ឥណ្ឌូនេស៊ីសម្រេចលុបបំរាមនាំចេញប្រេងដូងវិញ
ហ្សាកាតា៖ លោក ចូកូ វីដូដូ ប្រធានាធិបតីនៃប្រទេសឥណ្ឌូនេស៊ី បានថ្លែងកាលពីថ្ងៃទី១៩ ឧសភាថា បំរាមការនាំចេញប្រេងដូងរបស់ប្រទេសឥណ្ឌូនេស៊ីនឹងត្រូវដកចេញ នៅថ្ងៃទី២៣ ខែឧសភា ដោយសារតម្លៃជាមធ្យមរបស់ប្រេងឆាក្នុងស្រុកបានចាប់ផ្តើមធ្លាក់ចុះវិញហើយ។
លោក វីដូដូ ថា ប្រទេសឥណ្ឌូនេស៊ីត្រូវការប្រេងឆាប្រហែល ១៩៤ ០០០តោនក្នុងមួយខែ ហើយក្នុងខែមីនាមុននឹងមានការហាមឃាត់ការនាំចេញ ការផ្គត់ផ្គង់ក្នុងប្រទេសមានត្រឹមតែ ៦៤ ៥០០តោនប៉ុណ្ណោះ តែបន្ទាប់ពីការហាមឃាត់ការនាំចេញត្រូវបានដាក់ក្នុងខែមេសា ការផ្គត់ផ្គង់បានកើនឡើងដល់ ២១១ ០០០តោន។
លោកប្រធានាធិបតីបានមានប្រសាសន៍ថា តម្លៃប្រេងឆាមានតម្លៃប្រហែល ១៩ ៨០០រូពៀ (១,៣៥ ដុល្លារអាមេរិក) ក្នុងមួយលីត្រមុនហាមឃាត់ការនាំចេញ តែបច្ចុប្បន្នតម្លៃធ្លាក់ចុះមកនៅចន្លោះពី ១៧ ២០០រូពៀទៅ ១៧ ៦០០ រូពៀ ក្នុងមួយលីត្រ។
លោកបានបន្តថា ទោះបីជាមានការដកបម្រាមនេះក៏ដោយ ក៏រដ្ឋាភិបាលនឹងបន្តតាមដានស្ថានការណ៍នេះ ដើម្បីធានាថា តម្លៃប្រេឆាមានតម្លៃសមរម្យសម្រាប់ប្រជាពលរដ្ឋ៕ ប្រែសម្រួល៖ សារ៉ាត