មន្ត្រីជាន់ខ្ពស់​ក្រសួងយុត្តិធម៌​ផ្អែកលើ​ទិដ្ឋភាព​ច្បាប់​ចំនួន​ពីរ​ចំណុច ឆ្លើយតប​ទៅនឹង​សំណើ​របស់​តំណាងគណបក្ស​ភ្លើងទៀន​

ភ្នំពេញ​៖​ ឯកឧត្តម គឹម សន្តិភាព និងឯកឧត្តម ជិន ម៉ា​លីន រដ្ឋលេខាធិការ​ក្រសួងយុត្តិធម៌ ទទួល​ជួបពិភាក្សា​ការងារ ជាមួយ​លោកស៊ុន ឆ័យ តំណាង​គណបក្ស​ភ្លើងទៀន នៅ​ទីស្តីការ​ក្រសួងយុត្តិធម៌​។

ទាក់ទង​ជំនួប​នា​រសៀល​ថ្ងៃទី​៣ ខែឧសភា ឆ្នាំ​២០២២​នេះ  ឯកឧត្តម ជិន ម៉ា​លីន រដ្ឋលេខាធិការ​និង​ជា​អ្នកនាំពាក្យ ក្រសួងយុត្តិធម៌​បាន​ឲ្យ​ដឹងថា លទ្ធផល​នៃ​ជំនួប​ទទួលបាន​ដូចខាងក្រោម​៖

​តំណាង​គណបក្ស​ភ្លើងទៀន​បានស្នើ​សុំ​ចំនួន​ពីរ​ចំណុច៖

១. ស្នើសុំ​ឱ្យមាន​ការទម្លាក់​បទ​ចោទ និង​ការដោះលែង​ឱ្យនៅ​ក្រៅ​ឃុំ ចំពោះ​សកម្មជន​គណបក្ស​ភ្លើងទៀន​ដែល កំពុងស្ថិត​ក្នុង​ដំណើរ​នីតិវិធីតុលាការ​។​

២.​ស្នើសុំ​ឱ្យមាន​ការពន្យា​នីតិវិធីតុលាការ​លើ​សក​ម្ម​ជន​គណបក្ស​ភ្លើងទៀន​ដែល​កំពុង​ស្ថិតក្នុង​ចំណាត់ការ​របស់​

​តុលាការ ដោយ​កុំឱ្យ​មានការ​កោះហៅ​ក្នុងអំឡុងពេល​រៀបចំ​ការបោះឆ្នោត​ឃុំ​-​សង្កាត់ ខាងមុខនេះ​។​

ប្រភព​ដដែល​បន្តថា​ ជាការ​ឆ្លើយតប​តំណាង​ក្រសួង​ក្រសួងយុត្តិធម៌​បានបញ្ជាក់​ជូន​ដោយ​ផ្អែកលើ​ទិដ្ឋភាព​ច្បាប់​ចំនួន​២​ចំណុច​ដូចខាងក្រោម​៖

​ទី​១-​ពាក់ព័ន្ធ​នឹង​ការស្នើសុំ​ឱ្យមាន​ការទម្លាក់​បទ​ចោទ និង​ការដោះលែង​ឱ្យនៅ​ក្រៅ​ឃុំ ចំពោះ សកម្មជន​គណបក្ស​ភ្លើងទៀន​ដែល​កំពុង​ស្ថិតក្នុង​ដំណើរការ​នីតិវិធីតុលាការ​៖

​តំណាង​ក្រសួងយុត្តិធម៌​បាន​បញ្ជាក់ថា តាម​គោលការណ៍​ច្បាប់ ការទម្លាក់​ចោល​បទ​ចោទ ឬ​ការដោះលែង​ឱ្យនៅ​ក្រៅ​ឃុំ ជា​សមត្ថកិច្ច​របស់​តុលាការ​ដែលជា​ស្ថាប័ន​ឯករាជ្យ​ដោយ​ផ្អែកលើ​អង្គហេតុ ​និង​អង្គច្បាប់​ហើយ​ក្រសួងយុត្តិធម៌​ដែលជា ស្ថាប័ន​នីតិប្រតិបត្តិ​ពុំមាន​សមត្ថកិច្ច និង​សិទ្ធិ​អំណាច​ក្នុងការ​ជ្រៀតជ្រែក​កិច្ចការ​របស់​តុលាការ​នោះទេ​។​

​តំណាង​ក្រសួងយុត្តិធម៌​បានបញ្ជាក់​បន្ថែមថា មានតែ​ការចូលរួម​នៅក្នុង​ដំណើរការ​នីតិវិធី​របស់តុលាការ​ទេ ដែលជា​មធ្យោបាយ​ខាង​ផ្លូវច្បាប់​តែមួយគត់​ក្នុងការ​ការពារ​ខ្លួន​ ដោយ​គួរ​ពឹងពាក់​មេធាវី​ក្នុង​ការជួយ​ការពារ​ក្តី​នៅក្នុង​ដំណើរការ​នីតិវិធី​របស់​តុលាការ​។​

​ទី​២-​ពាក់ព័ន្ធ​ការស្នើសុំ​ឱ្យមាន​ការពន្យា​រ​នីតិវិធីតុលាការ​លើ​សក​ម្ម​ជន​គណបក្ស​ភ្លើងទៀន​ដែល​កំពុង​ស្ថិតក្នុង​ចំណាត់​

​ការ​របស់​តុលាការ ដោយ​កុំឱ្យ​មានការ​កោះហៅ​ក្នុងអំឡុងពេល​រៀបចំ​ការបោះឆ្នោត​ឃុំ​- សង្កាត់ខាងមុខនេះ​ ក្រសួងយុត្តិធម៌​ពុំមាន​សមត្ថកិច្ច​ក្នុងការ​បង្គាប់បញ្ជា​ទៅ​តុលាការ​នោះទេ​។​ កន្លងមក​ក្រសួងយុត្តិធម៌​ពុំដែល​ណែនាំ​ឱ្យមាន​ការពន្យារ​នីតិវិធីតុលាការ​នោះទេ​ គឺ​មានតែ​ផ្តល់​គោលការណ៍​ណែនាំ​ឱ្យ​ព​ន្លឿ​ន​ដំណើរការ​នីតិវិធី​សំណុំរឿង​ដោយ​ផ្អែកទៅលើ​ផ្លូវច្បាប់​។​ដូចជា​ក្នុង​យុទ្ធនាការ​នៃ​ការដោះស្រាយ​ការកកស្ទះ​សំណុំរឿង​ជាដើម​ដើម្បី​ដោះស្រាយ​ការកកស្ទះ សំណុំរឿង និង​ភាព​ចង្អៀត​ណែន​នៅតាម​ពន្ធនាគារ​។

ឯកឧត្តម ជិន ម៉ា​លីន បានបញ្ជាក់​ទៀតថា តំណាង​ក្រសួងយុត្តិធម៌​បាន​ទទួលយក​សំណើ​របស់​តំណាង​គណបក្ស ភ្លើងទៀន ​ដើម្បី​ពិនិត្យ​ និង​ពិចារណា​ទៅតាម​សមត្ថកិច្ច​របស់​ក្រសួង​ដែល​ច្បាប់​អនុញ្ញាត ​និង​បានស្នើ​ទៅ​តំណាង​គណបក្ស​ភ្លើងទៀន​ឱ្យជួយ​ធ្វើការ​ណែនាំ​ទៅ​សកម្មជន​របស់ខ្លួន​ក្នុង​ការគោរព​ច្បាប់​ឱ្យបាន​ខ្ជាប់ខ្ជួន ​ប្រសិនបើ​មិន​ចង់ឱ្យមាន​ការអនុវត្ត​ច្បាប់​៕  

ដោយ​៖ពល​ជ័យ​

រូបភាព៖ហ្វេសប៊ុក ឯកឧត្តម ជិន ម៉ាលីន

ទាវ សារៈមុនិន្ទ
ទាវ សារៈមុនិន្ទ
ជាការីនិពន្ធគេហទំព័រ ដែលទទួលខុសត្រូវលើការផ្សាយអត្ថបទ ខ្លឹមសាររូប កែសម្រួលទម្រង់អត្ថបទ កែអក្ខរាវិរុទ្ធលើគេហទំព័រអប្សរាសង់ត្រាល់ ផ្នែក Politico360 ។ រយៈពេលជិត២ឆ្នាំមកនេះ លោកក៏មាននាទីជាអ្នកអង្កេត និងតាមដានអំពីព័ត៌មានជាតិ និងអន្តរជាតិ ដែលចុះផ្សាយទាក់ទងនឹងនយោបាយកម្ពុជាផងដែរ៕
ads banner
ads banner
ads banner