ភ្នំពេញ៖ សម្ដេចតេជោ ហ៊ុន សែន បានថ្លែងរំលឹកដល់យុវជនជំនាន់ក្រោយថា អ្នកដែលនិយាយមិនស្ដាប់ នឹងហែលឆ្លងទឹកភ្នែកម្ដាយឪពុកមិនរួចទេ។ សម្ដេចថា មកដល់ម៉ោងនេះហើយ យុវជនយើងនៅប្រណាំងម៉ូតូ កាន់ដាវកាប់គ្នាទៀត។ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រើនរំលឹកដល់យុវជនដូចនេះ ក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និងនិស្សិត នៃវិទ្យាស្ថានជាតិបណ្តុះបណ្តាលបច្ចេកទេស (NTTI) ប្រមាណ ៥ពាន់នាក់ នៅព្រឹកថ្ងៃទី២៧ ខែកុម្ភៈ ឆ្នាំ២០២៣ ។

សម្ដេចតេជោ ហ៊ុន សែន បានលើកឡើងដូច្នេះថា មកដល់ម៉ោងនេះហើយ យុវជនយើងនៅប្រណាំងម៉ូតូ កាន់ដាវកាប់គ្នាទៀត ប៉ុន្តែវាមិនយូទេ ។ ជួនកាល យើងមិនចង់ឲ្យមានមនុស្សស្លាប់ តែវាត្រូវតែស្លាប់ ដែលយើងមិនបានដឹង ដោយសារវាកាប់គ្នាចឹងទៅ ហើយជួនកាល វាមានទៅកាប់អ្នកចង់កាប់ឯណា បែជាទៅកាប់អ្នកដែលគ្នាអត់ដឹងអីនោះទៅទៀត ។

សម្ដេចបន្តថា តែយ៉ាងណា វាក៏ត្រូវទៅនៅក្នុងមន្ទីរឃុំឃាំងអញ្ចឹងទៅ ហើយឪពុកម្ដាយ ក៏និយាយវាមិនស្ដាប់ទៅទៀត តែអ្នកដែលនិយាយមិនស្ដាប់នោះ នឹងហែលឆ្លងទឹកភ្នែកម្ដាយឪពុកមិនរួចទេ ។

សម្ដេចតេជោ បានបន្តទៀតថា ឪពុកម្ដាយ និយាយមិនស្ដាប់ហើយ បើអ្នកនយោបាយវិញ មិនបាច់ទៅនិយាយរឿងអីទេ ដោយគេគ្រាន់តែឌឺថា មិនបាច់ទៅខ្វល់អីទេ បើឪពុកម្ដាយឯង និយាយមិនស្ដាប់ មានស្អីឯង មកស្ដាប់អញ។ សម្ដេចបន្ថែមថា ឯងនិយាយថា ខ្ញុំស្រលាញ់ប្រជាជនណាស់! អឺ បើឪពុកម្ដាយឯង មិនទាំងស្រលាញ់ផង មានស្អីដែលឯងមកស្រលាញ់អញ ៕

ដោយ វណ្ណលុក