ការប្រកួតកីឡាវាយសី T Open 2022 នឹងរួមចំណែកជួយបំផុសឲ្យកីឡាវាយសីកាន់តែផុសផុលនៅកម្ពុជា
ភ្នំពេញ៖ ក្លឹបកីឡាវាយសី T BADMINTON COURT នឹងរៀបចំការប្រកួតកីឡាវាយសីពានរង្វាន់ T Open 2022 នៅទីលានកីឡាវាយសី ស្ថិតនៅក្នុងសង្កាត់ទួលសង្កែ ខណ្ឌ ឬស្សីកែវ រាធានីភ្នំពេញ។
លោក ព្រំ សារ៉ាវុធ តំណាងក្លឹបកីឡាវាយសី T BADMINTON COURT បានបញ្ជាក់ឲ្យដឹងថា ការប្រកួតនេះ គ្រោងរៀបចំរយៈពេល២ថ្ងៃចាប់ពីថ្ងៃទី៨ដល់ថ្ងៃទី៩ ខែ តុលា ឆ្នាំ២០២២ នៅទីលានកីឡាវាយសីក្លឹប T BADMINTON COURT ដោយបែងចែកជា២កម្រិត គឺកីឡាករទើបតែចេះលេង និងកីឡាករដែលមានបទពិសោធន៍លេងយូឆ្នាំ ពោលគឺកីឡាករជំនាញ ប្រកួតលើវិញ្ញាសាវាយគូរតែមួយប៉ុណ្ណុះ។
តំណាងក្លឹប បានបញ្ជាក់ទៀតថា សម្រាប់ការប្រកួតមួយនេះ ក្លឹបនឹងផ្តល់ឱកាសឲ្យកីឡាករមកចូលរួមមកពីក្លឹបទូទាំង២៥ខេត្ត ក្រុង ប៉ុន្តែមិនអនុញ្ញាតិឲ្យកីឡាករជម្រើសជាតិចូលរួមប្រកួតនោះទេ ។ ពោលការប្រកួតនេះ គឺក្លឹបមានគោលដៅផ្តល់ឱកាសឲ្យកីឡាករទើបចេះលេងបានចូលរួមប្រកួតប្រជែង និង កីឡាករដែលមានជំនាញប្រកួតជាមួយកីឡាករមានជំនាញដូចគ្នា ដើម្បីបង្កើតនូវសាមគ្គីភាព មិត្តភាព រវាងក្លឹបនិងក្លឹប និងផ្សារភ្ជាប់ទំនាក់ទំនងក្រុមគ្រួសារកីឡាវាយសីតែមួយ ដើម្បីបំផុសឲ្យវិស័យកីឡាវាយសីនៅកម្ពុជាកាន់តែផុសផុលរីកចំរើនដូចបណ្តាប្រទេសនៅក្នុងតំបន់ផងដែរ។
តំណាងក្លឹបខាងលើ បានពន្យល់ទៀតថា ការប្រកួតដែលក្លិបរៀបចំលើកដំបូងនេះ ក្លឹបបានអុញ្ញាតិឲ្យកីឡាករបរទេសចូលរួមប្រកួតជាមួយកីឡាករកម្ពុជាយើងផងដែរ ក្នុងនោះមានកីឡាករឥណ្តូនេស៊ី វៀតណាម ចិន និងម៉ាឡេស៊ី ដើម្បីជាការផ្សារភ្ជាប់រិតចំណងទំនាក់ទងអន្តរជាតិរវាងប្រជាជនកម្ពុជាជាមួយបណ្តាប្រទេសទាំងនោះឲ្យកាន់តែស្អិតរមួតបន្ថែមទៀត។
តំណាងក្លឹបរូបនេះ បានគូបញ្ជាក់ទៀតថា សម្រាប់ការរៀបចំការប្រកួតលើកដំបូងនេះ ក្លឹបបានប្តេជ្ញាថា រៀបចំឲ្យមានលក្ខណៈស្តង់ដារ និងមានតម្លាភាពបំផុតសម្រាប់កីឡាករចូលរួមទាំងជាតិនិងអន្តរជាតិ មានន័យថា កីឡាករដែលមកចុះឈ្មោះចូលរួមប្រកួតទាំងអស់ត្រូវបែងចែកជាពីរកម្រិត គឺកម្រិតកីឡាករទើបតែចេះលេង និងកម្រិតកីឡាករជំនាញ ដោយពុំមានការបន្លំសមាសភាពឡើយ ពោលគឺយើងមានគណៈកម្មការតាមដាន។
សម្រាប់ការប្រកួតនេះ ជ័យលាភីទាំង២កម្រិត ចំក្រុមជាប់លេខ១ ទទួលបានប្រាក់រង្វាន់លើកទឹកចិត្តចំនួន៥០០ដុល្លារ និងសម្ភារៈកីឡាមួយចំនួន ចំណាត់លេខ២ ទទួលបានរង្វាន់លើកទឹកចិត្តចំនួន៣០០ដុល្លារ និងសម្ភារៈកីឡា និងចំណាត់ថ្នាក់លេខ៣ ទទួលបានប្រាក់រង្វាន់លើកទឹកចិត្តចំនួន២០០ដុល្លារ និងសម្ភារៈកីឡាមួយចំនួន៕អត្ថបទ៖ ជាវ ចន្ធូ