រដ្ឋសភានឹងប្រជុំអនុម័តសេចក្តីព្រាងស្តីពីសុវត្ថិភាពម្ហូបអាហារ និងសេចក្តីសេចក្តីព្រាងច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ខណ្ឌ នៅថ្ងៃទី១១ ខែឧសភា
ភ្នំពេញៈ រដ្ឋសភានឹងប្រជុំអនុម័តសេចក្តីព្រាងស្តីពីសុវត្ថិភាពម្ហូបអាហារ និងសេចក្តីសេចក្តីព្រាងច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ខណ្ឌ នៅថ្ងៃទី១១ ខែឧសភា ឆ្នាំ២០២២ ខាងមុខនេះ ។ ការកំណត់ថ្ងៃប្រជុំរដ្ឋសភានេះ បានធ្វើឡើងបន្ទាប់ពីសម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំកិច្ចប្រជុំគណៈកម្មាធិការអចិន្ត្រៃយ៍រដ្ឋសភានៅព្រឹកថ្ងៃអង្គារទី៣ ខែឧសភា ឆ្នាំ២០២២ នៅវិមានរដ្ឋសភា ដើម្បីពិនិត្យសំណើសុំបញ្ចូលក្នុងរបៀបវារៈសម័យប្រជុំរដ្ឋសភា លើកទី៧ នីតិកាលទី៦ នូវ៖ សេចក្តីព្រាងច្បាប់ស្តីពីវិសោធនកម្មមាត្រា១៤០ នៃច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ដែលត្រូវប្រកាសឱ្យប្រើដោយព្រះរាជក្រមលេខ នស/រកម/០៥០៨/០១៧ ចុះថ្ងៃទី២៤ ខែឧសភា ឆ្នាំ២០០៨ និងសេចក្តីព្រាងច្បាប់ ស្តីពីសុវត្ថិភាពម្ហូបអាហារ និងការពិនិត្យ និងសម្រេច របៀបវារៈ និងកំណត់កាលបរិច្ឆេទបន្តសម័យប្រជុំលើកទី៧ នីតិកាលទី៦។
បន្ទាប់ពីប្រជុំពិភាក្សាយ៉ាងផុសផុលកិច្ចប្រជុំគណៈកម្មាធិការអចិន្ត្រៃយ៍រដ្ឋសភាបានអនុម័តកំណត់កាលបរិច្ឆេទបន្តសម័យប្រជុំរដ្ឋសភាលើកទី៧នីតិកាលទី៦ នៅព្រឹកថ្ងៃទី១១ ខែឧសភា ខាងមុខនេះ ដោយមានរបៀបវារៈចំនួនពីរគឺ ការពិភាក្សាអនុម័តសេចក្តីព្រាងច្បាប់ស្តីពីសុវត្ថិភាពម្ហូបអាហារ និងការពិភាក្សាអនុម័តសេចក្តីសេចក្តីព្រាងច្បាប់ស្តីពីវិសោធនកម្មមាត្រា១៤០នៃច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ខណ្ឌ។
សេចក្តីព្រាងច្បាប់ទាំងពីរខាងលើត្រូវបានគណៈកម្មការជំនាញរដ្ឋសភា ពិនិត្យសិក្សាចប់សព្វគ្រប់ តាមនីតិវិធីបន្ទាប់ពីគណៈកម្មាធិ ការអចិន្ត្រៃយ៍រដ្ឋសភា អនុម័តឲ្យពិនិត្យសិក្សាកាលពីថ្ងៃទី១២ ខែមេសា ឆ្នាំ២០២២ កន្លងមកនេះ៕ដោយៈ ពល ជ័យ