សេអ៊ូល៖ ចំនួនអ្នកស្លាប់ដោយសារព្យុះទីហ្វុង Hinnamnor បានកើនឡើងដល់ ១០ នាក់ នៅក្នុងប្រទេសកូរ៉េខាងត្បូង នេះបើយោងតាមអាជ្ញាធរ បាន និយាយ នាថ្ងៃទី៧ កញ្ញា ២០២២នេះ ពោលគឺបន្ទាប់ពីព្យុះនេះបានវាយលុកឆ្នេរសមុទ្រភាគខាងត្បូង ជាមួយនឹងរលកដ៏ធំនិងភ្លៀងធ្លាក់យ៉ាងខ្លាំង ក្នុងសប្តាហ៍នេះ។

ទីស្នាក់ការកណ្តាលប្រឆាំងគ្រោះមហន្តរាយ និងសុវត្ថិភាពបានឲ្យដឹងថា នៅទីក្រុងកំពង់ផែ ភាគអាគ្នេយ៍នៃទីក្រុង Pohang ដែលជាតំបន់រងគ្រោះខ្លាំងបំផុត សាកសពចំនួន ៧ នាក់ និងអ្នកនៅរស់រានមានជីវិតពីរនាក់ត្រូវបានទាញចេញពីចំណតក្រោមដីដែលលិចទឹកនៃអគារផ្ទះល្វែងមួយ។

អ្នកទាំងប្រាំបួននាក់ត្រូវបានជាប់ បន្ទាប់ពីពួកគេបានចូលទៅក្នុងចំណតរថយន្តដើម្បីផ្លាស់ទីរថយន្តរបស់ពួកគេក្នុង អំឡុងពេលមានភ្លៀងធ្លាក់ខ្លាំង នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក។

ប្រតិបត្តិការស្វែងរក និងជួយសង្គ្រោះបានបន្តនៅថ្ងៃពុធ ហើយអាជ្ញាធរបាននិយាយថា មនុស្សពីរនាក់នៅតែបាត់ខ្លួននៅឡើយ។

អាជ្ញាធរបាននិយាយថា ការស្លាប់ម្នាក់ទៀតត្រូវបានបញ្ជាក់នៅក្នុងទីក្រុង Pohang នៅថ្ងៃពុធ និងមួយទៀតនៅ Gyeongju ជាកន្លែងដែលមនុស្សម្នាក់ត្រូវបានសម្លាប់នៅពេលដែលផ្ទះមួយត្រូវបានកប់នៅក្នុងការរអិលបាក់ដី។

អ្នកស្លាប់ទាំង៩នាក់នេះត្រូវបានរកឃើញ បន្ទាប់ពីមរណភាពរបស់ស្រ្តីម្នាក់ក្នុងវ័យ៧០ឆ្នាំ ដែលបានស្លាប់នៅទីក្រុង Pohang ក្រោយពីត្រូវបានជន់លិចដោយទឹកជំនន់ កាលពីថ្ងៃអង្គារ។

ព្យុះ Hinnamnor បានបង្ខំមនុស្សជាង ៤៧០០ នាក់ឱ្យភៀសខ្លួនចេញពីផ្ទះរបស់ពួកគេដើម្បីសុវត្ថិភាព ហើយវាបានបំផ្លាញផ្ទះនិងអគារប្រហែល ១២០០០ ។ អាជ្ញាធរបាននិយាយថា គ្រួសារជិត ៩ម៉ឺន គ្មានថាមពលប្រើប្រាស់ នៅទូទាំងប្រទេស ខណៈដែលព្យុះបានវាយប្រហារ ប៉ុន្តែការផ្គត់ផ្គង់ត្រូវបានស្ដារឡើងវិញដល់ពួកគេភាគច្រើន នៅព្រឹកថ្ងៃពុធ។

មុនពេលព្យុះទីហ្វុងបានបោកបក់មក អាជ្ញាធរកូរ៉េខាងត្បូងបានបិទសាលារៀនជាង ៦០០ នៅទូទាំងប្រទេស ដើម្បីជាការប្រុងប្រយ័ត្ន ហើយក្រុមហ៊ុនអាកាសចរណ៍ក្នុងស្រុកបានលុបចោលជើងហោះហើរក្នុងស្រុកប្រហែល២៥០ ៕ ប្រភពពី CNA , ដោយ៖ សារ៉ាត