ប្រធានមន្ទីរឧស្សាហកម្មខេត្តកំពត៖ កត្តាអាកាសធាតុទំនងជាធ្វើឱ្យទិន្នផលអំបិល ដែលប្រមូលបានធ្លាក់ចុះច្រើនក្នុងឆ្នាំនេះ បើធៀបនឹងឆ្នាំមុន
ភ្នំពេញ៖ ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពត លោក សុខ គឹមជឿន បានឱ្យដឹងថា ទោះបីផ្ទៃដីបង្កបង្កើនផលអំបិល និងកម្លាំងពលកម្មផលិតក្នុងឆ្នាំ២០២២នេះនៅដដែល បើធៀបនឹងឆ្នាំ២០២១ ប៉ុន្តែកត្តាអាកាសធាតុដែលមានភ្លៀងធ្លាក់ជាបន្តបន្ទាប់ចាប់តាំងពីខែកុម្ភៈ រហូតមកដល់ពេលនេះបានធ្វើឱ្យទិន្នផលអំបិលដែលប្រមូលបានធ្លាក់ចុះច្រើន បើធៀបនឹងឆ្នាំមុន។
តាមទិន្នន័យបឋមផលអំបិលដែលប្រមូលបានក្នុងខេត្តកំពត គិតមកដល់ពេលនេះមានប្រមាណជិត ៣០,០០០តោន ខណៈដែលផលអំបិលសល់ក្នុងឃ្លាំងស្តុកអាចមានចន្លោះពី ២,០០០ ទៅ ៣,០០០តោន។ លោកបន្តថា ដោយសារពេលនេះ រដូវភ្លៀងបានចូលមកដល់ហើយ ដូច្នេះការប្រមូលផលអំបិលនឹងមិនបានច្រើនទៀតទេក្នុងឆ្នាំ២០២២នេះ។
ទោះយ៉ាងណា នៅពេលនេះ ក្រសួងឧស្សាហកម្ម ក្រសួងសេដ្ឋកិច្ច និងផ្នែកពាក់ព័ន្ធក៏កំពុងគិតពីការនាំចូលអំបិលមួយចំនួនយកមកបំពេញតម្រូវការក្នុងស្រុកផងដែរ ដើម្បីកុំឱ្យឈ្មួញអាចដំឡើងតម្លៃអំបិលតាមចិត្ត។
សូមជម្រាបថា ខណៈរដូវវស្សាចាប់ផ្តើមចូលមកដល់ហើយនោះ ការប្រមូលផលអំបិលនៅក្នុងខេត្តកំពត ដែលជាកន្លែងផលិតអំបិលធំជាងគេនៅកម្ពុជា ទើបទទួលបានតិចជាង ៥០ភាគរយនៅឡើយ បើធៀបទៅនឹងឆ្នាំ ២០២១ ដែលការធ្លាក់ចុះនេះនឹងជំរុញនាំឱ្យកម្ពុជាឈានទៅនាំចូលអំបិលពីក្រៅប្រទេសមកផ្គត់ផ្គង់តម្រូវការនៅក្នុងស្រុក។ នេះបើតាមអ្នកនៅក្នុងវិស័យផលិតអំបិលនៅកម្ពុជា។
ខេត្តកំពត និងខេត្តកែប គឺជាទីតាំងផលិតអំបិលនៅកម្ពុជា។ ជាធម្មតារដូវកាលផលិតអំបិល គឺចាប់ពីចុងខែធ្នូដល់ពាក់កណ្តាលខែឧសភានៃឆ្នាំនីមួយៗ ប៉ុន្តែក៏មានឆ្នាំខ្លះដែលអាកាសធាតុក្តៅអូសបន្លាយ ការផលិតអាចរហូតដល់ខែមិថុនា ផងដែរ។ សូមរំលឹកផងដែរថា កាលពីឆ្នាំ ២០២១ ខេត្តកំពតផលិតអំបិលបានជាង ៦៨,០០០តោន នៅលើផ្ទៃដី ៣,៧២៦ហិកតា៕ ប្រភព៖ ភ្នំពេញប៉ុស្តិ៍