នូវែលហ្សេឡង់បើកទទួលភ្ញៀវទេសចរ និងនិស្សិតមកពី 60 ប្រទេស-ដែនដីឡើងវិញ
វែលលីនតុន៖ ប្រទេសនូវែលសេឡង់បានបើកព្រំដែនរបស់ខ្លួនឡើងវិញចំពោះអ្នកទេសចរ និងនិស្សិតដែលបានចាក់វ៉ាក់សាំងបង្ការរួចរាល់មកពីប្រទេស និងដែនដីចំនួន 60។
នូវែលសេឡង់បានបិទព្រំដែនរបស់ខ្លួននៅខែមីនា ឆ្នាំ2020 ជាគោលការណ៍ដែលជាផ្នែកមួយនៃកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងការរាតត្បាតនៃជម្ងឺកូវីដ១៩។ ប៉ុន្តែប្រទេសនេះត្រូវបានបន្ធូរបន្ថយការរឹតបន្តឹងរបស់ខ្លួនវិញចាប់តាំងពីចុងខែកុម្ភៈ ឆ្នាំ២០២២ ។
ចាប់ពីថ្ងៃចន្ទនេះតទៅ អ្នកធ្វើដំណើរមកពីប្រទេស និងដែនដីចំនួន 60 ដែលលើកលែងទិដ្ឋាការ រួមទាំងជប៉ុនអាចចូលប្រទេសនូវែលសេឡង់បាន ដរាបណាពួកគេមានភស្តុតាងបញ្ជាក់ពីការចាក់ថ្នាំបង្ការជាមួយនឹងវ៉ាក់សាំងដែលត្រូវបានអនុម័ត។ ពួកគេក៏ត្រូវបានតម្រូវឱ្យធ្វើតេស្តអវិជ្ជមាន COVID-19 មុនចេញដំណើរផងដែរ។
នាយករដ្ឋមន្ត្រីនូវែលសេឡង់លោកស្រី Jacinda Ardern បានអះអាងថា ការងើបឡើងវិញនៃវិស័យទេសចរណ៍របស់ប្រទេសខ្លួន គឺមិនអាចខ្វះបានក្នុងការកសាងឡើងវិញនូវសេដ្ឋកិច្ចដែលរងគ្រោះដោយជំងឺរាតត្បាតនោះឡេីយ។
លោកស្រីបន្ថែមថា ការចាប់ផ្ដើមឡើងវិញពេញលេញនៃវិស័យទេសចរណ៍អន្តរជាតិ និងការធ្វើដំណើរអាជីវកម្មត្រូវបានរំពឹងទុកនាពេលអនាគតដ៏ខ្លីខាងមុខនេះ៕ ប្រភព៖ NHK ប្រែសម្រួល៖ ទីណា និងបុត្រា