លោក សាយ សំអាល់៖ «ក្រុមគ្រួសារ ស.ស.យ.ក. បានអនុវត្តតួនាទី ភារកិច្ច បេសកកម្ម ប្រកបដោយការទទួលខុសត្រូវ ឯករាជ្យម្ចាស់ការ និងគំនិតច្នៃប្រឌិតខ្ពស់ស្របតាមបំណងប្រាថ្នារបស់យុវជន និងប្រជាជន និង ការវិវឌ្ឍសភាពការណ៍ថ្មីៗ»
សៀមរាប៖ក្នុងរបាយការណ៍បូកសរុបសមិទ្ធផល និងទិសដៅបន្ទាប់របស់គណៈកម្មាធិការកណ្តាលដែលអានដោយ លោក សាយ សំអាល់ អនុប្រធានសហភាពសហព័ន្ធយុវជនកម្ពុជា(ស.ស.យ.ក.)បានឱ្យដឹងថា៖ «ក្រុមគ្រួសារ ស.ស.យ.ក. ទូទាំងប្រទេសបានអនុវត្តតួនាទី ភារកិច្ច បេសកកម្ម ប្រកបដោយការទទួលខុសត្រូវ ឯករាជ្យម្ចាស់ការ និងគំនិតច្នៃប្រឌិតខ្ពស់ស្របតាមបំណងប្រាថ្នារបស់យុវជននិងប្រជាជននិងការវិវឌ្ឍសភាពការណ៍ថ្មីៗដោយទទួលបានលទ្ធផលគួរជាទីមោទកៈ។»
ជាមួយគ្នានេះក្នុងរបាយការណ៍ដដែលក៏បានគូសបញ្ជាក់បន្ថែមផងដែរថាយុវជនស.ស.យ.ក.បានក្តាប់ជាប់នូវមូលដ្ឋានប្រវត្តិសាស្ត្រដែលអតីតថ្នាក់ដឹកនាំនៃសមាគមយុវជនដែលកើតចេញពីកម្លាំងសាមគ្គីដ៏អស្ចារ្យនៃរណសិរ្សសង្គ្រោះជាតិកម្ពុជា ដែលបានបន្សល់ទុកនូវស្មារតី២ធ្នូក្លាយជាមូលដ្ឋានគ្រឹះដ៏រឹងមាំ ដែលដក់ជាប់នៅក្នុងបេះដូងយុវជនជាសមាជិក ស.ស.យ.ក. ឱ្យមានភាពក្លាហាន និងឆន្ទៈដ៏មោះមុតក្នុងការបំពេញបេសកកម្មរបស់ខ្លួន។
សហភាពសហព័ន្ធយុវជនកម្ពុជា បានរៀបចំកិច្ចប្រជុំគណៈកម្មាធិការកណ្ដាលរបស់ខ្លួន រយៈពេលបីថ្ងៃ ចាប់ពីថ្ងៃទី១៨ ដល់ថ្ងៃទី២០ ខែមីនា ឆ្នាំ២០២២ នៅលើទឹកដីខេត្តសៀមរាប ដែលកិច្ចប្រជុំនេះ ដឹកនាំដោយ ឯកឧត្តម ហ៊ុន ម៉ានី ជាប្រធានស.ស.យ.ក. រួមជាមួយវត្តមានរបស់សមាជិក សមាជិកា គណៈកម្មាធិការកណ្តាល ភ្ញៀវកិត្តិសយល និងសមាជិកសមាជិកាអង្គប្រជុំ។គោលបំណងនៃការរៀបចំកិច្ចប្រជុំគឺដើម្បីស្វែងរកធាតុចូលជាច្រើនចេញពីការចែករំលែកយ៉ាងផុលផុសពីសំណាក់សមាជិកសមាជិកានៃកិច្ចប្រជុំទាំងអស់ដែលធាតុចូលទាំងនេះជាមូលដ្ឋាននៃគំនិតបន្ថែមទៀតក្នុងការដឹកនាំយុវជន និងការអនុវត្តកិច្ចការជាបន្តនៅតាមមូលដ្ឋានរៀងៗខ្លួន៕ដោយ៖AMS
