តាមការដកស្រង់បទពិសោធន៍ និងកត់សម្គាល់របស់អ្នកជំនាញផ្នែកបណ្តុះផ្សិតបានបង្ហាញថា ការបណ្តុះផ្សិតដោយប្រើបច្ចេកទេសបែបទំនើប ពិតជាអាចទទួលបានទិន្នផលខ្ពស់ លក់បានតម្លៃថ្លៃ និងចំណាយពេលតិចជាងការបណ្តុះផ្សិតតាមបែបប្រពៃណីបុរាណ។
ដូចដែលមនុស្សភាគច្រើនបានដឹងរួចមកហើយថា ផ្សិតជាប្រភេទរុក្ខជាតិម្យ៉ាងដែលមានសារធាតុអាហាររូបត្ថម្ភខ្ពស់ ផ្ទុកទៅដោយសារធាតុរ៉ែសំខាន់ៗដែលអាចផ្ដល់គុណប្រយោជន៍យ៉ាងច្រើនដល់មនុស្ស។ កន្លងមកសម្រាប់ការបណ្តុះផ្សិតនៅកម្ពុជាកសិករភាគច្រើនតែងធ្វើឡើងទៅតាមបទពិសោធន៍ និងចំណេះដឹងដែលដឹងតពីអ្នកជំនាន់មុនៗ ឬអាចនិយាយបានថា ជាការធ្វើឡើងតាមបែបប្រពៃណីដែលពឹងផ្អែកទៅលើធម្មជាតិជាសំខាន់។ ប៉ុន្តែបច្ចុប្បន្ននេះ ការបណ្តុះផ្សិតត្រូវបានគេធ្វើឡើងតាមបច្ចេកទេសថ្មីបែបទំនើបជាមួយនឹងការទទួលបានលទ្ធផលគួរជាទីពេញចិត្ត។
លោក រឿប ស៊ីរៀម អ្នកជំនាញផ្នែកបណ្តុះផ្សិតគ្រប់ប្រភេទដោយប្រើបច្ចេកទេសថ្មីបែបទំនើបប្រចាំសហគ្រាសបណ្តុះផ្សិតក្រុងប៉ោយប៉ែត បានប្រាប់ AMS ឲ្យដឹងថា បច្ចុប្បន្ននេះ ការបណ្តុះផ្សិតតាមបែបប្រពៃណីនៅតាមបណ្តាប្រទេសជិតខាងហាក់មិនត្រូវបានយកមកអនុវត្តទៀតនោះឡើយ ពោលគឺកសិកររបស់គេបានសិក្សា ស្វែងយល់ពីចំណេះដឹងថ្មីៗ ហើយចាប់អនុវត្តតាមបច្ចេកវិទ្យាបែបទំនើបជាមួយនឹងការទទួលបានលទ្ធផលគួរជាទីពេញចិត្ត។
« ខ្ញុំមើលឃើញពីបច្ចេកទេសក្នុងការបណ្ដុះផ្សិតបែបប្រពៃណី និងបុរាណដោយការរៀបអូស កំណាត់ឈើពុក គឺពុំសូវមានប្រសិទ្ធភាព ហើយក៏ពុំទាន់មានស្តង់ដានៅឡើយ ដូច្នេះខ្ញុំក៏បានពាំនាំនូវបច្ចេកទេស និងបទពិសោធន៍ពីប្រទេសថៃ អ៊ីស្រាអែល ឥណ្ឌូនេស៊ី ជាដើមមកបញ្ចូលគ្នា ដើម្បីជួយដល់វិស័យកសិកម្ម ពិសេសគឺដំណាំផ្សិត ដែលងាយដាំ និងផ្ដល់ផលខ្ពស់»
លោកបានបញ្ជាក់ថា៖
បច្ចុប្បន្ននេះ លោក រឿប ស៊ីរៀម បានរៀបចំជាពូជផ្សិត ឧបករណ៍បណ្តុះ រួមជាមួយនឹងបច្ចេកទេសខ្លះសម្រាប់ផ្តល់ជូនក្រុមគោលដៅក្នុងការបណ្ដុះផ្សិតប្រកបដោយទិន្នផលខ្ពស់ និងមិនចំណាយច្រើនទៅលើកម្លាំងពលកម្ម។ ក្រុមគោលដៅទាំងនោះ គឺសំដៅលើក្រុមកសិករដែលសហការទទួលទិញសម្ភារ ពូជ និងបច្ចេកទេសពីសហគ្រាសយកទៅរៀបចំដាំ។
ក្រុមគោលដៅរបស់សហគ្រាសសព្វថ្ងៃនេះមានប្រមាណជាង 10កន្លែង ស្ថិតនៅតាមបណ្ដាខេត្តផ្សេងៗគ្នា ដូចជា ខេត្តឧត្ដមានជ័យ បន្ទាយមានជ័យ តាកែវ កំពត កំពង់ស្ពឺ ពោធិសាត់ និងបាត់ដំបងជាដើម ហើយក្រៅពីនេះក៏មានជាង 10ក្រុមផ្សេងទៀតដែលសហគ្រាសបណ្តុះផ្សិតមិនទាន់ទទួលសំណើដោយសារតែបញ្ហានៃវិបត្តិជំងឺកូវីដនៅមិនទាន់អនុញ្ញាតឲ្យមានការជួបជុំគ្នានៅឡើយ ខណៈដែលមានអ្នកទិញពូជ ក៏ដូចជាសម្ភារបណ្តុះផ្សិតសរុបច្រើនជាង៤០ទីតាំង។
អ្នកជំនាញរូបនេះបានបញ្ជាក់ថា ការបណ្តុះផ្សិតគ្រប់ប្រភេទ គឺសុទ្ធតែត្រូវការចាំបាច់នូវចំណេះដឹងផ្នែកបណ្តុះ ពោលគឺមិនមែនចេះតែបណ្តុះតាមបែបធម្មតាៗ ហើយអាចទទួលបានផលនោះទេ។ សម្រាប់តែការបណ្តុះផ្សិតតាមបច្ចកទេសថ្មីនេះ អាចទទួលបានទិន្នផលច្រើន លក់បានថ្លៃ និងចំណេញពេលវេលា មិនចំណាយកម្លាំងពលកម្មច្រើននោះទេ ប៉ុន្តែក៏មានការចំណាយទុនបន្ថែមទៅលើការទិញឧបករណ៍ និងម៉ាស៊ីនពាក់ព័ន្ធនឹងការបណ្តុះផងដែរ។
ឧបករណ៍ដែលលោកនាំចូលមានប្រភពមកពីប្រទេសថៃ ដែលរួមមានម៉ាស៊ីនរែងតម្លៃ, ម៉ាស៊ីនលាយល្បាយ, ម៉ាស៊ីនច្រក ក្រៅពីនេះក៏មានផ្គត់ផ្គង់ឈុតហុយ, កញ្ចប់ផ្សិត និងការរៀបចំឡចំហាយទឹក។ ដោយឡែកសម្រាប់ការបណ្តុះជាមួយនឹងការរៀបចំបច្ចេកទេស និងឧបករណ៍ខាងលើនេះ កសិករអាចបណ្តុះបានគ្រប់ប្រភេទផ្សិតទាំងអស់ មិនថាជាប្រភេទផ្សិតអំបោះស អំបោះខ្មៅ ផ្សិតលិញជឺ ផ្សិតចំបើង ផ្សិតម្ជុល ឬផ្សិតភ្លៅមាន់នោះទេ។
«ក្នុងមួយថង់យើងចំណាយប្រមាណ ១ ០០០រៀល តែបានផលចំណេញមកវិញប្រមាណ ២ ០០០ – ៣ ០០០រៀលក្នុង១កញ្ចប់ ហើយផ្សិតនេះទៀតសោតក៏អាចផ្ដល់ផលរយៈពេលប្រមាណ ៤-៥ ដង ឬអាចដុះរហូតដល់វាស៊ីអាចម៍រណានៅក្នុងកញ្ចប់អស់ក៏មាន»
ទាក់ទងទៅនឹងទិន្នផលដែលទទួលបានវិញ លោក ស៊ីរៀម បានរៀបរាប់ថា ៖
ជាមួយនឹងការប្រាប់ពីរបៀបនៃការបណ្តុះផ្សិតតាមបែបបច្ចេកទេសថ្មីខាងលើនេះ លោក រឿប ស៊ីរៀម បានប្រាប់ឲ្យដឹងថា លោកបានចាប់ផ្តើមចាប់យកអាជីពជាអ្នកបណ្តុះផ្សិតនេះតាំងពី២០១២ ដោយផ្ដើមពីដើមទុនប្រមាណ ៥០០ដុល្លារក្នុងការទិញពូជ និងសហការជាមួយដៃគូនៅប្រទេសថៃយកពូជមកសាកល្បង។ ក្រោយមក បន្ទាប់ពីទទួលបានបទពិសោធន៍ មានកេរិ៍្តឈ្មោះល្បីបន្តិច លោកក៏បានធ្វើការផ្សព្វផ្សាយជាបណ្ដើរៗ រហូតដល់ឆ្នាំ២០១៨ ទើបមានអ្នកស្គាល់ច្រើន។
ទន្ទឹមនឹងនោះ ម្ចាស់សហគ្រាសនៅក្រុងប៉ោយប៉ែតរូបនេះក៏បានបង្ហាញពីផលលំបាករបស់កសិករដែលមានបំណងបណ្តុះផ្សិតបែបបច្ចេកទេសនេះថា ៖
«អ្វីដែលជាបញ្ហារបស់កសិករគឺកង្វះខាតដើមទុនក្នុងការផលិត ដោយសារភាគច្រើនកម្រិតជីវភាពរបស់បងប្អូនកសិករយើងគាត់ពុំទាន់អាចរ៉ាប់រងបាននៅឡើយ ជាពិសេសកសិករដែលធ្លាប់តែអនុវត្តបែបបុរាណ។ មិនមែនពួកគាត់មិនចង់ផ្លាស់ប្ដូរនោះទេ ប៉ុន្តែពួកគាត់នៅមិនទាន់អាចមានលទ្ធភាព ព្រោះការចាប់អនុវត្តការបណ្តុះផ្សិតតាមបច្ចេកទេសនេះ គឺចាំបាច់ត្រូវចំណាយទុនដំបូងច្រើនបន្តិច»
យ៉ាងណាក៏ដោយ ចំពោះចក្ខុវិស័យទៅថ្ងៃខាងមុខ លោក ស៊ីរៀម បានបញ្ជាក់ថា មិនមែនមានតែប្រភេទដំណាំផ្សិតនោះទេ ប៉ុន្តែលោកចង់បង្កើតឱ្យដំណាំខ្មែរគ្រប់ប្រភេទមានបទដ្ឋានស្តង់ដាត្រឹមត្រូវ អាចផ្គត់ផ្គង់ទីផ្សារក្នុងស្រុកបានពេញលេញ ហើយអាចនាំចេញទៅក្រៅប្រទេសបាន។ ជាមួយគ្នានេះ លោកក៏បានជំរុញ និងលើកទឹកចិត្តបងប្អូនប្រជាកសិករខ្មែរទាំងអស់គួរបង្កើនលទ្ធភាពក្នុងការផលិតឲ្យបានច្រើន និងប្រកដោយគុណភាព ដែលអាចប្រកួតប្រជែងទីផ្សាររួមបាន និងអាចទទួលបានតម្លៃខ្ពស់ដែលអាចជួយទ្រទ្រង់កម្រិតជីវភាពបានល្អប្រសើរជាងពេលបច្ចុប្បន្ននេះ។
គួរគូសបញ្ចាក់ដែរថា ផ្សិតដែលត្រូវបានបណ្ដុះតាមបែបប្រពៃណី អាចដុះបាន ៥-៦ ខាំ ក្នុង១ថង់ មានរយៈពេល ៣-៤ខែ ឯផ្សិតបណ្តុះតាមបែបទំនើបអាចបានទទួលបានទិន្នផលចាប់ពី ៨-៩ខាំ ក្នុង១ថង់ ហើយអាចទទួលបានផលច្រើនខែ។ ដោយឡែកចំពោះតម្លៃនៅលើទីផ្សារវិញ ផ្សិតដែលត្រូវបានបណ្ដុះតាមបែបទំនើបអាចលក់បានថ្លៃជាងផ្សិតបណ្តុះតាមបែបប្រពៃណីក្នុងចន្លោះចាប់ពី ១ ០០០ – ២ ០០០ រៀលក្នុង១គីឡូក្រាម ដោយសារវានៅខ្ចី មានរូបរាងស្អាតល្អ។ ផ្សិតអំបោះស ត្រូវបានគេលក់បោះដុំក្នុងតម្លៃ ៥ ០០០-៧ ០០០រៀលក្នុង១គីឡូក្រាម, ផ្សិតអំបោះខ្មៅ តម្លៃ ៧ ០០០-៨ ០០០រៀលក្នុង១គីឡូក្រាម, ផ្សិតចំបើង តម្លៃ ១២ ០០០-១៥ ០០០ ក្នុង១គីឡូក្រាម, ផ្សិតត្រចៀកកណ្ដុរ តម្លៃ ២០ ០០០រៀល ក្នុង១គីឡូក្រាម, ផ្សិតផ្លូវមាន់ តម្លៃ ១៥ ០០០ -២០ ០០០រៀលក្នុង១គីឡូក្រាម៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧ព័ត៌មានទូទៅ
មើលទាំងអស់ ➧Kukula Solar ធ្វើការជាមួយអ្នកលក់ផលិតផលថាមពលពន្លឺព្រះអាទិត្យជាស្ត្រី និងយុវជនពីសហគមន៍ក្រីក្រ
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 25/04/2024
គំរូអាជីវកម្មបរិយាបន្នរបស់ Kukula Solar គឺការធ្វើការជាមួយអ្នកលក់ផលិតផលថាមពលពន្លឺព្រះអាទិត្យជាស្ត្រី និងយុវជនពីសហគមន៍មូលដ្ឋាន ដើម្បីជំរុញការធ្វើទីផ្សារផលិតផលពន្លឺព្រះអាទិត្យ និងផ្តល់ការគាំទ្របន្ថែមដូចជាការជួសជុល និងសេវាកម្មអតិថិជនក្នុងសហគមន៍របស់ពួកគេ
ពិភពលោកឆ្ពោះទៅរកថាមពលកាបូនកម្រិតទាប ប៉ុន្តែត្រូវគ្រប់គ្រងឲ្យមានប្រសិទ្ធភាពលើវត្ថុធាតុដើមកម្រ
ព្រឹត្តិការណ៍, អាជីវកម្មថ្មី និងនវានុវត្ត
• 25/04/2024
ពិភពលោកឆ្ពោះទៅរកថាមពលកាបូនកម្រិតទាប ប៉ុន្តែត្រូវគ្រប់គ្រងឲ្យមានប្រសិទ្ធភាពលើវត្ថុធាតុដើមកម្រ
Barefoot College ជួយផ្លាស់ប្តូរជីវភាពសហគមន៍ក្រីក្រ និងជួយបណ្តុះបណ្តាលស្ត្រីទៅជាវិស្វករក្នុងវិស័យថាមពលសូឡា
ធុរកិច្ចបរិយាបន្ន, ព្រឹត្តិការណ៍, អាជីវកម្មថ្មី និងនវានុវត្ត
• 24/04/2024
Barefoot College បាន និងបន្តបេសកកម្មរបស់ខ្លួនទៅតាមគោលការណ៍អភិវឌ្ឍប្រកបដោយចិរភាព ហើយបានចូលរួមក្នុងកិច្ចការងារជាច្រើនជាមួយប្រជាសហគមន៍ក្រីក្រ