រាជធានីភ្នំពេញ ៖ គណៈកម្មការជាតិប្រយុទ្ធនឹងជំងឺកូវីដ១៩ នៅថ្ងៃទី២៧ ខែកុម្ភៈនេះបានចេញសេចក្តីជូនដំណឹងមួយដោយបានបញ្ជាក់ពីការ រក្សាគោលការណ៍ចាស់ដដែលនៃការចែកចាយលក់ឱសថម៉ូលណាទ្រីស (Molnupiravir Capsules 200mg)ដែលជាឱសថព្យាបាល ជំងឺកូវីដ-១៩ បន្ទាប់ពីពេលដែលមានការពន្យាពេលជើងហោះហើរដឹកជញ្ជូនរួចមក ។

ជាមួយការចេញសេចក្តីជូនដំណឹងនេះគណៈកម្មការជាតិប្រយុទ្ធនឹងជំងឺកូវីដ១៩បានបញ្ជាក់ដែរថា ក្រុមការងារសូមរក្សាគោលការណ៍ចាស់ដែលបុគ្គលម្នាក់អាចស្នើសុំទិញពី ១ប្រអប់ ដល់ ២ប្រអប់ ដោយភ្ជាប់មកជាមួយនូវអត្តសញ្ញាណបណ្ណផ្ទាល់ខ្លួន និងសូមធ្វើការពន្យាពេលចែកចាយឱសថនេះ ជូនមន្ទីរពេទ្យឯកជន គ្លីនិក ឱសថស្ថាន និងឱសថស្ថានរង។

ចំពោះកាលបរិច្ឆេទចែកចាយឱសថនេះ ជូនមន្ទីរពេទ្យឯកជន គ្លីនិក ឱសថស្ថាន និងឱសថស្ថានរង ក្រុមការងារនឹងធ្វើការជូនដំណឹងនៅពេលក្រោយ។ ដូចនេះ សាធារណជន អាចបញ្ជាទិញឱសថម៉ូលណាទ្រីស នៅទីស្តីការក្រសួងប្រៃសណីយ៍និងទូរគមនាគមន៍ ដែលមានអាសយដ្ឋាន អគារលេខ១៣ មហាវិថីព្រះមុនីវង្ស សង្កាត់ ស្រះចក ខណ្ឌដូនពេញ រាជធានីភ្នំពេញ នៅរៀងរាល់ ម៉ោងធ្វើការ។ សម្រាប់ព័ត៌មានបន្ថែម សូមទាក់ទងទូរសព្ទលេខ ១២៣/ ០៧៧ ៨៦៧ ៩៥៧/០៩៦ ៤៦៦ ៤៦៤៦ ជា រៀងរាល់ម៉ោងធ្វើការ។

សេចក្តីដូចបានជម្រាបជូនខាងលើ សូមសាធារណជនទាំងអស់ មេត្តាជ្រាបជាព័ត៌មាន និងអធ្យាស្រ័យដោយសារការពន្យារពេលនេះ៕ដោយ៖ ម៉ាដេប៉ូ