ការ៉ាកាស៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ ថ្លែងថា អនុត្តរភាពរបស់សហរដ្ឋអាមេរិកនៅអាមេរិកឡាទីន ការ៉ាប៊ីន និងពិភពលោកទាំងមូលកំពុងធ្លាក់ចុះ។

លោក ម៉ាឌូរ៉ូ បាននិយាយនៅក្នុងបទសម្ភាសន៍មួយជាមួយប្រព័ន្ធផ្សព្វផ្សាយអាហ្សង់ទីនពីរដ្ឋធានីការ៉ាកាស់ថា ចក្រភពអាមេរិកកំពុងធ្លាក់ចុះជាប្រវត្តិសាស្ត្រ ហើយលែងមានអ្វីដែលត្រូវផ្តល់ជាប្រយោជន៍ដល់ប្រជាជននៅអាមេរិកឡាទីន និងតំបន់ការីប៊ីនទៀតហើយ។ ផ្ទុយទៅវិញ គោលនយោបាយទាំងអស់របស់ខ្លួន គឺដើរថយក្រោយ។

លោក ម៉ាឌូរ៉ូ បន្ថែមថា ប្រទេសវេណេហ្ស៊ុយអេឡាបានទប់ទល់នឹងពេលវេលាដ៏លំបាក ហើយចូលរួមចំណែកក្នុងការកសាង “ពហុប៉ូឡា ពហុកណ្តាល ពិភពលោកថ្មី ដែលជាជោគវាសនារួមសម្រាប់មនុស្សជាតិ”។

ប្រធានាធិបតីវេណេស៊ុយអេឡារូបនេះ បានសង្កត់ធ្ងន់ទៀតថា ចក្រពត្តិនិយមអាមេរិក និងកងកម្លាំងស្តាំនិយមជ្រុលជឿថា តាមរយៈការបំផ្លាញរបបដឹកនាំលោក ម៉ាឌូរ៉ូ ពួកគេកំពុងបំផ្លាញគម្រោងបដិវត្តន៍ Bolivarian របស់វេណេហ្ស៊ុយអេឡា ប៉ុន្តែការគិតបែបនេះ គឺពួកគេបានយល់ខុស… ហើយយល់ខុសខ្លាំងណាស់៕ ប្រភព៖ ស៊ីនហួរ ប្រែសម្រួលដោយ៖ ទីណា