អ្នកវិភាគចៅចាក់ស្មុក៖ គណបក្សភ្លើងទៀនគួរកុំព្យាយាមប្រើប្រាស់ល្បិចកលទុច្ចរិតដូចឆ្នាំ២០១៣ និងគួរទទួលស្គាល់បរាជ័យដ៏អាម៉ាស់ភ្លូកទឹកភ្លូកដីរបស់ខ្លួន ក្នុងការបោះឆ្នោតក្រុមប្រឹក្សាឃុំសង្កាត់ ៥ មិថុនា 

ភ្នំពេញ៖ ការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៥ នាថ្ងៃទី៥ ខែមិថុនា ឆ្នាំ២០២២ បានបិទបញ្ចប់ក្រោមបរិយាកាសល្អប្រសើរ គ្មានអំពើហិង្សា គ្មានការគំរាមកំហែង និងគៀបសង្កត់ណាមួយឡើយ។ ប្រជាពលរដ្ឋដែលមានឈ្មោះក្នុងបញ្ជីបោះឆ្នោតចំនួន ៧៧,៩១% បានអញ្ជើញទៅបោះឆ្នោត ដោយក្តីសប្បាយរីករាយ និងបានធ្វើការសម្រេចចិត្តក្នុងបន្ទប់សម្ងាត់ដើម្បីជ្រើសរើសគណបក្សនិងបេក្ខជនដែលខ្លួនស្រឡាញ់ពេញចិត្ត និងជឿជាក់សម្រាប់ការដឹកនាំគ្រប់គ្រង ផ្តល់សេវា និងបម្រើប្រជាពលរដ្ឋ អភិវឌ្ឍន៍ឃុំសង្កាត់របស់ខ្លួន។ លទ្ធផលបឋម បង្ហាញថា គណបក្សប្រជាជនកម្ពុជាបានឈ្នះដាច់នៅទាំង២៥ ខេត្ត-រាជធានី នៃប្រទេសកម្ពុជា។ ចំណែកអ្នកសង្កេតការណ៍ជាតិនិងអន្តរជាតិ ក៏បានអះអាងថាដំណើរការបោះឆ្នោតក្រុមប្រឹក្សាឃុំសង្កាត់មានភាពសេរី យុត្តិធម៌ និងត្រឹមត្រូវ និងប្រព្រឹត្តទៅក្រោមបរិយាកាសល្អប្រសើរ គ្មានការគំរាមកំហែង និងអំពើហិង្សាណាមួយឡើយ។ គណបក្សមួយចំនួនដូចជា គណបក្សយុវជនកម្ពុជា គណបក្សខ្មែរតែមួយ គណបក្សសញ្ជាតិកម្ពុជា គណបក្សខ្មែររួបរួមជាតិ បានចេញសេចក្តីថ្លែងការណ៍ជាបន្តបន្ទាប់ថា ការបោះឆ្នោតមានលក្ខណៈសេរី  ត្រឹមត្រូវ យុត្តិធម៌ និងគ្មានការគំរាមកំហែងទេ។

ប៉ុន្តែសម្រាប់គណបក្សភ្លើងទៀនដែលមានទណ្ឌិត សម រង្ស៊ី នៅបញ្ជាពីក្រោយថ្នាក់ដឹកនាំបក្សនេះរួមមាន ទាវ វណ្ណុល ស៊ុន ឆ័យនិងថាច់ សេដ្ឋា និងអង្គការសង្គមស៊ីវិលអព្យាក្រឹត្យបែបលម្អៀងមួយចំនួនដូចជា អង្គការលីកាដូ និងអង្គការអាដហុក អង្គការខុមហ្វ្រែល បាននិងកំពុងតែព្យាយាមឡាំប៉ា ប្រើប្រាស់ល្បិចកលទុច្ចរិតនានា ដើម្បីបំភ្លៃនិងបំភ័ន្តសាធារណៈមតិថា ដំណើរការបោះឆ្នោតក្រុមប្រឹក្សាឃុំសង្កាត់អាណត្តិទី៥ មិនសេរី មិនយុត្តិធម៌ និងមិនត្រឹមត្រូវ និងខិតខំបំភ្លៃថាមានការគំរាមកំហែង មានការទិញទឹកចិត្ត និងការគាបសង្កត់នានា។ នេះគឺជាល្បិចដដែលៗរបស់ក្រុមប្រឆាំង ដែលគេចវេសពីបរាជ័យដ៏អាម៉ាស់របស់ខ្លួន ដែលប្រជាពលរដ្ឋភាគច្រើនមិនគាំទ្រចំពោះការឃោសនាភូតកុហកបោកប្រាស់របស់ពួកគេ និងការធ្វើនយោបាយប្រឆាំងនឹងកម្ពុជាបំផ្លាញឆ្នាំងបាយរបស់ប្រជាពលរដ្ឋ។ ដើម្បីចិញ្ចឹមមហិច្ឆតាអំណាចរបស់ពួកគេ ក្រុមប្រឆាំងខិតខំប្រឹងប្រែងក្នុងការចិញ្ចឹមទំនាស់ និងបន្តធ្វើនយោបាយបញ្ច្រាស់ឆន្ទៈប្រជាពលរដ្ឋ និងប្រើប្រាស់គ្រប់ល្បិចកល ដើម្បីចិញ្ចឹមកំហឹងក្នុងចំណោមអ្នកគាំទ្ររបស់ខ្លួនគោលបំណងដើម្បី ទាញចំណេញនយោបាយទៅមុខទៀត។

កាលដែលគណបក្សភ្លើងទៀនព្យាយាមក្នុងការបំភ្លៃការពិតលើដំណើរការបោះឆ្នោតថាមិនសេរី ត្រឹមត្រូវ និងយុត្តិធម៌នេះមានហេតុផលច្រើនយ៉ាងដែលក្នុងនោះរួមមាន៖

លាក់បាំងភាពអាម៉ាស់នៃបរាជ័យរបស់ក្រុមប្រឆាំង៖ ជាល្បិចកលដដែលៗដែលក្រុមប្រឆាំងជ្រុលនិយម មិនហ៊ានទទួលស្គាល់ពីភាពអាម៉ាស់នៃការចាញ់ឆ្នោតរបស់ខ្លួន។ ពួកគេស្ថិតក្នុងអន្លង់នៃនយោបាយបោកប្រាស់ខ្លួនឯង និងឈ្លោះនឹងខ្លួនឯង ដោយមិនទទួលស្គាល់ពីការពិតជាក់ស្តែងដែលកំពុងកើតមាននៅកម្ពុជា នោះគឺប្រជាពលរដ្ឋខ្មែរលែងជឿការញុះញង់ និងការប្រើប្រាស់វោហាសាស្ត្របោកប្រាស់ ស្អប់ខ្ពើមជាតិសាសន៍ និងបញ្ឆេះកំហឹងវណ្ណៈរបស់ក្រុមប្រឆាំងទៀតហើយ។ បងប្អូនប្រជាពលរដ្ឋបានយល់ដឹងច្បាស់ណាស់រវាងការធ្វើជាក់ស្តែងរបស់គណបក្សប្រជាជនកម្ពុជា និងអំណួតគ្មាន ព្រំដែនរបស់ក្រុម ប្រឆាំង។ ដូច្នេះ ការមួលបង្កាច់ថា ការបោះឆ្នោតមិនសេរី ត្រឹមត្រូវ និងយុត្តិធម៌ និងមានការលួចបន្លំសន្លឹកឆ្នោត វាគ្រាន់តែជាល្បិចចាស់គំរិល និងគ្មានប្រសិទ្ធភាព។ ម្យ៉ាងទៀត កាលដែលគណបក្សភ្លើងទៀនលើកឡើងថា ការបោះឆ្នោតមិនសេរី យុត្តិធម៌ និងត្រឹមត្រូវ គឺជាការប្រមាថ និងមិនមានជំនឿទុកចិត្តលើទីភ្នាក់ងារគណបក្សរបស់ខ្លួនរួមនឹងអ្នកសង្កេតការណ៍បោះឆ្នោតដែលមានប្រភពមកពីអង្គការមួយចំនួនដែលគាំទ្រខ្លួនផងដែរ។ ល្បិចនេះ គួរតែក្រុមប្រឆាំងបោះចោលទៅ ព្រោះគេដឹងច្បាស់ពីគោលបំណងរួចហើយ គឺមិនទទួលស្គាល់ភាពអាម៉ាស់របស់ខ្លួន។

ព្យាយាមប្រើប្រាស់បដិវត្តន៍ពណ៌ដើម្បីឡើងកាន់អំណាចដូចឆ្នាំ២០១៣ ? ការបោះឆ្នោតគឺជាឱកាសមាសសម្រាប់ក្រុម ទុច្ចរិតក្នុងការបង្កើតឱកាសដើម្បីបញ្ឆេះកំហឹងប្រជាពលរដ្ឋ និងឈានទៅការបះបោរប្រឆាំងនឹងរដ្ឋាភិបាលស្របច្បាប់ និងប្រើប្រាស់អំណាចប្រជាពលរដ្ឋដើម្បីឡើងកាន់អំណាច។ ក្រុមប្រឆាំងដែលជ្រកក្រោមឆ័ត្រនៃគណបក្សភ្លើងទៀន គឺជាអតីតសមាជិកអតីតគណបក្សសង្គ្រោះជាតិដែលជាអង្គការចាត់តាំងនយោបាយ និងប្រតិបត្តិករបដិវត្តន៍ពណ៌នៅ ឆ្នាំ២០១៣ និងដើមឆ្នាំ២០១៤ ហើយមេដឹកនាំនៃគណបក្សនេះក៏ធ្លាប់ជាប់បម្រាមធ្វើនយោបាយដោយសារតែពាក់ព័ន្ធនឹងផែនការក្បត់ជាតិនេះដែរ។ មេដឹកនាំស្រមោលរបស់គណបក្សភ្លើងទៀន គឺទណ្ឌិត សម រង្ស៊ី មូរ សុខហួរ ហូរ វ៉ាន់ និងអេង ឆៃអ៊ាង ជាដើម គឺជាមេគំនិតរដ្ឋប្រហាររហូតថ្ងៃទី៩ខែវិច្ឆិកា ឆ្នាំ២០១៩ ហើយគំនិតទុច្ចរិតរបស់ពួកគេក៏បន្ត អនុវត្តដោយជ្រកក្រោមរូបភាពផ្សេងៗ។ តើអ្វីដែលពួកគេព្យាយាមក្នុងការបំភ្លៃការពិត និងមួលបង្កាច់ថា ការបោះឆ្នោត ក្រុមប្រឹក្សាឃុំសង្កាត់កាលពីថ្ងៃទី៥ ខែមិថុនា មិនសេរី ត្រឹមត្រូវ និងយុត្តិធម៌គឺជាល្បិចកលចាស់ ដើម្បីញុះញង់អ្នកគាំទ្រខ្លួនឱ្យមកធ្វើបាតុកម្មប្រឆាំងនឹងលទ្ធផលបោះឆ្នោតដូចកាលពីឆ្នាំ២០១៣ និងប្រើប្រាស់ជាកម្លាំងប្រជាពលរដ្ឋដើម្បីធ្វើបដិវត្តន៍ពណ៌សាជាថ្មីទេ? អ្វីដែលជាការកត់សម្គាល់និងមានព័ត៌មានច្បាស់លាស់គឺថា ទោះបីជាផែនការបដិវត្តន៍ពណ៌ត្រូវបានទប់ស្កាត់ និងកម្ចាត់ក៏ដោយ ប៉ុន្តែគោលគំនិតនៃបដិវត្តន៍ពណ៌ និងការឡើងគ្រប់គ្រងអំណាចតាមមធ្យោបាយមិនប្រជាធិបតេយ្យនេះនៅតែរស់រវើកជានិច្ច ក្នុងចំណោមក្រុមប្រឆាំងជ្រុលនិយម ព្រោះពួកគេគ្មានលទ្ធភាពប្រកួតប្រជែងយកជ័យជម្នះលើគណបក្សប្រជាជនកម្ពុជាបានឡើយ។ លទ្ធផលនៃការបោះឆ្នោតកន្លងទៅបាន បង្ហាញយ៉ាងច្បាស់ថា គ្មានគណបក្សណាមួយអាចមកយកជ័យជម្នះលើគណបក្សប្រជាជនកម្ពុជាបានឡើយ។ ដូច្នេះ ពួកគេព្យាយាមប្រើប្រាស់ល្បិចកលបដិវត្តន៍ពណ៌ជំនួសវិញ និងព្យាយាមប្រើប្រាស់ឱកាសនៃការបោះឆ្នោតដើម្បីអនុវត្តផែនការរបស់ពួកគេ។

បដិសេធលទ្ធផលបោះឆ្នោត តែទទួលយកអាសនៈ៖ នៅរៀងរាល់ការបោះឆ្នោតម្តងៗ គណបក្សប្រឆាំងតែងតែឡាំប៉ា មិនទទួលស្គាល់លទ្ធផលបោះឆ្នោតដោយទាញលេសផ្សេងៗ ប៉ុន្តែគ្មានម្តងណាឡើយដែលគណបក្សប្រឆាំងមិនទទួលយកនូវអាសនៈដែលទទួលបាននៅក្នុងក្រុមប្រឹក្សាឃុំសង្កាត់ ក្នុងរដ្ឋសភា និងព្រឹទ្ធសភាឡើយ។ នេះបង្ហាញយ៉ាងច្បាស់ពីការធ្វើនយោបាយដូចកូនក្មេងបៀមដៃរបស់ក្រុមប្រឆាំង ឬជា«អ្នកនយោបាយមេមាន់»។ ពួកគេធ្វើជាមិនទទួលស្គាល់ការបោះឆ្នោត និងចោទប្រកាន់ផ្សេងៗដើម្បីបិទបាំងភាពអាម៉ាស់របស់ខ្លួនប៉ុណ្ណោះ។ តែប្រសិន បើគណបក្សភ្លើងទៀនដែលត្រូវបានក្រុម កឹម សុខា ស្តីបន្ទោសថាជាក្រុមបក្សប្រហារ ចិត្តសឿងបឿងមែន ហើយជ្រុលតែវាយប្រហារខុសក្បួនផ្ទុយពីមតិភាគច្រើនលើសលុប និងផ្ទុយពីឆន្ទៈប្រជាពលរដ្ឋហើយ គួរតែហ៊ានលះបង់អាសនៈក្រុមប្រឹក្សាឃុំ សង្កាត់ជាង២០០០ ដែលគណបក្សភ្លើងទៀនទទួលបានក្នុងការបោះឆ្នោតក្រុមប្រឹក្សាឃុំសង្កាត់អាណត្តិទី៥ នេះ។ តែបើគណបក្សភ្លើងទៀនចេញសេចក្តីថ្លែងការណ៍ថាការបោះឆ្នោតមិនសេរីត្រឹមត្រូវ និងយុត្តិធម៌ មានការគំរាមកំហែង ផ្សេងៗ តែបែរជាទទួលយកអាសនៈ នោះមិនមិនជាអ្នកនយោបាយចិត្តសឿងទេ តែគ្រាន់តែជាការធ្វើនយោបាយបែប កូនក្មេងប៉ុណ្ណោះ។ ពួកគេធ្វើជាតវ៉ានេះតវ៉ានោះក៏ដើម្បីចិញ្ចឹមចលនាសម្រាប់ការបោះឆ្នោតសកលឆ្នាំ២០២៣ ផងដែរ ដើម្បីចិញ្ចឹមទឹកចិត្តអ្នកគាំទ្រខ្លួន និងបិទបាំងភាពកម្សោយរបស់ខ្លួន។ ដូច្នេះធ្វើដូចជាមែនទែន តែតាមពិតក្នុងចិត្តពិតជាពោរពេញដោយក្តីសប្បាយរីករាយព្រោះបានឱកាសកសាងបន្ទាយនយោបាយឡើងវិញ និងទម្រាំក្បត់អតីត ដៃគូខ្លួន កឹម សុខា លួចយកបក្សភ្លើងទៀនមកចូលប្រកួតបានត្រូវក្រុមកឹម សុខា ប្រមាថកប់ៗមាត់។

ជារួម ពលរដ្ឋខ្មែរពិតជាបានដឹងពីល្បិចកលដ៏អាក្រក់របស់ក្រុមប្រឆាំងគឺគេចវេសពីភាពអាម៉ាស់នៃបរាជ័យភ្លូកទឹកភ្លូកដីរបស់ខ្លួន និងព្យាយាមចិញ្ចឹមចលនា និងរកគ្រឿងលើកទឹកចិត្តសកម្មជនខ្លួនថាបក្សខ្លួនបរាជ័យ គ្មានការគាំទ្រពិតប្រាកដមិនមែនដោយសារតែគណបក្សប្រឆាំងខ្សោយ និងប្រើប្រាស់គោលនយោបាយបោកប្រាស់ពលរដ្ឋខ្លួនឯងទេ គឺមកពីការកេងបន្លំ សម្លុតគំរាមកំហែងទៅវិញ។ នេះគេហៅថា ក្រុមប្រឆាំងប្រើនយោបាយដើរលើសាកសពអ្នកដទៃដើម្បីសម្រេចបំណងរបស់ខ្លួនឯង។ ការធ្វើនយោបាយបែបនេះ គឺជាការធ្វើនយោបាយចោលម្សៀតសុទ្ធសាធ និងជាការធ្វើនយោបាយបៀបកំសាកញី។ ម្យ៉ាងទៀតក្រុមប្រឆាំងពុំគួរបន្តនយោបាយបដិវត្តន៍ពណ៌នៅកម្ពុជាទៀតឡើយ ព្រោះប្រជាពលរដ្ឋបានយល់ច្បាស់ ហើយលទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់នៃថ្ងៃទី៥ ខែមិថុនា ឆ្នាំ២០២២នេះ ដែលពលរដ្ឋច្រើនលើបលុបបានបោះឆ្នោតជូនគណបក្សប្រជាជនកម្ពុជាឈ្នះភ្លូកទឹកភ្លូកដី ក៏ព្រោះតែពលរដ្ឋបានជឿលើគណបក្សប្រជាជនកម្ពុជាក្នុងការការពារថែរក្សាសុខសន្តិភាព និងការអភិវឌ្ឍដែលមានសព្វថ្ងៃនេះដើម្បីបន្តរីកចម្រើនទៅមុខទៀត៕

ដោយ៖ចៅចាក់ស្មុក 
រាជធានីភ្នំពេញ ថ្ងៃទី៦ ខែមិថុនា ឆ្នាំ២០២២

ទាវ សារៈមុនិន្ទ
ទាវ សារៈមុនិន្ទ
ជាការីនិពន្ធគេហទំព័រ ដែលទទួលខុសត្រូវលើការផ្សាយអត្ថបទ ខ្លឹមសាររូបភាព កែសម្រួលទម្រង់អត្ថបទ កែអក្ខរាវិរុទ្ធលើគេហទំព័រអប្សរាសង់ត្រាល់ ផ្នែក Politico360 ។ លោកក៏មាននាទីជាអ្នកអង្កេត និងតាមដានអំពីព័ត៌មានជាតិ និងអន្តរជាតិ ដែលចុះផ្សាយទាក់ទងនឹងនយោបាយកម្ពុជាផងដែរ៕
ads banner
ads banner
ads banner