ភ្នំពេញ៖ របាយការណ៍របស់អគ្គនាយកដ្ឋានកៅស៊ូបានឱ្យដឹងថា រយៈពេល ០៤ខែ ឆ្នាំ២០២២នេះ កម្ពុជាទទួលបានចំណូលជាង ១២៨លានដុល្លារ ពីការនាំចេញជ័រកៅស៊ូ និងឈើកៅស៊ូ។

បើតាមរបាយការណ៍ដដែលនេះ ចំណូលសរុបគិតត្រឹមខែមេសា ឆ្នាំ២០២២ ពីការនាំចេញជ័រកៅស៊ូ និងឈើកៅស៊ូ មានចំនួន ១២៨,៥៧០,៨៣៧ដុល្លារ ក្នុងនោះ ចំណូលពីការនាំចេញជ័រកៅស៊ូមានចំនួន ១២៧,៣៥៦,៣០២ដុល្លារ និងចំណូលពីការនាំចេញឈើកៅស៊ូមានចំនួន ១,២១៤,៥៣៥ដុល្លារ។

ចំពោះបរិមាណនៃការនាំចេញគិតត្រឹមខែមេសា ឆ្នាំ២០២២ កម្ពុជាបាននាំចេញជ័រកៅស៊ូ ចំនួន ៧៩,៣៥៦តោន កើនឡើងចំនួន ២,២២៣តោន ស្មើនឹង ៣% បើធៀបនឹងរយៈពេលដូចគ្នាឆ្នាំមុន។ រីឯការនាំចេញឈើកៅស៊ូវិញ សម្រេចបានចំនួន ៦,៦៣៨ម៉ែត្រគូប។

សម្រាប់តម្លៃលក់ជ័រកៅស៊ូមធ្យម គិតត្រឹមខែមេសា ឆ្នាំ២០២២ ថ្លៃ ១,៦០៥ដុល្លារ ក្នុងមួយតោន បានថយចុះចំនួន ៦១ដុល្លារ ក្នុងមួយតោន ស្មើនឹង ៤% បើធៀបនឹងរយៈពេលដូចគ្នានៃឆ្នាំមុន។

គិតត្រឹមខែមេសា ឆ្នាំ២០២២ ផ្ទៃដីកៅស៊ូសរុបមានចំនួន ៤០៤,០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០,១៩៣ហិកតា ស្មើនឹង ៧៧% និងផ្ទៃដីថែទាំមានចំនួន ៩៣,៨៥១ហិកតា ស្មើនឹង ២៣% ។

សូមជម្រាបថា នៅឆ្នាំ២០២១ កម្ពុជារកចំណូលបានជាង ៦១១លានដុល្លារ ពីការនាំចេញជ័រកៅស៊ូ និងឈើកៅស៊ូ។ ក្នុងនោះ នាំចេញជ័រកៅស៊ូមានចំនួន ៣៦៦,៣០០តោន និងនាំចេញឈើកៅស៊ូមានចំនួន ៤៥៤ម៉ែត្រគូប៕ ប្រភព៖ Freshnews ដោយ៖ ទីណា