មេដឹកនាំអាស៊ាន និងមេដឹកនាំអាមេរិក បញ្ជាក់ការប្តេជ្ញារួមគ្នាកសាងទំនាក់ទំនង (Video Inside)
មេដឹកនាំអាស៊ាននិងប្រធានាធិបតីសហរដ្ឋអាមេរិក បានបញ្ជាក់ការប្តេជ្ញាចិត្តរួមគ្នាក្នុងការ ពង្រឹងនិងកសាងទំនាក់ទំនងដៃគូសន្ទនាអាស៊ានអាមេរិកឱ្យកាន់តែទូលំទូលាយនិងចាត់ទុក កិច្ចសហប្រតិបត្តិការជាដៃគូនេះ ជាការដែលមិនអាចខ្វះបានឡើយ។ ការបញ្ជាក់ការប្តេជ្ញាចិត្តនេះ បានប្រកាសតាមរយៈសេចក្តីប្រកាសព័ត៌មានរបស់ក្រសួងការបរទេសកម្ពុជា ក្រោយកិច្ច ប្រជុំកំពូលពិសេសអាស៊ានអាមេរិកបានបញ្ចប់។
កម្ពុជាដែលជាប្រធានអាស៊ានក្នុងឆ្នាំ២០២២ បានធ្វើជាសហប្រធានរួមជាមួយប្រធានាធិបតីអាមេរិកលោក ចូ បៃដិន ក្នុងកិច្ចប្រជុំកំពូល ពិសេសអាស៊ានអាមេរិករវាងពីថ្ងៃទី១២ដល់១៣ឧសភាក្នុងរដ្ឋធានីវ៉ាស៊្ហីនតោនឌីស៊ី។
ក្នុងកិច្ចប្រជុំកំពូលពិសេសនេះ, សម្តេចតេជោ ហ៊ុន សែន និងបណ្តាមេដឹកនាំអាស៊ាន ត្រូវបានប្រធានាធិបតីអាមេរិក និងអនុប្រធានាធិបតីលោកស្រី កាម៉ាឡា ហារីស និងប្រធានសភាតំណាង រាស្ត្រអាមេរិកលោកស្រីណានស៊ី ប៉េឡូស៊ី បានទទួលរាក់ទាក់ក្នុងការអញ្ជើញចូលរួមក្នុងកម្មវិធីផ្សេងៗ។
ក្នុងកិច្ចប្រជុំរយៈពេល២ថ្ងៃកន្លងមកនេះ, មេដឹកនាំអាស៊ាននិងមេដឹកនាំសហរដ្ឋអាមេរិក បានជជែកផ្លាស់ប្តូរទស្សនៈលើវិស័យកិច្ចសហប្រតិបត្តិការជាច្រើន ពាក់ព័ន្ធនឹងការ ប្រយុទ្ធ ប្រឆាំងជម្ងឺរាតត្បាតកូវីដ១៩និងការស្តារឡើងវិញ, ការលើកកម្ពស់ទំនាក់ទំនងសេដ្ឋកិច្ចឱ្យ កាន់តែរឹងមាំ, ការលើកកម្ពស់កិច្ចសហប្រតិបត្តិការលំហសមុទ្ទ, ការលើកកម្ពស់ការ តភ្ជាប់ រវាងប្រជាជន និងប្រជាជន, ការគាំទ្រការអភិវឌ្ឍន៍ក្នុងអនុតំបន់, ការប្រើប្រាស់បច្ចេកវិទ្យា និង ការលើកកម្ពស់នវានុវត្តន៍, ការដោះស្រាយការប្រែប្រួលអាកាសធាតុនិងការរក្សាសន្តិ ភាព និងការកសាងទំនុកចិត្ត។
សម្តេចតេជោ ហ៊ុន សែន ដែលជាប្រធានអាស៊ាន ក្នុងអំឡុងពេលបិទកិច្ចប្រជុំកំពូលពិសេស បានថ្លែងអំណរគុណដល់លោកប្រធានាធិបតីអាមេរិក ចូ បៃដិន ដែលបានធ្វើការប្តេជ្ញាគាំទ្រ ភាពជាប្រធានអាស៊ានរបស់កម្ពុជា។
សម្តេចបានថ្លែងទន្ទឹងរង់ចាំស្វាគមន៍លោក ចូ បៃដិនក្នុងកិច្ចប្រជុំកំពូលអាស៊ានអាមេរិកនៅកម្ពុជា ដែលគ្រោងនឹងធ្វើនៅក្នុងខែវិច្ឆិកាឆ្នាំ២០២២នេះ។
សម្តេចនាយករដ្ឋមន្ត្រី និងគណៈប្រតិភូ បានអញ្ជើញមកដល់កម្ពុជាវិញនាយប់ថ្ងៃទី១៥ឧសភា និងសម្តេចត្រៀមនឹងអញ្ជើញបំពេញទស្សនកិច្ចក្នុងប្រទេសស្វីសជាបន្តទៀតក្នុងពេល៤ថ្ងៃ ខាង មុខនេះដើម្បីចូលរួមកិច្ចប្រជុំវេទិកាសេដ្ឋកិច្ចពិភពលោក។