សម្តេចតេជោ៖ ត្រកូលហ៊ុនគ្រប់ជំនាន់ស្មោះត្រង់ និងការពារចំពោះព្រះមហាក្សត្រ ចំពោះរាជបល្ល័ង្គ និងរបបរាជានិយម
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា ត្រកូលហ៊ុនគ្រប់ជំនាន់តាំងពីជីដូនជីតា ឪពុកម្តាយរបស់សម្តេច គឺមានការស្មោះត្រង់ និងការពារចំពោះព្រះមហាក្សត្រចំពោះរាជបល្ល័ង្គ និងរបបរាជានិយម។
សម្តចតេជោ ហ៊ុន សែន បានសរសេរលេីបណ្តាញសង្គមហ្វេសប៊ុកនៅមុននេះបន្តិចថា “បងប្រុសទោះបីបងបានចែកឋានទៅហើយក្តីតែកេរ្តិ៍ឈ្មោះរបស់បងបានស្ថិតនៅជាមួយជាតិ សាសនានិងព្រះមហាក្សត្រជានិច្ច។ មុននេះបន្តិចព្រះមហាក្សត្រជាទីគោរពសក្ដារះរបស់យើងបានប្រោសប្រទាននូវគោរមងារសម្រាប់បងគឺជាសម្តេចឧត្តមទេពញាណហ៊ុន ណេង។ តើបងនៅចាំទេគឺក្បែរកន្លែងតំកល់សពបងនេះហើយដែលបងនិងខ្ញុំចូលរួមធ្វើបាតុកម្មប្រឆាំងពួកធ្វើរដ្ឋប្រហារនិងទាមទារប្រគល់តំណែងថ្វាយសម្តេចឪយើងវិញកាលពីថ្ងៃ២៣មិនា១៩៧០ដែលពេលនោះ បងអាយុ២០ឆ្នាំ ឯខ្ញុំអាយុ១៨ឆ្នាំ។”
សម្តេចតេជោ ហ៊ន សែន បានបញ្ជាក់ថា “ត្រកូលហ៊ុនរបស់យើងគ្រប់ជំនាន់តាំងពីជីដូនជីតា ឪពុកម្តាយយើងរហូតដល់ខ្លួនយើងតែងមានការស្មោះត្រង់ចំពោះព្រះមហាក្សត្រចំពោះរាជបល្ល័ង្គនិងរបបរាជានិយម។ ប្អូនជឿជាក់ថា កូនចៅយើងទាំងអស់នឹងដើរតាមផ្លូវ ដែលយើងបានដើរកន្លងមកដោយធានាដល់កិច្ចការពាររបបរាជានិយមការពារព្រះមហាក្សត្រនិងព្រះរាជបល្ល័ង្កដោយការស្មោះត្រង់”៕
ដោយ៖ពលជ័យ
រូបភាព៖ហ្វេសប៊ុកសម្តេចតេជោ ហ៊ុន សែន
