ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធាននៃកិច្ចប្រជុំរដ្ឋមន្រ្តីសេដ្ឋកិច្ចអាស៊ាននិងកិច្ចប្រជុំក្រុមប្រឹក្សាសហគមន៍សេដ្ឋកិច្ចអាស៊ានឆ្នាំ២០២២ កាលពីថ្ងៃទី១៣ ខែកក្កដា ឆ្នាំ២០២២ បានអនុញ្ញាតឱ្យលោកសាស្រ្តាចារ្យ HIDETOSHI NISHIMURA ប្រធានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាននិងអាស៊ីបូព៌ា និងសហការី ចូលជួបសម្តែងការគួរសម និងពិភាក្សាការងារ នៅទីស្តីការក្រសួងពាណិជ្ជកម្ម។

មុននឹងចាប់ផ្តើមពិភាក្សាការងារ ឯកឧត្តម រដ្ឋមន្រ្តី បានចូលរួមរំលែកទុក្ខដ៏ក្រៀមក្រំបំផុតជូនចំពោះគ្រួសារឯកឧត្តម ស៊ីនហ្សូ អាបេ ប្រជាជនជប៉ុន និងរាជរដ្ឋាភិបាលជប៉ុន ចំពោះមរណភាពរបស់អតីតនាយករដ្ឋមន្ត្រី ដែលបានចូលរួមចំណែកយ៉ាងច្រើនក្នុងការអភិវឌ្ឍន៍ប្រទេសកម្ពុជា និងជំរុញទំនាក់ទំនងទ្វេភាគីកម្ពុជា-ជប៉ុន។

ឯកឧត្តម បានស្វាគមន៍យ៉ាងកក់ក្តៅចំពោះ លោកសាស្រ្តាចារ្យ និងសហការី ក្នុងដំណើរទស្សនកិច្ចមកកម្ពុជា និងបានវាយតម្លៃខ្ពស់លើកិច្ចសហប្រតិបត្តិការយ៉ាងជិតស្និទ្ធរវាងក្រសួងពាណិជ្ជកម្ម និងវិទ្យាស្ថាន ERIA ជាពិសេសការគាំទ្រឥតឈប់ឈររបស់វិទ្យាស្ថាន ERIA ក្នុងការអភិវឌ្ឍធនធានមនុស្ស និងវិស័យពាណិជ្ជកម្ម ដើម្បីពង្រឹងសមត្ថភាពមន្ត្រីរាជរដ្ឋាភិបាលកម្ពុជាពាក់ព័ន្ធ តាមរយៈការរៀបចំសិក្ខាសាលា និងការបណ្តុះបណ្តាលផ្សេងៗ បើទោះបីជាមានបញ្ហាប្រឈមបណ្តាលមកពីជំងឺរាតត្បាត COVID-19 ក៏ដោយ ។

ឯកឧត្តម ប៉ាន សូរស័ក្ត បានបញ្ជាក់ផងដែរ អំពីវឌ្ឍនភាពនៃការអនុវត្តសមិទ្ធផលសេដ្ឋកិច្ចជាអាទិភាពរបស់កម្ពុជា ក្នុងនាមជាប្រធានអាស៊ានឆ្នាំ២០២២ និងបានថ្លែងអំណរគុណដល់វិទ្យាស្ថាន ERIA ដែលបានផ្តល់ការសហការគាំទ្រ កន្លងមក ជាពិសេសការរៀបចំសៀវភៅស្តីពី “ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប)៖ ផលប៉ះពាល់ បញ្ហាប្រឈម និងការរីកចម្រើននាពេលអនាគតនៃអាស៊ីបូព៌ានិងអាស៊ាន” ជាមួយវិទ្យាស្ថានបណ្តុះបណ្តាល និងស្រាវជ្រាវពាណិជ្ជកម្ម (TTRI ) នៃក្រសួងពាណិជ្ជកម្ម។

ឯកឧត្តមរដ្ឋមន្រ្តី បានបង្ហាញពីការប្តេជ្ញាចិត្តក្នុងការធ្វើការសហការយ៉ាងជិតស្និទ្ធជាមួយវិទ្យាស្ថាន ERIA និងសង្ឃឹមយ៉ាងមុតមាំថាវិទ្យាស្ថាន ERIA នឹងបន្តដើរតួនាទីយ៉ាងសំខាន់របស់ខ្លួនក្នុងការជួយដល់រដ្ឋសមាជិកអាស៊ាន ជាពិសេសប្រទេសអភិវឌ្ឍន៍តិចតួច ដូចជាប្រទេសកម្ពុជា ដើម្បីធានាឱ្យមានការចូលរួមប្រកបដោយប្រសិទ្ធភាព និងប្រសិទ្ធផលនៅក្នុងក្របខ័ណ្ឌអាស៊ាន។

ជាការឆ្លើយតប លោកសាស្រ្តាចារ្យ HIDETOSHI NISHIMURA បានសម្តែងគាវរកិច្ចនិងថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមរដ្ឋមន្រ្តីក្រសួងពាណិជ្ជកម្ម ដែលមានសមានចិត្តរំលែកទុក្ខជាមួយគ្រួសារ ប្រជាជន និងរាជរដ្ឋាភិបាលជប៉ុន ចំពោះការបាត់បង់លោកអតីតនាយករដ្ឋមន្ត្រី ស៊ីនហ្សូ អាបេ ដែលជាស្ថាបនិកមួយរបស់វិទ្យាស្ថាន ERIA។

បន្ថែមពីនេះ លោកសាស្រ្តាចារ្យ បានជម្រាបជូន ឯកឧត្តមរដ្ឋមន្រ្តី អំពីប្រវត្តិនៃការបង្កើតវិទ្យាស្ថាន ERIA និងការចូលរួមចំណែករបស់វិទ្យាស្ថានក្នុងពេលកម្ពុជាធ្វើជាប្រធានអាស៊ានឆ្នាំ២០១២ ក៏ដូចជាឆ្នាំ២០២២ នេះ។ ក្នុងនោះវិទ្យាស្ថាន ERIA បាននឹងកំពុងអនុវត្តគម្រោងចំនួន ១៧ ក្រោមសសរស្តម្ភសហគមន៍សេដ្ឋកិច្ចអាស៊ាន ដើម្បីគាំទ្រដល់កម្ពុជាក្នុងនាមជាម្ចាស់ផ្ទះសម្រាប់ឆ្នាំ២០២២ ដូចជាការសិក្សាស្តីពីផែនការអភិវឌ្ឍអាស៊ីគ្រប់ជ្រុងជ្រោយ ៣.០ ដែលផ្តោតសំខាន់លើសមាហរណកម្មសេដ្ឋកិច្ច នវានុវត្តន៍ បរិយាប័ន្ន និងចីរភាពក្នុងតំបន់។

ឆ្លៀតក្នុងឱកាសនោះដែរ លោកសាស្រ្តាចារ្យ ក៏បានស្នើសុំឱ្យមានការគាំទ្រពី ឯកឧត្តមរដ្ឋមន្រ្តី ក្នុងនាមជាប្រធាននៃកិច្ចប្រជុំរដ្ឋមន្រ្តីសេដ្ឋកិច្ចអាស៊ាន ដើម្បីជំរុញការអនុវត្តគម្រោងទាំងអស់របស់វិទ្យាស្ថានឱ្យទទួលបានជោគជ័យតាមការគ្រោងទុក។

គួរជម្រាបផងដែរថា វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) គឺជាអង្គការអន្តរជាតិមួយដែលត្រូវបានបង្កើតឡើងដោយកិច្ចព្រមព្រៀងជាផ្លូវការក្នុងចំណោមប្រមុខរដ្ឋាភិបាលចំនួន១៦ នៅក្នុងកិច្ចប្រជុំកំពូលអាស៊ីបូព៌ាលើក ទី៣ នៅប្រទេសសិង្ហបុរី នៅថ្ងៃទី២១ ខែវិច្ឆិកា ឆ្នាំ២០០៧។

វិទ្យស្ថាន ERIA ធ្វើការយ៉ាងជិតស្និទ្ធជាមួយលេខាធិការដ្ឋាន អាស៊ាន ក៏ដូចជា អ្នកសិក្សាស្រាវជ្រាវនានា ក្នុងការវិភាគ និងផ្តល់អនុសាសន៍គោលនយោបាយ ជាដើម ដើម្បីគាំទ្រដល់ដំណើរការសមាហរណកម្មសេដ្ឋកិច្ចក្នុងតំបន់ក្នុងចំណោមប្រទេសសមាជិកអាស៊ាន។ វិទ្យាស្ថាន ERIA ក៏បានចូលរួមយ៉ាងសកម្មក្នុងការកសាងសមត្ថភាព និងការស្រាវជ្រាវនៅក្នុងប្រទេសអភិវឌ្ឍន៍តិចតួច ផងដែរ៕ ដោយ៖ ង៉ាន ទិត្យ