សហភាពអឺរ៉ុបដាក់ចេញផែនទីបង្ហាញផ្លូវ ៣០០ ពាន់លានអឺរ៉ូ ដើម្បីឈប់ប្រើប្រាស់ថាមពលរុស្ស៊ី
កាលពីថ្ងៃពុធ ទី១៨ ឧសភា ប្រមុខនីតិប្រតិបត្តិសហភាពអឺរ៉ុបបានប្រកាសផែនទីបង្ហាញផ្លូវមួយដើម្បីជួយប្លុក២៧ប្រទេសនេះក្នុងការបោះបង់ការប្រើប្រាស់ប្រភពថាមពលនាំចូលពីរុស្ស៊ី ដោយស្នើកញ្ចប់ថវិកាចំនួន ៣០០ ពាន់លានអឺរ៉ូ (ប្រមាណ ៣១៥ ពាន់លានដុល្លារ) ដើម្បីវិនិយោគលើគម្រោងជាច្រើនដែលរួមមានមធ្យោបាយប្រើប្រាស់ឥន្ធនៈមានទិន្នផលខ្ពស់ជាងមុន និងបច្ចេកវិទ្យាថាមពលកកើតវិញ។
គំនិតផ្ដួចផ្ដើមវិនិយោគ REPowerEUរបស់គណៈកម្មការអឺរ៉ុបគឺមានបំណងដើម្បីពង្រឹងគោលនយោបាយអាកាសធាតុអឺរ៉ុប និងដកហូតប្រាក់ចំណូលរាប់សិបពាន់លានពីរុស្ស៊ី ដែលជាអ្នកផ្គត់ផ្គង់ប្រេង ឧស្ម័នធម្មជាតិ និងធ្យូងថ្មចម្បងរបស់សហភាពអឺរ៉ុប។
ប្រធានគណៈកម្មការអឺរ៉ុបលោកស្រីអឺស៊ូឡា វ៉ុន ឌែរ ឡេយែនបាននិយាយថា៖ «យើងកំពុងយកមហិច្ឆតារបស់យើងទៅកម្រិតមួយទៀត ដើម្បីប្រាកដថាយើងឯករាជ្យពីឥន្ធនៈផូស៊ីលរបស់រុស្ស៊ីឱ្យបានលឿនតាមដែលអាចធ្វើទៅបាន»។
ដោយសង្គ្រាមរបស់រុស្សីនៅអ៊ុយក្រែនហាក់ដូចជាមិនមានទីបញ្ចប់ និងភាពរង្គោះរង្គើសន្តិសុខថាមពលនៅទ្វីបអឺរ៉ុប សហភាពអឺរ៉ុបបានប្រញាប់ប្រញាល់តម្រឹមគោលនយោបាយភូមិសាស្ត្រនយោបាយរបស់ខ្លួន ជាមួយនឹងគោលនយោបាយអាកាសធាតុសម្រាប់ទសវត្សខាងមុខនេះ។
សហភាពអឺរ៉ុបគ្រោងអនុវត្តការហាមឃាត់ការចូលធ្យូងថ្មពីរុស្ស៊ីនៅខែសីហានេះ ហើយបានប្ដេជ្ញាកាត់បន្ថយការនាំចូលឧស្ម័នធម្មជាតិចំនួនពីរភាគបី ត្រឹមចុងឆ្នាំនេះ។ ទន្ទឹមនឹងនេះសំណើហាមឃាត់ការនាំចូលប្រេងរុស្ស៊ី ត្រូវបានរារាំងដោយប្រទេសហុងគ្រី និងប្រទេសគ្មានផ្លូវទឹកដទៃទៀតដែលព្រួយបារម្ភថាពួកគេមិនអាចរកប្រភពផ្សេងមកជំនួសបាន។
ក្នុងការព្យាយាមបញ្ចុះបញ្ចូលប្រទេសទាំងនេះឱ្យគាំទ្រការហាមឃាត់ប្រេងរុស្ស៊ី REPowerEU ក៏រួមមានកញ្ចប់ថវិកា ២ ពាន់លានអឺរ៉ូសម្រាប់ជួយប្រទេសដែលរំពឹងយ៉ាងខ្លាំងលើការនាំចូលប្រេងពីរុស្ស៊ី ហើយប្រឈមនឹងការលំបាកក្នុងស្វែងរកប្រភពមកជំនួស៕
ប្រភព៖ AP News
