រុស្ស៊ីបណ្ដេញអ្នកការទូតរាប់សិបនាក់មកពីបារាំង អ៊ីតាលី និងអេស្ប៉ាញ
ទីក្រុងម៉ូស្គូបណ្តេញអ្នកការទូតបារាំង អ៊ីតាលី និងអេស្ប៉ាញ ជាការសងសឹកចំពោះការបណ្តេញអ្នកការទូតរុស្ស៊ីចេញពីបណ្តាប្រទេសអឺរ៉ុប ដែលជាសកម្មភាពរួមគ្នាក្នុងការឆ្លើយតបទៅនឹងសង្គ្រាមឈ្លានពានរបស់រុស្ស៊ីនៅអ៊ុយក្រែន។
ក្នុងសេចក្តីថ្លែងការណ៍មួយកាលពីថ្ងៃពុធ ក្រសួងការបរទេសរុស្ស៊ីនិយាយថា ខ្លួននឹងបណ្តេញ «បេសកជនការទូតបារាំង» ចំនួន ៣៤ នាក់នៅរុស្ស៊ី ដោយទុកពេលឱ្យ២សប្តាហ៍ដើម្បីចាកចេញពីប្រទេស។
សេចក្តីថ្លែងការណ៍កត់សម្គាល់ថា ទីក្រុងម៉ូស្គូធ្វើសេចក្តីប្រកាសបន្ទាប់ពីការកោះហៅឯកអគ្គរដ្ឋទូតបារាំងនៅរុស្ស៊ីលោក Pierre Levy ហើយប្រាប់លោកថា ការបណ្តេញបុគ្គលិកការទូតរុស្ស៊ីចំនួន ៤១ នាក់កាលពីខែមេសាគឺជា «ការសម្រេចចិត្តបង្កហេតុ និងគ្មានមូលដ្ឋាន»។
ក្រសួងការបរទេសរុស្ស៊ីនិយាយនៅពេលក្រោយទៀតថា បុគ្គលិក ២៧ នាក់នៃស្ថានទូតអេស្ប៉ាញប្រចាំទីក្រុងម៉ូស្គូ និងស្ថានអគ្គកុងស៊ុលអេស្ប៉ាញនៅទីក្រុង Saint Petersburg «ត្រូវបានប្រកាសថាជាបុគ្គលមិនទទួលស្វាគមន៍» ហើយនឹងមានពេល៧ថ្ងៃចេញពីរុស្ស៊ី។ ក្រសួងប្រាប់ឯកអគ្គរដ្ឋទូតអេស្ប៉ាញលោក Marcos Gomez Martinez ថា ការបណ្តេញអ្នកការទូតរុស្ស៊ីចេញពីទីក្រុងម៉ាឌ្រីដ «មានផលប៉ះពាល់អវិជ្ជមានដល់ទំនាក់ទំនងរុស្ស៊ី-អេស្ប៉ាញ»។
អេស្ប៉ាញរិះគន់រុស្ស៊ីចំពោះទង្វើនេះ ដោយក្រសួងការបទេសនិយាយក្នុងសេចក្ដីថ្លែងការណ៍មួយថា អាជ្ញាធររុស្ស៊ីយកត្រូវលើការសម្រេចចិត្តរបស់ខ្លួន ដោយផ្អែកលើការស្រុះគ្នាបណ្តេញមន្ត្រីស្ថានទូតរុស្ស៊ី ២៧ នាក់ក្នុងខែមេសា ប៉ុន្តែការបណ្តេញចេញពេលនោះផ្អែកលើហេតុផលសន្តិសុខត្រឹមត្រូវ មិនដូចជាទង្វើរបស់រុស្ស៊ីនាពេលនេះទេ។
ខណៈមិនទាន់មានសេចក្តីថ្លែងការណ៍ផ្លូវការណាមួយ អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova និយាយប្រាប់ទីភ្នាក់ងារសារព័ត៌មានរុស្ស៊ីថា អ្នកការទូតអ៊ីតាលី ២៤ នាក់ក៏ត្រូវបណ្តេញចេញផងដែរ។ ក្រសួងការបរទេសអ៊ីតាលីបញ្ជាក់ពីការបណ្ដេញចេញនេះ ហើយនាយករដ្ឋមន្ត្រីអ៊ីតាលីលោក Mario Draghi ថ្កោលទោសការសម្រេចចិត្តរបស់រុស្ស៊ីថាជា «ទង្វើអរិភាព» ប៉ុន្តែនិយាយថា បណ្តាញការទូតត្រូវតែនៅតែបើកចំហ។
ទន្ទឹមនឹងនេះ ក្រសួងការបរទេសបារាំងនិយាយថា បារាំង«ថ្កោលទោសយ៉ាងខ្លាំង» ចំពោះការបណ្តេញអ្នកការទូតរបស់ខ្លួន ដោយបន្ថែមថាជំហានពីទីក្រុងម៉ូស្គូ «មិនមានមូលដ្ឋានស្របច្បាប់» ព្រោះអ្នកការទូតបារាំងនៅរុស្ស៊ីធ្វើត្រឹមត្រូវតាម «ក្របខ័ណ្ឌនៃអនុសញ្ញាទីក្រុងវីយែនស្តីពីទំនាក់ទំនងការទូត និងកុងស៊ុល» ខណៈក្រុងប៉ារីសបណ្តេញបុគ្គលិករុស្ស៊ីកាលពីខែមុន ដោយសង្ស័យថាពួកគេជាអ្នកស៊ើបការណ៍សង្ងាត់។
ទំនាក់ទំនងបណ្ដាប្រទេសលោកខាងលិច ជាមួយរុស្ស៊ីកាន់តែដុនដាបទៅៗ ក្រោយមេដឹកនាំរុស្ស៊ី លោក វ្ល៉ាឌីមៀ ពូទីន បញ្ជូនកងទ័ពទៅឈ្លានពានអ៊ុយក្រែនកាលពីចុងខែកុម្ភៈ ដែលជាការឆ្លើយតប បស្ចិមលោកផ្ដាច់រុស្ស៊ីឱ្យនៅឯកោ ដោយដាក់ទណ្ឌកម្មសេដ្ឋកិច្ចយ៉ាងធ្ងន់ធ្ងរ។
ប្រភព៖ Aljazeera
