ប៉េកាំង៖ យោងតាមការប្រកាសដោយធនាគារ Cygnus ដែលត្រូវបានគេស្គាល់ថាជាអ្នកតំណាង និងទីប្រឹក្សារបស់កម្មវិធីទិញបន្លែស្រស់ៗតាមទូរស័ព្ទដៃរបស់ចិន Dingdong Maicai បានអះអាងថាកម្មវិធីមួយនេះទើបតែទទួលបានប្រាក់វិនិយោគបន្ថែមប្រមាណ 330 លានដុល្លារទៀត ដែលធ្វើឲ្យទុនវិនិយោគសរុបឡើងដល់1,000លានដុល្លារ។
ទំរង់អាជីវកម្មបែបទិញទំនិញអនឡាញ ជាពិសេសអាជីវកម្មដឹកជញ្ជូន(Online Delivery)ត្រូវបានគេមើលឃើញថាមានសន្ទុះយ៉ាងខ្លាំងនៅក្នុងអំឡុងពេលនៃការទទួលបានតម្រូវការយ៉ាងធំធេងពីអតិថិជនរបស់ខ្លួនជាពលរដ្ឋចិនដែលមិនអាចចេញក្រៅផ្ទះបានដូចធម្មតានោះ។ ជាក់ស្តែងក្រុមហ៊ុនដឹកជញ្ជូនទំនិញអនឡាញដ៏ល្បីឈ្មោះ Mertuan ក៏ទើបតែបានប្រកាសថាខ្លួនទទួលបានប្រាក់វិនិយោគប្រមាណជា 10 ពាន់លានដុល្លារផងដែរ។
ផលិតផលដូចជាបន្លែ ផ្លែឈើស្រស់ បានក្លាយទៅជាមុខទំនិញដ៏ពេញនិយមបំផុតក្នុងពេលបច្ចុប្បន្ននេះដោយក្នុងនោះសូម្បីតែ Alibaba Group និង Pinduoduo ក៏កំពុងចាប់ផ្តើមចាយលុយជាច្រើនសម្រាប់បំពេញតាមចំណង់របស់ទីផ្សារដ៏ធំមួយនេះផងដែរ។
គួរឲ្យដឹងដែរថាធនាគារ Cygnus ជាធនាគារដ៏ល្បីមួយខាងផ្នែកវិនិយោគ ហើយវាត្រូវបានទទួលរ៉ាប់រងនូវកិច្ចការងារវិនិយោគគ្រប់ប្រភេទតំណាងឲ្យកម្មវិធី Dingdong Maicai នេះ ប៉ុន្តែមកដល់ពេលនេះនៅមិនទាន់មានព័ត៌មានលម្អិតណាមួយដើម្បីបញ្ជាក់ថាមូលនិធិនេះនឹងត្រូវយកទៅប្រើប្រាស់ដោយរបៀបណានោះទេ សូម្បីតែ Dingdong Maicai ក៏មិនទាន់បានធ្វើការឆ្លើយតបចំពោះរបាយការណ៍នេះនៅឡើយដែរ។ Dingdong Maicai ត្រូវបានបង្កើតឡើងកាលពីឆ្នាំ2017 នៅក្នុងទីក្រុងសៀងហៃ ក្រោមការចូលរួមបង្កើតឡើងដោយក្រុមហ៊ុនចំនួន2 រួមមានក្រុមហ៊ុន Sequoia Capital China និង ក្រុមហ៊ុន Tiger Global Management ផងដែរ៕