ព្យុងយ៉ាង៖ កូរ៉េខាងជើងបានឲ្យដឹងនៅថ្ងៃទី២០ ខែឧសភានេះថា ខ្លួនកំពុងសម្រេចបាន “លទ្ធផលល្អ” ក្នុងការប្រយុទ្ធប្រឆាំងនឹងការផ្ទុះឡើងនៃ COVID-19 ដែលបានបញ្ជាក់ជាលើកដំបូងរបស់ប្រទេសនេះ ខណៈដែលចំនួនអ្នកដែលមានរោគសញ្ញាគ្រុនក្តៅ បានកើនឡើងជាង ២លាននាក់ ។

រលកនៃការឆ្លង COVID-19 ដែលកូរ៉េខាងជើងបានបញ្ជាក់ជាលើកដំបូង កាលពីសប្តាហ៍មុន បានធ្វើឱ្យមានការព្រួយបារម្ភអំពីកង្វះខាតធនធានវេជ្ជសាស្រ្ត និងវ៉ាក់សាំងនៅក្នុងប្រទេសឯកោ ដែលត្រូវបានដាក់ទណ្ឌកម្មយ៉ាងខ្លាំង ព្រោះតែកម្មវិធីអាវុធនុយក្លេអ៊ែររបស់ខ្លួន។

មន្ត្រីកូរ៉េខាងត្បូងម្នាក់បាននិយាយថា កូរ៉េខាងជើងមិនបានឆ្លើយតបទៅនឹងការផ្តល់ជូនពី កូរ៉េខាងត្បូង និងសហរដ្ឋអាមេរិក ដើម្បីបញ្ជូនជំនួយនោះទេ ដោយខ្លួនចាត់ទុកថាជាសត្រូវនោះ។

គិតថាត្រឹមល្ងាចថ្ងៃទី១៩ ឧសភា កូរ៉េខាងជើងបានរាយការណ៍ថា មនុស្ស ២.២៤ លាននាក់បានឈឺគ្រុនក្តៅ រួមទាំងអ្នកស្លាប់ ៦៥ នាក់ នេះបើយោងតាមទីភ្នាក់ងារសារព័ត៌មានរដ្ឋ KCNA របស់ខ្លួន៕ ប្រែសម្រួល៖ សារ៉ាត