អ្នកដំណើរឆ្លងកាត់អាកាសយានដ្ឋានអន្តរជាតិទាំងបីមានកំណើន
ភ្នំពេញ៖អាកាសយានដ្ឋានអន្តរជាតិទាំងបីរបស់កម្ពុជាដែលស្ថិតរាជធានីភ្នំពេញ ខេត្តសៀមរាប និង ខេត្តព្រះសីហនុ អ្នកធ្វើដំណើរឆ្លងកាត់មានចំនួនកើនឡើងក្នុងតួលេខពីរខ្ទង់បន្ទាប់កម្ពុជាទទួលជោគជ័យលើសមរភូមិប្រយុទ្ធនឹងជំងឺកូវីដ១៩តាមរយៈគោលនយោបាយស្រោចវ៉ាក់សាំងរបស់រាជរដ្ឋាភិបាល។
ក្នុងកិច្ចប្រជុំត្រីមាសទី២ឆ្នាំ២០២២នៃគណ:កម្មការតាមដាននិងត្រួតពិនិត្យការសាងសង់អាកាសយានដ្ឋានអន្តរជាតិភ្នំពេញ ការសាងសង់អាកាសយានដ្ឋានអន្តរជាតិសៀមរាប និង ការសាងសង់អាកាសយានដ្ឋានដទៃទៀតនៅក្នុងព្រះរាជាណា ចក្រកម្ពុជានៅថ្ងៃទី១១ខែឧសភាឆ្នាំ២០២២បានបង្ហាញនូវតួលេខសង្ខេបនៃអ្នកធ្វើដំណើរឆ្លងកាត់អាកាសយានដ្ឋានអន្តរជាតិទាំងបីនៅកម្ពុជា (ភ្នំពេញ សៀមរាប និងព្រះសីហនុ) គឺ បានកើនពី២ភាគរយ នៅខែមេសាឆ្នាំ២០២១ ដល់១៣ ភាគរយនៅខែមេសាឆ្នាំ២០២២កន្លងទៅថ្មីៗនេះបើធៀបនឹងតួលេខកាលពីឆ្នាំ២០១៩ពោលគឺមុនពេលការរាតត្បាតនៃកូវីដ-១៩ចាប់ផ្តើម។
ប្រភពដដែលបន្តថា ក្នុងខែមេសាកន្លងទៅនេះ អ្នកដំណើឆ្លងកាត់អាកាសយានដ្ឋានអន្តរជាតិទាំងបី មានចំនួនប្រមាណ ជាង១២ម៉ឺនាក់ដែលជាសញ្ញានៃកំណើនល្អប្រសើរសម្រាប់វិស័យអាកាសចរណ៍ស៊ីវិល និងទេសចរណ៍នៅកម្ពុជា ។ លទ្ធផលនេះមិនអាចសម្រេចបានឡើយបើគ្មានគោលនយោបាយចាក់វ៉ាក់សាំងដ៏ត្រឹមត្រូវនិងជោគជ័យរបស់រាជរដ្ឋាភិបាល ក្នុងការប្រយុទ្ធប្រឆាំង ការឆ្លងរាលដាលជំងឺកូវីដ-១៩ និងជាពិសេសសុខសន្តិភាព។
លទ្ធផលសំខាន់មួយដែលគណ:កម្មការត្រួតពិនិត្យការសាងសង់អាកាសយានដ្ឋានអន្តរជាតិនៅកម្ពុជាសម្រេចបាន នាពេលនេះ គឺរបាយការណ៍សិក្សាលម្អិត ដោយក្រុមហ៊ុនSuezដោយមានការផ្តល់ហិរញ្ញប្បទានដោយក្រុមហ៊ុន សម្បទានិក SCA លើប្រព័ន្ធរំដោះទឹកនៅអាកាសយានដ្ឋានអន្តរជាតិខេត្តព្រះសីហនុ។ លទ្ធផលនៃការសិក្សានេះ នឹងត្រូវរៀបចំដាក់បញ្ចូលទៅក្នុងផែនការមេសម្រាប់ការអភិវឌ្ឍតំបន់ជុំវិញអាកាសយានដ្ឋានសម្រាប់ពេលអនាគត៕ដោយ៖AMS
