ភ្នំពេញ ៖ ពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងបានកើនឡើង ១១.៣៣ ភាគរយ ស្មើនឹង ៦៣៥,៥ លានដុល្លារក្នុងរយៈពេល ៨ ខែនៃឆ្នាំ២០២១នេះ ខណៈប្រទេសទាំងពីរគ្រោងចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTA) នៅខែក្រោយ។ ការចរចាស្តីពីកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) ត្រូវបានបញ្ចប់នៅក្នុងខែកុម្ភៈ ប៉ុន្តែត្រូវបានពន្យារពេលមកដល់ពេលនេះដោយសារបញ្ហារាំងស្ទះមួយចំនួនដែលបណ្តាលមកពីកូវីដ-១៩។
យោងតាមតួលេខពីសមាគមពាណិជ្ជកម្មអន្តរជាតិកូរ៉េបានបញ្ជាក់ថា ការនាំចេញរបស់កម្ពុជាចាប់តាំងពីខែមករាដល់ខែសីហា មានចំនួន ២២៦,២ លានដុល្លារកើនឡើង ៣,៥ ភាគរយធៀបទៅនឹងរយៈពេលដូចគ្នាកាលបីឆ្នាំកន្លងទៅ ដោយក្នុងនោះ ការនាំចូលសរុបរបស់កម្ពុជាពីកូរ៉េខាងត្បូងបានកើនឡើង ១៦,២ ភាគរយស្មើនឹង ៤០៩,៣ លានដុល្លារ រួមមានជាប្រភេទ សម្លៀកបំពាក់ និងវាយនភ័ណ្ឌ ស្បែកជើង កាបូបធ្វើដំណើរ គ្រឿងបន្លាស់ ផលិតផលធ្វើដំណើរ ភេសជ្ជៈ ឧបករណ៍អេឡិចត្រូនិក ឱសថ ក្រដាសកាតុង និងផលិតផលកសិកម្ម កៅស៊ូ ស្រូវ អង្ករ ស្វាយ និងដំឡូងមី ។
ដោយឡែក កូរ៉េខាងត្បូងបាននាំចូលមកកាន់កម្ពុជា រួមមាន យានយន្ត គ្រឿងអេឡិចត្រូនិក រថយន្តដឹកភេសជ្ជៈ គ្រឿងម៉ាស៊ីន ឧបករណ៍ផ្ទះបាយ ផលិតផលតុបតែងផ្ទះ ភេសជ្ជៈ ឱសថ ផលិតផលប្លាស្ទិក សម្ភារៈសំណង់ និងផលិតផលសម្រេចមួយចំនួនទៀត។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានថ្លែងថា ៖
«បើស្ថានការណ៍កូវីដ-១៩ ល្អប្រសើរ ឯកឧត្តមប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជានឹងដឹកនាំគណៈប្រតិភូទៅកាន់ប្រទេសកូរ៉េខាងត្បូង ដើម្បីចុះហត្ថលេខាលើកិច្ចព្រមព្រៀងនេះនៅខែតុលាខាងមុខនេះ ហើយតាមរយៈ កិច្ចព្រមព្រៀងនេះ ពាណិជ្ជកម្មទ្វេភាគីជាមួយកូរ៉េខាងត្បូងនឹងបើកទីផ្សារសម្រាប់ផលិតផលកម្ពុជាកាន់តែទូលាយ»
ព្រះរាជាណាចក្រកម្ពុជាបានបង្កើត FTA ទ្វេភាគីជាលើកដំបូងជាមួយប្រទេសចិន ដោយសភាបានអនុម័តកិច្ចព្រមព្រៀងពាណិជ្ជកម្មសេរីជាមួយប្រទេសចិនរួចហើយ។ ក្រៅពីនេះ កម្ពុជាក៏កំពុងមានគម្រោងចរចា FTA ជាមួយបណ្តាប្រទេសមួយចំនួនទៀត ដូចជា ប្រទេសជប៉ុន និងឥណ្ឌា ហុងកុង ជាដើម និងបានត្រៀមខ្លួនរួចជាស្រេច។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងប្រាប់ AMS ថា FTA ជាមួយកូរ៉េ នឹងមិនត្រឹមតែបើកទីផ្សារបន្ថែមទៀតដល់ផលិតផលកម្ពុជានោះទេ ប៉ុន្តែថែមទាំងទាក់ទាញការវិនិយោគសម្រាប់ការផលិត និងការនាំចេញផលិតផលកម្ពុជា។
លោកឧកញ៉ា លឹម ហេង បានមានប្រសាសន៍ថា ៖
« នៅពេលកិច្ចព្រមព្រៀងពាណិជ្ជកម្មចូលជាធរមាន វានឹងជំរុញផលិតកម្មក្នុងស្រុក ក៏ដូចជាការរួមចំណែកដល់ការនាំចេញរបស់កម្ពុជា និងទាក់ទាញការវិនិយោគបន្ថែមទៀតមកកាន់ប្រទេសកម្ពុជា ដើម្បីកែច្នៃទំនិញនាំចេញកាន់តែច្រើន»
លោកឧកញ៉ា លឹម ហេង បានបញ្ជាក់ថា កម្ពុជាពិតជាបានត្រៀមខ្លួនរួចជាស្រេច សម្រាប់ការចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយកូរ៉េខាងត្បូងនៅខែក្រោយនេះ។
សូមបញ្ជាក់ថា ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង មានចំនួន ៨៨៤ លានដុល្លារនៅឆ្នាំ២០២០ ធ្លាក់ចុះ ១៧ ភាគរយ ខណៈដែលកាលពីឆ្នាំ២០១៩ សម្រេចបានក្នុងទំហំទឹកប្រាក់ ១,០៣២ ពាន់លានដុល្លារ ៕
ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។
របាយការណ៍ថ្មីៗ
មើលទាំងអស់ ➧ព័ត៌មានទូទៅ
មើលទាំងអស់ ➧បុរសម្នាក់កែច្នៃត្រឡោកដូងទៅជាធ្យូងអនាម័យ ជួយដល់សុខមាលភាពប្រជាជន
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
ជំនួសឱ្យការយកឈើទៅដុត បុរសម្នាក់បានប្រមូលយកត្រឡោកដូងដែលគេកោសសាច់រួច ទៅដុតឱ្យចេញជាធ្យូងអនាម័យ។
Hilltribe Organics ជួយបង្កើនប្រាក់ចំណូលជនជាតិភាគតិចនៅប្រទេសថៃជាង ៥០០ ដុល្លារក្នុងមួយខែពីការចិញ្ចឹមមាន់យកស៊ុតសរីរាង្គ
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
Hilltribe Organics បានរួមបញ្ចូលជនជាតិដើមភាគតិចដែលចិញ្ចឹមមាន់យកស៊ុតទៅក្នុងខ្សែសង្វាក់តម្លៃនៃផលិតផលសរីរាង្គរបស់ខ្លួន និងបានជួយបង្កើនប្រាក់ចំណូលរបស់ពួកគេបីដង ឬជាង ៥០០ ដុល្លារក្នុងមួយខែ
Doi Kham ក្រុមហ៊ុនធុរកិច្ចបរិយាបន្នថៃផ្តោតសំខាន់ជួយគាំទ្រជីវភាពក្រុមកុលសម្ព័ន្ធភ្នំ
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
Doi Kham បានជួយគាំទ្រដល់ក្រុមពលរដ្ឋកុលសម្ព័ន្ធជាច្រើនរយពាន់គ្រួសារតាមរយៈការទទួលទិញគ្រាប់កាហ្វេដែលមានគុណភាពខ្ពស់ដោយផ្ទាល់ពីសហគមន៍ទាំងនេះ