្រឹងសមត្ថភាពការពាររបស់អ៊ុយក្រែនពីមិត្តរបស់យើងនៅសហរដ្ឋអាមេរិក! ហើយនេះមិនមែនជាទីបញ្ចប់ទេ»។
ការដឹកជញ្ជូនអាវុធដំបូងរបស់អាមេរិកបានមកដល់អ៊ុយក្រែនកាលពីថ្ងៃសុក្រ។ កាលស្ថានទូតអាមេរិកប្រចាំអ៊ុយក្រែនបាននិយាយថាអាមេរិកបានផ្ដល់ «ជំនួយអាវុធជិត ២០០.០០០ ផោន (៩០ តោន) រួមទាំងគ្រាប់រំសេវសម្រាប់អ្នកការពារជួរមុខរបស់អ៊ុយក្រែន»។
ការដឹកជញ្ជូនអាវុធទាំងនេះបានកើតឡើងខណៈពេលដែលរុស្សីប្រមូលផ្ដុំទាហានជាង ១០០.០០០ នាក់នៅតំបន់ជិតព្រំដែនអ៊ុយក្រែន ធ្វើឱ្យមានការព្រួយបារម្ភថារុស្សីកំពុងត្រៀមឈ្លានពានអ៊ុយក្រែន។ រុស្សីបានច្រានចោលថាខ្លួនមិនមានផែនការធ្វើបែបនេះទេ ប៉ុន្តែរក្សាសិទ្ធធ្វើការឆ្លើយតបដោយប្រើប្រាស់ «បច្ចេកទេសយោធា» ប្រសិនបើសន្តិសុខរបស់ខ្លួនត្រូវបានគំរាមកំហែង។
បន្ថែមពីលើផ្គត់ផ្គង់អាវុធទាំងនេះ មានការរាយការណ៍ថាក្រសួងការពារជាតិអាមេរិកគឺកំពុងរៀបចំជម្រើសឱ្យលោកប្រធានាធិបតីចូ បៃដិន ដើម្បីពង្រឹងកងកម្លាំងអាមេរិកនៅអឺរ៉ុបខាងកើត ជាការរារាំងកុំឱ្យរុស្សីឈ្លានពានអ៊ុយក្រែន៕
ប្រភព៖ CNN