ភ្នំពេញ៖ ក្រៅពីមានសោភ័ណ្ឌស្រស់ស្អាត និងមើលដើម្បីកម្សាន្តអារម្មណ៍ គំនូរអាចជួយបំបាត់ភាពតានតឹងក្នុងចិត្ត បង្កើតរូបភាពស្រមើស្រមៃ ព្រមទាំងផ្តល់គំនិតច្នៃប្រឌិតដល់អ្នកទស្សនា។ ទន្ទឹមគ្នានេះ គំនូរជួយឱ្យកុមារមានចិត្តស្ងប់ និងគំនិតច្នៃប្រឌិតនៅក្នុងដំណើរជីវិតរបស់ពួកគេ។ កុមារមួយចំនួនចូលចិត្តគូរគំនូរតាំងពីកំណើត ហើយចាប់ផ្តើមហ្វឹកហាត់គូរតាមរយៈការបង្រៀន និងការជំរុញពីលើកទឹកចិត្តពីឪពុកម្ដាយ។ នេះជាការចែករំលែកបទពិសោធន៍របស់និស្សិតមកពីសាកលវិទ្យាល័យផ្សេងៗ ដែលសុទ្ធសឹងជាអ្នកស្រឡាញ់និងចូលចិត្តគូរគំនូរ។
លោក សុខ ភក្ដី ជានិស្សិតសិក្សាជំនាញស្ថាបត្យកម្មនៃសាកលវិទ្យាល័យន័រតុន បាននិយាយថា ឪពុកម្ដាយអាចបណ្ដុះក្ដីស្រមៃរបស់កូនតាមរយៈការគូរគំនូរ។ គំនូរជួយឱ្យកុមារមានគំនិតច្នៃប្រឌិត និងចេះឈោងចាប់ក្ដីស្រមៃដោយខ្លួនឯងបាន។
លោក សុខ ភក្ដី
“ពីក្មេងខ្ញុំមិនសូវពូកែគូរគំនូរទេ តែដោយសារឪពុកម្ដាយជំរុញឱ្យខ្ញុំចាប់កាន់ខ្មៅដៃនិងសៀវភៅ ទើបធ្វើឱ្យខ្ញុំមើលឃើញរូបភាពជាច្រើន។ ពេលនោះខ្ញុំចាប់ផ្ដើមស្រឡាញ់ ហើយក៏គូររូបភាពទាំងនោះចេញមក”
លោក ភក្តី បានបន្ថែមទៀតថា ធម្មជាតិរបស់កុមារចូលចិត្តនិងចាប់អារម្មណ៍ខ្លាំងលើពណ៌ផ្សេងៗ ទោះបីពួកគេជាមិនចេះគូរគំនូរ ក៏ចង់ផាត់ពណ៌គំនូរដែរ។ ប្រសិនបើអាណាព្យាបាលចេះលើកទឹកចិត្តកូនឱ្យស្រឡាញ់គំនូរ មិនយូរមិនឆាប់ពួកគេនឹងលះបង់ការលេងទូរស័ព្ទ ហើយត្រឡប់មកគូរគំនូរជាក់ជាពុំខាន។ អាណាព្យាបាលគួរជួយចំណាយពេលបង្ហាត់កូនឱ្យចូលចិត្តគូរគំនូរ។
ចំណែកឯ កញ្ញា សុខ គីមលី និស្សិតនៃសាកលវិទ្យាល័យភូមិន្ទភ្នំពេញ យល់ឃើញថា ការគូរគំនូរជួយឱ្យចិត្តកុមារស្ងប់ល្អ និងជួយឱ្យក្មេងមានគំនិតច្នៃប្រឌិតទៅតាមអារម្មណ៍ស្រមើស្រមៃរបស់ពួកគេ។ កញ្ញាបានបន្ថែមទៀតថា កុមារជាវ័យដែលពោរពេញទៅដោយភាពស្រមើស្រមៃ។
កញ្ញា សុខ គីមលី
“ពួកគេអាចបង្កើតពិភពស្រមើស្រមៃ និងច្នៃប្រឌិតដោយខ្លួនគេផ្ទាល់ តែពួកគេគ្មានសមត្ថភាពនិយាយប្រាប់មនុស្សធំនោះទេ។ ហេតុនេះតាមរយៈគំនូរ ពួកគេអាចបកប្រែនូវអ្វីដែលគេគិតឱ្យក្លាយជារូបភាពប្រកបដោយភាពរស់រវើក”
គួររំលឹកផងដែរថា កុមារឈ្លាសវៃ និងមានគំនិតច្នៃប្រឌិត អាស្រ័យដោយការជំរុញនិងលើកទឹកចិត្តពីឪពុកម្ដាយ ឬអាណាព្យាបាល ព្រមទាំងផ្ដល់ឱកាសឱ្យកូនប្រើប្រាស់ទេព្យកោសល្យរបស់ខ្លួនដើម្បីធ្វើអ្វីដែលពួកគេស្រឡាញ់ពេញចិត្ត និងគ្មានការបង្ខិតបង្ខំ។ ការអប់រំដ៏ល្អពីម្តាយឪពុកទៅកាន់កូន អាចជួយឱ្យពួកគេមានគំនិតអភិវឌ្ឍកាន់តែប្រសើរ៕
កញ្ញា វ៉ាន គីមសល់ ជាអ្នករាយការណ៍ព័ត៌មានអប់រំឱ្យបណ្ដាញសារព័ត៌មាន AMS Education ។