UN ព្រមានថាពិភពលោកប្រឈមមុខនឹង «ភាពអាសន្នមហាសមុទ្រ»
អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូតែរ៉េស (Antonio Guterres) ព្រមានថា ពិភពលោកកំពុងប្រឈមមុខនឹង«ភាពអាសន្នមហាសមុទ្រ» ខណៈពេលសកម្មជន អ្នកវិទ្យាសាស្ត្រ និងមេដឹកនាំរាប់ពាន់នាក់ប្រមូលផ្តុំគ្នានៅឯសន្និសីទមហាសមុទ្ររបស់អង្គការសហប្រជាជាតិក្នុងប្រទេសព័រទុយហ្គាល់ ដើម្បីអំពាវនាវឱ្យពង្រឹងវិធានការការពារសមុទ្រ។
លោកហ្គូតែរ៉េស ប្រាប់អ្នកបង្កើតគោលនយោបាយ អ្នកជំនាញ និងអ្នកតស៊ូមតិនៅឯកិច្ចប្រជុំពេញអង្គកាលពីថ្ងៃចន្ទក្នុងរដ្ឋធានីលីសបោនដោយពណ៌នាអំពីរបៀបដែលសមុទ្ររងផលប៉ះពាល់ដោយសារការប្រែប្រួលអាកាសធាតុ និងការបំពុលថា «យើងទាញយកប្រយោជន៍ពីមហាសមុទ្រដោយមិនដែលគិតពីវាទេ»។
លោកនិយាយថា៖ «ខ្ញុំជំរុញឱ្យអ្នកចូលរួមទាំងអស់នៅក្នុងសន្និសិទឱ្យកែកំហុសទាំងនេះ ហើយធ្វើចំណែករបស់យើងដើម្បីមហាសមុទ្រ។ យើងត្រូវតែចាត់វិធានការហើយធ្វើការផ្លាស់ប្ដូរ»។
សន្និសីទមហាសមុទ្ររយៈពេល៥ថ្ងៃ ដែលមានមនុស្សចូលរួមពីជាង ១២០ ប្រទេសផ្តោតលើការស្ដារឡើងវិញនូវសុខភាពរបស់មហាសមុទ្រដែលគ្របដណ្តប់លើ៧០ភាគរយនៃផ្ទៃផែនដី និងផ្តល់អាហារ និងជីវភាពរស់នៅសម្រាប់មនុស្សរាប់ពាន់លាននាក់។
ក្នុងព្រឹត្តិការណ៍ដដែល លោក ហ្គូតែរ៉េស អំពាវនាវដល់រដ្ឋាភិបាល និងក្រុមហ៊ុននានាឱ្យប្តេជ្ញាផ្តល់មូលនិធិបន្ថែមទៀត ដើម្បីជួយបង្កើតគំរូសេដ្ឋកិច្ចប្រកបដោយនិរន្តរភាពសម្រាប់ការគ្រប់គ្រងមហាសមុទ្រ។
មហាសមុទ្រជាជម្រករបស់សត្វប្រមាណ៧០០ ០០០ ទៅ ១ លានប្រភេទ និងផលិតអុកស៊ីហ្សែនជាងពាក់កណ្តាលរបស់ពិភពលោក។ប៉ុន្តែវាកំពុងប្រឈមមុខនឹងផលប៉ះពាល់នៃការប្រែប្រួលអាកាសធាតុ រួមទាំងការឡើងកំដៅផែនដី ការបំពុល និងការឡើងជាតិអាស៊ីត។អ្នកវិទ្យាសាស្ត្រព្រមានថា ការកាត់បន្ថយឧស្ម័នផ្ទះកញ្ចក់គឺចាំបាច់ ដើម្បីស្តារសុខភាពមហាសមុទ្រឡើងវិញ។
សកម្មជនក៏និយាយផងដែរថា ការប្រែប្រួលអាកាសធាតុកំពុងជំរុញឱ្យសីតុណ្ហភាពក្នុងមហាសមុទ្រឡើងដល់កម្រិតខ្ពស់មិនធ្លាប់មាននិងបង្កឱ្យជាតិអាស៊ីតកើនឡើង។ ការស្រូបយកប្រហែល១/៤នៃការបំពុលឧស្ម័នកាបូនិកធ្វើឱ្យទឹកសមុទ្រសម្បូរជាតិអាស៊ីតដែលគំរាមកំហែងដល់ខ្សែចង្វាក់អាហារក្នុងទឹក និងសមត្ថភាពស្រូបយកកាបូនរបស់មហាសមុទ្រ។យោងតាមកម្មវិធីបរិស្ថានរបស់អង្គការសហប្រជាជាតិ (UNEP)អ្វីដែលធ្វើឱ្យកាន់តែអាក្រក់ទៅៗនោះ គឺការបំពុលឥតឈប់ឈរ រួមទាំងប្លាស្ទិកពីរថយន្តដឹកសំរាមជារៀងរាល់នាទី។
សន្និសីទមហាសមុទ្រដដែល ក៏ផ្ដោតលើជលផលសកលសមុទ្រផងដែរ។ អ្នកស្រីKathryn Matthews ប្រធានអ្នកវិទ្យាសាស្ត្រនៃអង្គការOceana មានមូលដ្ឋាននៅសហរដ្ឋអាមេរិក ប្រាប់ទីភ្នាក់ងារព័ត៌មានAFP ថា៖ «យ៉ាងហោចណាស់ ១/៣នៃជម្រកត្រីត្រូវបាននេសាទហួសកម្រិត ហើយតិចជាង១០ភាគរយនៃមហាសមុទ្រត្រូវបានការពារ»។
ប្រភព៖ Aljazeera