(មណ្ឌលគិរី)៖ រថយន្តរបស់ក្រុមកីឡាករថៃចំនួន២គ្រឿងបានធ្វើដំណើរស្កាត់ចូលមកប្រទេសកម្ពុជា ក្នុងរយៈចម្ងាយជិត១ពាន់គីឡូម៉ែត្រ ដើម្បីចូលរួមប្រកួតកីឡាប្រណាំងរថយន្ត Off Road សន្តិភាព ឆ្នាំ២០២៣ ជាមួយក្រុមកីឡាករកម្ពុជាជាច្រើនទៀត នៅទីលាន១២ម៉ូទ័រផាក ខេត្តមណ្ឌលគិរី។

គួរជម្រាបថា ព្រឹត្តិការណ៍ប្រណាំងរថយន្ត Off Road នេះ បានឈានដល់ថ្ងៃទី២ហើយ ដែលត្រូវនឹងថ្ងៃទី១៤ ខែមករា ឆ្នាំ២០២៣ បន្ទាប់ពីបើកដំណើរការនៅថ្ងៃទី១៣ ខែមករា ម្សិលមិញ អមជាមួយការសម្ពោធដាក់ឱ្យប្រើប្រាស់ទីលាន១២ម៉ូទ័រផាកជាផ្លូវការ ស្ថិតនៅភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី។

លោក ព្រំ រស្មី ប្រធានគណៈកម្មការរៀបចំការប្រកួតរថយន្ត Off Road បានឱ្យដឹងថា កីឡាប្រណាំងរថយន្តឆ្លងកាត់ឧបសគ្គ Off Road នេះត្រូវបានបែងចែកជា៣ក្រុម ឬ 3 Class មានរថយន្តសរុបចំនួន៦៧គ្រឿង ក្នុងនោះក្រុមទី១ ហៅថា Hard Core ឬ Class A មានរថយន្តកម្ពុជាចំនួន២៧គ្រឿង និងរថយន្តថៃចំនួន២គ្រឿង, ក្រុមទី២ ហៅថា Light Core ឬ Class B មានរថយន្តកម្ពុជាចំនួន១៥គ្រឿង និងវៀតណាមចំនួន១គ្រឿង, ក្រុមទី៣ ហៅថា Overland ឬ Class C មានរថយន្តកម្ពុជាចំនួន២២គ្រឿង។

ជាអ្នកបើកបររថយន្តលេខ១១៦ លោក Praseth ក៏ជាកីឡាករម្នាក់ក្នុងចំណោមកីឡាករថៃដទៃ បានថ្លែងប្រាប់អ្នកព័ត៌មានថា លោកបានធ្វើដំណើរពីខេត្តត្រាច ប្រទេសថៃ ឆ្លងកាត់ច្រកទ្វារព្រំដែនអន្តរជាតិចាំយាម ខេត្តកោះកុង ដោយឈប់សម្រាក១យប់នៅខេត្តកំពង់ចាម មុនបន្តដំណើរមកដល់ខេត្តមណ្ឌលគិរី ពោលគឺចំណាយពេល២ថ្ងៃ១យប់។

ក្នុងវ័យ៦១ឆ្នាំទៅហើយនោះ លោក Praseth នៅតែមានឆន្ទៈចូលរួមប្រកួតយ៉ាងស្វាហាប់ លោកមើលឃើញនូវការរៀបចំទីលានប្រណាំង១២ម៉ូទ័រផាកនេះ គឺពិតជាស័ក្តិសមសម្រាប់កីឡាប្រណាំងយានយន្ត ក្នុងនោះមានដូចជាផ្លូវកាច់កោង គ្រហក ជ្រលង ចម្រាក់ថ្ម ដែលកីឡាករប្រកួតមិនងាយនឹងបើកបរឆ្លងកាត់ស្រួលនោះទេ។

កីឡារថៃចាស់វស្សាខាងប្រកួតរថយន្តឆ្លងកាត់ឧបសគ្គរូបនេះ ពិតជាមានក្ដីសោមនស្សយ៉ាងខ្លាំងក្នុងការមកចូលរួមប្រកួតជាមួយកីឡាករដទៃនៅប្រទេសកម្ពុជា ដោយបានបង្កប់នូវការស្រលាញ់រាប់អានដល់ក្រុមលោកដែលជាកីឡាករមកពីបរទេស។

ជាកីឡាករថៃបើកបររថយន្តលេខ១១១ លោក Puwadon ក៏បានរួមដំណើរជាមួយលោក Praseth ដើម្បីមកចូលរួមប្រកួតរថយន្ត Off Road នេះដែរ។ លោក Puwadon ពេញចិត្តចំពោះការរៀបចំការប្រកួតនៅទីលានរបស់កម្ពុជានេះ ព្រមទាំងទទួលបាននូវបទពិសោធន៍ថ្មីៗបន្ថែមពីការប្រជែងជាមួយកីឡាកររបស់កម្ពុជា នៅលើសមរភូមិវាលភក់និងខ្ពង់រាប។

អាចនិយាយភាសាខ្មែរបានខ្លះ កីឡាករថៃ Puwadon ចង់ឱ្យវិស័យកីឡាប្រណាំងរថយន្តមានការរីកចម្រើនឈានឡើង ទាំងនៅលើទឹកដីកម្ពុជា និងទឹកដីថៃ ដើម្បីបង្កើននូវមិត្តភាព ភាតរភាព និងជួយឱ្យការរៀបចំប្រកួត និងការចូលរួមប្រកួតកាន់តែត្រឹមត្រូវតាមបច្ចេកទេស។

គួរជម្រាបថា រថយន្តរបស់កីឡាករថៃទាំង២គ្រឿងនេះគឺសុទ្ធតែបានចូលរួមក្នុងការប្រកួតនៅ Class A ឬ Hard Core ដែលជា Class ឆ្លងកាត់ឧបសគ្គលំបាកជាងគេបំផុតក្នុងចំណោម Class ទាំង៣។

លោក វង្ស គឹមហួត ជាកីឡាករខ្មែរ១រូបបើកបររថយន្តលេខ១១០ នៅក្នុង Class A បានបង្ហាញគោលបំណងចង់ឱ្យការប្រណាំងរថយន្តរវាងកម្ពុជាជាមួយបណ្ដាប្រទេសជិតខាង កាន់តែត្រូវបានបង្កើននូវការចូលរួមទៅវិញទៅមក ទោះបីក្នុងចំនួនតិចតួចក្ដី។ ជាក់ស្ដែងដូចជាការរៀបចំប្រកួតលើកនេះ គឺមានការចូលរួមពីកីឡករចម្រុះជនជាតិ ដូចជា កម្ពុជា ថៃ វៀតណាម និងជនជាតិដទៃទៀតជាដើម។

លោក វង្ស គឹមហួត ដែលជាកីឡាករកម្ពុជាធ្លាប់ចូលរួមប្រកួតនៅបរទេសច្រើនដងដែរនោះ បានមើលឃើញពីចលនានៃការចូលរួមរបស់កីឡាករថ្មីៗរបស់កម្ពុជាក្នុងការប្រកួតនេះ ដែលនឹងអាចជំរុញដល់វិស័យកីឡាប្រណាំងយានយន្តនៅកម្ពុជាកាន់តែផុសផុល ខណៈទីលាន១២ម៉ូទ័រផាកនេះគឺមានសមត្ថភាពរៀបចំដូចទៅនឹងទីលាននៅប្រទេសថៃ និងប្រទេសដទៃទៀតដែរ។

គួរជម្រាបថា ចំពោះការប្រកួតរថយន្ត Off Road ទាំង៣ Class នេះ គឺនឹងបញ្ចប់នៅថ្ងៃទី១៤ ខែមករា ឆ្នាំ២០២៣នេះហើយ ខណៈម្ចាស់ជ័យលាភីនឹងទទួលបានមេដាយអនុស្សាវរីយ៍ និងប្រាក់រង្វាន់មួយចំនួនទៀតពីទីលាន១២ម៉ូទ័រផាក ក៏ដូចជាលោក ទៀ សាយ៉ាម ប្រធានមហាគ្រួសាររថយន្ត Off Road កម្ពុជា ព្រមទាំងគណៈកម្មការរៀបចំការប្រកួតផងដែរ៕ ចាន់ វិចិត្រ