សម្តេចនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូ អញ្ចើញចូលរួមកិច្ចប្រជុំកំពូល មួយនៅក្នុងប្រទេសជប៉ុននាវេលាថ្ងៃសុក្រនេះ។ មន្ត្រីរាជរដ្ឋាភិបាលបានថ្លែងថាកិច្ច ប្រជុំក្នុងក្រុងគូម៉ាម៉ូតូ គឺជាកិច្ចប្រជុំដែលផ្តោតអំពីបញ្ហាទឹកនៅតំបន់អាស៊ី-ប៉ាស៊ីហ្វិករវាងពី ថ្ងៃទី២៣និង២៤មេសា។

កិច្ចប្រជុំកំពូលស្តីស្តីពីបញ្ហាទឹកតំបន់អាស៊ី-ប៉ាស៊ីហ្វិកលើកទី៤ រៀប ចំធ្វើដោយវេទិកាទឹកអាស៊ីប៉ាស៊ីហ្វិក ដែលក្នុងនោះរួមមានការអញ្ជើញចូលរួមពីថ្នាក់នាយក រដ្ឋមន្ត្រី, ប្រមុខរដ្ឋ និងតំណាងអង្គការអន្តរជាតិនានាម​កពីតំបន់អាស៊ីប៉ាស៊ីហ្វិក។

កិច្ចប្រជុំកំពូលលើកទី៤នឹងស្ថិតក្រោមប្រធានបទ «ទឹកសម្រាប់ការអភិវឌ្ឍប្រកបដោយ ចីរ ភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ» ។ កិច្ចប្រជុំនេះធ្វើឡើងក្នុងគោលបំណង ចែករំលែកទស្សនទាន ការប្រមើលមើលទៅមុខនៃដំណោះស្រាយ និងការអនុវត្ត ជូនចំពោះ ប្រមុខរដ្ឋ, ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការ ពន្លឿនសកម្មភាពឲ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់ សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវ រាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជម្ងឺកូវីដ-១៩ បានប្រសើរឡើង វិញ ក្នុងតំបន់អាស៊ី-បាស៊ីហ្វិក។

សម្តេចតេជោ ហ៊ុន សែន បានថ្លែងមុននេះបញ្ជាក់ឱ្យដឹងដែរ ថា ក្នុងដំណើរអញ្ជើញទៅកាន់ប្រទេសជប៉ុនលើកទី២៤នេះ សម្តេចក៏នឹងមានជំនួប ពិភាក្សា ការងារទ្វេភាគីជាមួយនាយករដ្ឋមន្ត្រីជប៉ុនលោក គីស៊ីដា ហ្វូមីអូ ផងដែរ។ សម្តេចតេជោ ហ៊ុន សែន និងគណៈប្រតិភូ គ្រោងវិលត្រឡប់មកកាន់ប្រទេសកម្ពុជាវិញ នៅថ្ងៃទី២៤ ខែមេសា។