អាចនិយាយបានថាជាការបង្កើតគំនិតថ្មីនៃសិល្បៈមួយបែបដែលអាចយកក្រដាសមកច្នៃប្រឌិតធ្វើជាប្រអប់អំពូល 3D ដ៏ស្រស់ស្អាត និងគួរជាទីទាក់ទាញបំផុតជាមួយនឹងការរំលេចនូវរូបភាពក្នុងទ្រង់ទ្រាយជាសិល្បៈខ្មែរយ៉ាងអស្ចារ្យ ហើយអាចរកចំណូលបានពីការលក់ខ្ទង់ពាន់ដុល្លារក្នុងមួយខែ។
ជាយុវជនខ្មែរម្នាក់ដែលមានទេពកោសល្យផ្នែកគំនូររស់នៅក្នុងរាជធានីភ្នំពេញមានឈ្មោះ ពៅ វិសាល បានព្យាយាមបង្កើតនូវអាជីពថ្មីមួយដោយការកែច្នៃក្រដាសធ្វើជាប្រអបអំពូល 3D រំលេចចេញនូវរូបភាពនានាគួរជាទីចាប់អារម្មណ៍សម្រាប់ជាគ្រឿងតាំងលម្អនៅក្នុងគេហដ្ឋាន សណ្ឋាគារ បូទិក ជាដើម។
ពាក់ព័ន្ធទៅនឹងអាជីព និងអាជីវកម្មបង្កើតប្រអប់អំពូល 3D នេះ យុវជន ពៅ វិសាល បានប្រាប់ឱ្យដឹងថា សម្រាប់អាជីវកម្មថ្មីដែលបង្កើតឡើងដោយដៃមួយនេះ ដំបូងឡើយគឺធ្វើឡើងតាមការនឹកឃើញតែប៉ុណ្ណោះ ហើយក៏លេចចេញជារូបរាងល្អប្លែកគួរឱ្យចាប់អារម្មណ៍ និងបន្តធ្វើដោយមានការរចនាបន្ថែមជារូបគំនូរក្នុងទម្រង់ជាសិល្បៈបែបខ្មែរ ហើយកាត់តាមរូបភាពដើម្បីបិទតម្រៀបពីលើគ្នា និងមានពន្លឺអំពូលនៅពីក្នុងដើម្បីរំលេចឱ្យឃើញពីទម្រង់នៃរូបភាពបែបស្រមោល។
យុវជនរូបនេះបានលើកឡើងថា ៖
“ខ្មែរយើងមានសិល្បៈច្រើនប្រភេទ ច្រើនទម្រង់ណាស់ ដូចជារូបអប្សរា រូបរបាំខ្មែរ រូបប្រាសាទ រូបល្ខោនខោល រូបទេសភាព និងមានទម្រង់រូបភាពជាច្រើនទៀតដែលសុទ្ធតែមានភាពស្រស់ស្អាត និងរស់រវើក។ ខ្ញុំបង្កើតអំពូលនេះឡើងគឺដោយសារការស្រឡាញ់សិល្បៈខ្មែរ ហើយក៏មានគំនិតមួយថា បើសិនជាយើងបញ្ចូលសិល្បៈខ្មែរទៅក្នុងអំពូល នៅពេលយើងបើកទៅវានឹងស្អាតប្លែកភ្នែកខុសពីរូបគំនូរធម្មតា”
យុវជន ពៅ វិសាល បានបញ្ជាក់ថា ៖
“ខ្ញុំទើបតែដាក់លក់នៅលើទីផ្សារក្នុងរយៈពេលប្រមាណ6ខែនេះតែប៉ុណ្ណោះ ដោយកាលពីដំបូង ខ្ញុំបង្កើតបានប្រមាណ 6-7 ប្រអប់ ហើយដាក់លក់នៅលើ Page facebook មរតកកវី ដែលមានលក់ផ្ទាំងរូបភាពកាលពីជំនាន់មុនៗ ហើយក៏ទទួលបានការគាំទ្រពីអ្នកដែលមានចំណូលចិត្តផ្នែកសិល្បៈខ្មែរ ក្រោយមកខ្ញុំក៏ចាប់ផ្តើមយកចិត្តទុកដាក់ក្នុងការបង្កើតប្រអប់អំពូក3Dនេះជាបន្តបន្ទាប់ដើម្បីបំពេញតាមការចង់បានរបស់អតិថិជនដែលកុម្ម៉ង់ទិញតាម Page របស់ខ្ញុំ ដែលអ្នកទិញទាំងនោះមានខ្លះរស់នៅភ្នំពេញ ហើយខ្លះទៀតនៅតាមបណ្តាខេត្ត”
ការផលិតអំពូល3D បែបសិល្បៈនេះ គឺទាមទារឱ្យមានការច្នៃប្រឌិតខ្ពស់ក្នុងការគូរគំនូរនៅលើក្រដាស កាត់ក្រដាសតាមទម្រង់រូបភាពយ៉ាងយកចិត្តទុកដាក់។ ចំណែកឯសម្ភារៈក្នុងការផលិតគឺមានតែក្រដាស និងអំពូល LED ពីរគ្រាប់ ដែលនាំចូលមកពីក្រៅប្រទេស។ សម្រាប់ការរចនាម៉ូត ក្បាច់ ឬទម្រង់នៃរូបភាព គឺអាស្រ័យលើការច្នៃក្រដាសបិទភ្ជាប់ម្ដងមួយស្រទាប់ៗ ត្រួតស៊ីគ្នាដែលជាមធ្យមមាន7ស្រទាប់ ឬច្រើនជាងនេះអាស្រ័យលើរូបភាព។ ពេលអំពូលជះពន្លឺពីក្រោយមកត្រូវស្រទាប់ក្រដាសទាំងនោះ ដែលមើលទៅហាក់ដូចជាក្រដាសតែមួយផ្ទាំង ប៉ុន្តែមានសម្រស់ស្រស់ស្អាតជាងគំនូរធម្មតា។
តាមរយៈនៃការដាក់លក់ប្រអប់អំពូល 3D នៅលើបណ្តាញសង្គមដែលមានឈ្មោះថា «មរតកកវី» នេះក្នុងមួយខែយុវជន ពៅ វិសាល អាចលក់ចេញបានប្រមាណ 20-30 ប្រអប់អំពូល ដោយប្រអប់អំពូល1មានតម្លៃ 20-25ដុល្លារ ហើយរាល់ការដាក់លក់នៅលើ Page មួយនេះ ក៏មានចំនួនកំណត់ ពោលគឺធ្វើឱ្យបានរួចរាល់ចំនួន 10ប្រអប់អំពូល ទើបចាប់ផ្ដើមផុសលក់តែម្ដង ហើយរហូតមកដល់ពេលនេះច្នៃបានប្រមាណជាង២០ម៉ូដខុសៗគ្នា។ ឆ្លៀតនៅក្នុងឱកាសនេះ យុវជន ពៅ វិសាល ក៏បានថ្លែងអំណរគុណចំពោះអ្នកដែលមានទឹកចិត្តស្រឡាញ់សិល្បៈបែបខ្មែរ ជាពិសេសអតិថិជនដែលតែងតែគាំទ្រផលិតផលខ្មែរដែលបង្កើតឡើងដោយដៃ និងជាស្នាដៃកូនខ្មែរ ដែលទាំងអស់នេះគឺជារូបភាពមួយបង្ហាញពីការចូលរួមលើកស្ទួយវប្បធម៌ជាតិ និងសេដ្ឋកិច្ចជាតិផងដែរ៕
របាយការណ៍ថ្មីៗ
មើលទាំងអស់ ➧ព័ត៌មានទូទៅ
មើលទាំងអស់ ➧អាជីវកម្មសង្គម Okra ផ្ដល់អគ្គិសនីដល់ប្រជាជននៅតំបន់ដាច់ស្រយាល និងលើកស្ទួយថាមពលស្អាត
ជំនួញ, ធុរកិច្ចបរិយាបន្ន, ព្រឹត្តិការណ៍
• 23/04/2024
ក្រុមហ៊ុន Okra បានកំណត់យកប្រជាជននៅតាមតំបន់ដាច់ស្រយាលជាប្រជាជនគោលដៅ ក្នុងការជួយសម្រាលការចំណាយថ្លៃអគ្គិសនីរបស់ពួកគេ។
Olam Agri ជំរុញការបណ្តុះបណ្តាលកសិករលើផលិតកម្មស្រូវ ដើម្បីជួយពួកគេបង្កើនប្រាក់ចំណូល
ធុរកិច្ចបរិយាបន្ន, ព្រឹត្តិការណ៍, អាជីវកម្មថ្មី និងនវានុវត្ត
• 23/04/2024
Olam ផ្តល់កម្មវិធីបណ្តុះបណ្តាលដ៏ទូលំទូលាយសម្រាប់ដល់កសិករជាដៃគូដែលផ្តោតទៅលើលក្ខខណ្ឌ និងគោលដៅរបស់កសិករជាមូលដ្ឋាន ដើម្បីលើកកម្ពស់ជីវភាពរបស់ពួកគេ។