អាជ្ញាធររកឃើញសាច់គោ និងស្បែកជ្រូកវេចខ្ចប់រាប់តោនមានផ្ទុកវីរុសកូវីដ
អាជ្ញាធរហុងកុងបានអះអាងថា ពួកគេបានរកឃើញវីរុសកូវីដនៅក្នុងសំណាកសាច់គោ និងស្បែកជ្រូកនាំចូលពីបរទេស។ នេះបើយោងប្រភពពី Reuters បានចេញផ្សាយនៅថ្ងៃនេះ។
ការរកឃើញនេះ ត្រូវបានធ្វើឡើងដោយអ្នកជំនាញមជ្ឈមណ្ឌលសម្រាប់សុវត្ថិភាពចំណីអាហារ (CFS) ទៅលើសាច់គោកកនាំចូលពីប្រទេសប្រេស៊ីលចំនួន ១,១០០កេសដែលមានទម្ងន់ ២៩តោន រួមនិងស្បែកជ្រូកកកនាំចូលពីប្រទេសប៉ូឡូញចំនួន ៣០០កេសដែលមានទម្ងន់ ៧តោន ដែលនាំចូលមកដល់ហុងកុងតាមផ្លូវទឹក។ ស្របពេលអាជ្ញាធរបានកំពុងប្រុងប្រយ័ត្នខ្ពស់ ខណៈរលកថ្មីនៃការឆ្លងកាន់តែពិបាកក្នុងការគ្រប់គ្រង។
កន្លងមក អាជ្ញាធរហុងកុងធ្លាប់បាននិយាយថា កូវីដ-១៩ ឆ្លងភាគច្រើនតាមរយៈដំណក់ទឹក ហើយមិនអាចកើនឡើងនៅក្នុងម្ហូបអាហារ ឬការវេចខ្ចប់អាហារនោះទេ។ ហើយទំនងជាមិនអាចឆ្លងទៅមនុស្សតាមរយៈការប្រើប្រាស់អាហារនោះទេ។ ប៉ុន្តែទោះយ៉ាងណាក៏ដោយ អាជ្ញាធរបានណែនាំឱ្យប្រជាជនរៀបចំអាហារឆៅដាក់ដោយឡែក គោរពវិធានការអនាម័យ និងចម្អិនអាហារឱ្យបានឆ្អិនមុនពេលទទួលទាន។
ក្រឡេកមកមើលចំនួនអ្នកឆ្លងប្រចាំថ្ងៃនៅហុងកុង បានកើនឡើងខ្ពស់នៅឆ្នាំនេះ ដោយឈានដល់ចំនួនជាកំណត់ត្រា ៧,៥៣៣ករណីកាលពីម្សិលមិញ ខណៈមន្ទីរពេទ្យ រួមនិងកន្លែងធ្វើចត្តាឡីស័ក ពោរពេញដោយអ្នកជំងឺកំពុងសម្រាកព្យាបាល៕
