អាមេរិកឆ្លើយតបនឹងការទាមទារសន្តិសុខរបស់រុស្ស៊ី ខណៈភាពតានតឹងអ៊ុយក្រែនកើនឡើង
កាលពីថ្ងៃពុធ ទី២៦ មករាសហរដ្ឋអាមេរិកបាននិយាយថាខ្លួនបានដាក់ចេញនូវផ្លូវការទូតមួយដើម្បីឆ្លើយតបនឹងការទាមទាររុស្សីនៅអឺរ៉ុបខាងកើត ខណៈពេលដែលក្រុងមូស្គូធ្វើការចរចាសន្តិសុខជាមួយលោកខាងលិច និងរៀបចំសមយុទ្ធនៅជិតព្រំដែនអ៊ុយក្រែន។
រដ្ឋមន្ត្រីការបរទេសអាមេរិកលោកអាន់តូនី ប្លីនខែនបាននិយាយថា នៅក្នុងការឆ្លើយតបជាលាយលក្ខណ៍អក្សរទៅនឹងការទាមទាររបស់រុស្សី ដែលប្រគល់ទៅឱ្យក្រុងមូស្គូដោយផ្ទាល់ដោយឯកអគ្គរដ្ឋទូតអាមេរិក សហរដ្ឋអាមេរិកបានបន្តការប្ដេជ្ញាចិត្តរបស់ខ្លួនក្នុងការរក្សាគោលនយោបាយ «បើកទ្វារ» របស់អង្គការណាតូ ខណៈពេលដែលផ្ដល់នូវ «ការវាយតម្លៃជាគោលការណ៍ និងជាក់ស្ដែង» នៃការព្រួយបារម្ភរបស់វិមានក្រឹមឡាំង។
ការទាមទាររបស់រុស្សីរួមមានការទាមទារឱ្យអង្គការណាតូដកទ័ព និងអាវុធចេញពីអឺរ៉ុបខាងកើត និងការហាមឃាត់មិនឱ្យប្រទេសអ៊ុយក្រែនចូលជាសមាជិកនៃអង្គការណាតូ។ ក្រុងវ៉ាស៊ីនតោនបានច្រានចោលការទាមទារទាំងនេះ ប៉ុន្តែនិយាយថាពួកគេអាចពិភាក្សាវិធានការគ្រប់គ្រងអាវុធ និងកសាងទំនុកចិត្ត។
តើប្រធានាធិបតីរុស្សីលោកវ្ល៉ាឌីមៀរ ពូទីននឹងទទួលយកការឆ្លើយតបរបស់លោកខាងលិចដែរ ឬទេនឹងកំណត់ដំណាក់កាលបន្ទាប់នៃវិបត្តិនៅប្រទេសអ៊ុយក្រែន។ រុស្សីបានពង្រាយទាហានជាង ១០០.០០០ នាក់នៅតំបន់ព្រំដែនជាមួយប្រទេសអ៊ុយក្រែន ប៉ុន្តែបានច្រានចោលថាខ្លួនមិនមានផែនការឈ្លានពានទេ។
អង្គការណាតូបានបញ្ជាឱ្យកងកម្លាំងមួយចំនួនត្រៀមធ្វើការចល័ត ហើយបានបញ្ជូននាវា និងយន្តហោះចម្បាំងទៅពង្រឹងកងកម្លាំងនៅអឺរ៉ុបខាងកើត ខណៈពេលដែលសហរដ្ឋអាមេរិក និងចក្រភពអង់គ្លេសបានចាប់ផ្ដើមផ្គត់ផ្គង់អាវុធឱ្យកងទ័ពអ៊ុយក្រែន៕
ប្រភព៖ REUTERS