ឯកឧត្តម ស សុខា រដ្ឋលេខាធិការក្រសួងអប់រំយុវជន និងកីឡា ជាអនុប្រធានសហព័ន្ធកីឡាបាល់ទះកម្ពុជា បានថ្លែងថា មេដាយសំរិទ្ធ ដែលដណ្តើមបានពីព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម គឺជាជោគជ័យមួយសម្រាប់កម្ពុជា និងជាទុនមួយបន្ថែមទៀត ត្រៀមសម្រាប់ស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។

ការថ្លែងលើកឡើងបែបនេះ បានធ្វើឡើងក្នុងបទសម្ភាសន៍គ្រា ឯកឧត្តម រដ្ឋលេខាធិការអញ្ជើញទៅទទួលអត្តពលិកត្រឡប់ពីចូលរួមស៊ីហ្គេម នៅប្រទេសវៀតណាម នាអាកាសយានដ្ឋានអន្តរជាតិភ្នំពេញ កាលពីល្ងាចថ្ងៃទី២៣ ម្សិលមិញនេះ។

ឯកឧត្តម រដ្ឋលេខាធិការ បានគូបញ្ជាក់ទៀតថា មេដាយសំរិទ្ធនេះ វាធ្វើឲ្យកម្ពុជាកាន់តែខិតខំពង្រឹងសមត្ថភាពបន្ថែមទៀត ព្រោះសមិទ្ធផលនេះ ធ្វើឲ្យប្រទេសជិតខាង មើលឃើញពីការអភិវឌ្ឍរបស់ក្រុមបាល់ទះកម្ពុជា។ ដូច្នោះហើយ សម្រាប់កម្ពុជាធ្វើជាម្ចាស់ផ្ទះ យើងនឹងរក្សាមេដាយសំរិទ្ធ ដែលដណ្តើមនៅប្រទេសវៀតណាម ។

ឯកឧត្តម បន្ថែមទៀតថា ក្នុងនាមជាសហព័ន្ធ សំណូមពរឲ្យកីឡាករគ្រូបង្វឹកខិតខំពង្រឹងសមត្ថភាពបន្ថែមទៀត ព្រោះជោគជ័យនេះ វាបានក្លាយចលករគៀងគរម្ចាស់ឧបត្ថម្ភឲ្យចូលរួមគាំទ្របង្កើត ព្រឹត្តិការណ៍ប្រកួតកម្រិតជាតិ ដើម្បីផ្តល់ឱកាសឲ្យកីឡាករបានប្រកួតប្រជែងបង្កើនបទពិសោធន៍ និងបច្ចេកទេស។

គួរបញ្ជាក់ថា ក្នុងព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម កម្ពុជាបានបញ្ជូន៣៣ប្រភេទកីឡា ទៅចូលរួម ក្នុងដណ្តើមបានមេដាយសរុប៦៣គ្រឿង មាស៩ ប្រាក់១៣ និងសំរិទ្ធ៤១គ្រឿង ជាប់ចំណាត់ថ្នាក់លេខ៨ លើប្រទេសឡាវ ព្រុយណា និងទីម័ រ៕ អត្ថបទ៖ ជាវ ចន្ធូ